༢༠༡༥ ཟླ་ ༡ ཚེས་ ༦ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༡ ཚེས་ ༢ ཉིན་རྡ་སྟེང་བོད་ཁྱིམ་དུ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གོ་སྒྲིག་འོག་བོད་མིའི་སློབ་གྲྭ་ཁག་གི་དཔེ་མཛོད་དོ་དམ་པ་ཁག་གཅིག་ལ་དཔེ་མཛོད་དོ་དམ་གནང་ཕྱོགས་དང་འབྲེལ་བའི་ཟབ་སྦྱོང་གནང་འདུག
དེ་ཡང་ཉིན་གྲངས་བཞིའི་རིང་གི་ཟབ་སྦྱོང་སྐབས་དཔེ་མཛོད་ནང་དཔེ་དེབ་སྒྲིག་སྟངས་དང་། མིང་བྱང་འགོད་སྟངས། ཐོ་གཞུང་ཉར་ཚགས་བྱེད་ཕྱོགས་སོགས་ཀྱི་སྐོར་ཟབ་ཁྲིད་གནང་ཡོད། ཉིན་གྲངས་གཉིས་རིང་གི་ཟབ་སྦྱོང་དེ་བཞིན་རྡ་སྟེང་བོད་ཁྱིམ་གྱི་དཔེ་མཛོད་ཁང་དང་མཇུག་གི་ཉིན་གྲངས་གཉིས་པོ་དེ་རྡ་ཤོད་བོད་ཁྱིམ་སློབ་གྲྭར་ཚོགས་འདུག
ཐེངས་འདིའི་ཟབ་སྦྱོང་ཐོག་བོད་ཕྲུག་ཁྱིམ་སྡེའི་སློབ་གྲྭ་ཁག་ ༥ དང་། སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་ཀྱི་སློབ་གྲྭ་ཁག་ ༢། དེ་བཞིན་ཤེས་རབ་དགའ་ཚལ་སློབ་གླིང་བཅས་ཁྱོན་སློབ་གྲྭ་ཁག་ ༨ ནས་དཔེ་མཛོད་དོ་དམ་པ་ ༡༨ ལྷན་འཛོམས་ཀྱིས་ཟབ་སྦྱོང་ཐོག་མཉམ་ཞུགས་གནང་འདུག ཟབ་ཁྲིད་གནང་མཁན་གཙོ་བོ་དཔེ་མཛོད་དོ་དམ་དང་འབྲེལ་བའི་སློབ་སྟོན་པ་ལྕམ་སྐུ་སུ་ཇ་ཏ་ནོ་རོན་ཧ་ Sujata Noronha ལགས་ཀྱིས་གཙོས་ཁོང་གི་ལས་རོགས་རྣམས་ཀྱིས་ཟབ་ཁྲིད་གནང་ཡོད། ཟབ་སྦྱོང་འདི་བཞིན་ཨ་རི་བོད་ཀྱི་ཐེབས་རྩ་བརྒྱུད་ཨ་རི་ USAID རོགས་ཚོགས་ནས་མཐུན་འགྱུར་གནང་བ་ཞིག་ཡིན་འདུག
