༢༠༡༥ ཟླ་ ༡ ཚེས་ ༩ རེས་གཟའ་པ་སངས།

༄༅། །ཕྱི་ལོ་ ༢༠༡༥ ཟླ ༡ ཚེས་ ༧ ཉིན་ཕ་རན་སིའི་རྒྱལ་ས་པེ་རི་སི་ནང་མེ་མདའ་འཁྱེར་བའི་མི་གཉིས་ཀྱིས་ཕ་རན་སིའི་དུས་དེབ་ལས་ཁུངས་ནང་འཛུལ་ནས་དུས་དེབ་རྩོམ་སྒྲིག་པས་གཙོས་གསར་འགོད་པ་དང་། དུས་དེབ་རྩོམ་སྒྲིག་ཁང་དེ་སྲུང་སྐྱོབ་བྱེད་མཁན་གྱི་ཉེན་རྟོག་པ་བཅས་ཁྱོན་བསྡོམས་མི་གྲངས་ ༡༢ ལ་མེ་མདའ་བརྒྱབ་སྟེ་སྡེབ་གསོད་བྱས་པའི་ཡིད་སྐྱོའི་གནས་ཚུལ་ཐོན་པར་བརྟེན། བོད་མིའི་སྒྲིག་འཛུགས་ཀྱི་སེམས་གསོ་གནང་བའི་ནང་འཁོད་དོན། བོད་མིའི་སྒྲིག་འཛུགས་ཀྱི་ངོས་ནས་ཕ་རན་སིའི་རྒྱལ་ས་པེ་རི་སིར་མི་གསོད་དོན་རྐྱེན་བྱུང་བར་སེམས་ཚོར་ཆེན་པོས་སེམས་གསོ་ཞུ་བཞིན་ཡོད།

ལྷག་པར་གོད་ཆག་དེའི་འོག་འདས་གྲོངས་སུ་གྱུར་བ་དང་རྨས་སྐྱོན་ཕོག་པའི་ཉེ་འབྲེལ་ནང་མི་སྤུན་མཆེད་རྣམས་ལ་སེམས་གསོ་དང་སྨོན་ལམ་ཞུ་རྒྱུ་ཡིན། སྨྲ་བརྗོད་རང་དབང་ནི་འཇིག་རྟེན་ཀུན་ལ་ཁྱབ་པ་ཞིག་ཡིན་སྟབས། དེར་འཚེ་བའི་ལམ་ནས་འགོག་ཐབས་བྱས་པ་ནི་ཐབས་སྡུག་གི་གནས་ཚུལ་ཞིག་ཡིན། ཞེས་འཁོད་འདུག