༢༠༡༠ ཕྱི་ཟླ་ ༡ ཚེས་ ༥ རེས་གཟའ་མིག་དམར།
༄༅། ཕྱི་ལོ་ ༢༠༠༩ ཟླ་ ༡༢ ཚེས་ ༣༠ ཉིན་པཎ་ཆེན་སྐུ་ཕྲེང་བཅུ་པ་ཆེན་པོམཆོག་དགོངས་པ་གཞན་དོན་དུ་གཤེགས་ནས་ལོ་ཉི་ཤུ་འཁོར་བའི་རྗེེས་དྲན་གྱི་མཛད་སྒོར་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། ལྷ་དང་བཅས་པའི་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་༸གོང་ས་༸སྐྱབས་མགོན་༸རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་སྒོ་གསུམ་གུས་ཕྱག་སྔོན་དུ་བཏང་སྟེ།
དེ་རིང་འདིར་རྗེས་དྲན་དུ་ཕེབས་པའི་སྐྱབས་གནས་དགེ་འདུན་གྱི་སྡེ་དང་། བོད་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། གདན་ས་ཆེན་པོ་བཀྲ་ཤིས་ལྷུན་པོའི་མཁན་བླ་སློབ་དགེ་འདུན་དང་གཞན་ཡང་སེར་སྐྱ་མི་མང་། སློབ་ཕྲུག་བཅས་ཚང་མར་དེ་རིང་བྱེས་ཀྱི་གདན་ས་བཀྲིས་ལྷུན་པོས་པཎ་ཆེན་སྐུ་ཕྲེང་བཅུ་པ་དགོངས་པ་གཞན་དོན་དུ་གཤེགས་ནས་ལོ་ཉི་ཤུ་འཁོར་བའི་རྗེས་དྲན་དང་སྟབས་བསྟུན་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་དང་རྗེས་དྲན་གྱི་མཛད་སྒོ་གནང་བའི་ཐོག་བཙན་བྱོལ་བོད་གཞུང་བཀའ་ཤག་ངོས་ནས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གི་སྐུའི་གསང་བ་གསུམ་གྱི་མཛད་པ་འཕྲིན་ལས་རྗེས་སུ་དྲན་པའི་ངང་ནས་ཐུགས་ཀྱི་དགོངས་པ་ཡོངས་སུ་རྫོགས་པའི་གསོལ་འདེབས་སྨོན་ལམ་ཞུ་རྒྱུ་དང་། དེ་བཞིན་ཡང་སྲིད་མཆོག་སྤྲུལ་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་རིང་པོར་མ་ཐོག་པར་བཙོན་བཀྲོལ་ཐོབ་སྟེ་གོང་མའི་རྣམ་ཐར་བདག་གིར་སྐྱོང་ཐུབ་པའི་སྨོན་འདུན་དང་། དེ་རིང་འདིར་རྗེས་དྲན་གནང་བར་དགའ་བསུ་དང་འཚམས་འདྲི་ཞུ་གི་ཡོད། གོང་དུ་བཀྲ་ཤིས་ལྷུན་པོའི་མཁན་རིན་པོ་ཆེ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག་གིས་པཎ་ཆེན་སྐུ་གོང་མའི་མཛད་རྣམ་ཞིབ་ཅིང་རྒྱས་པ་སྙན་སྒྲོན་གནང་གྲུབ་པ་ཡིན་དུས་ངས་དེ་དག་བསྐྱར་ཟློས་བྱེད་དགོས་དོན་མེད། གོང་གི་གསུང་བཤད་ནང་ཡོད་པ་ལྟར་རེད། གནམ་ལ་ཉི་ཟླ་གཉིས་དང་། ས་ལ་༸རྒྱལ་དབང་པཎ་ཆེན། ཞེས་བོད་ཆོལ་གསུམ་ལ་གྲགས་པའི་ཁ་དཔེ་བཞིན་བོད་བརྒྱུད་ནང་བསྟན་གྱི་བསྟན་པའི་བདག་པོ་དང་བསྟན་པའི་མགྲིན་པ་ཆེན་པོ་རྣམ་པ་གཉིས་དུས་ཡུན་རིང་པོ་ཞིག་ནས་ཁ་བ་ཅན་གྱི་ལྗོངས་ལ་མཛད་པ་འཕྲིན་ལས་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་པ་དེའི་བཀའ་དྲིན་ལ་བརྟེན་ནས་ད་ལྟ་ཡང་བོད་ཀྱི་དབུས་པའི་རྒྱལ་ཁབ་མང་པོ་ཞིག་ནང་མདོ་སྔགས་ཟུང་འབྲེལ་གྱི་སངས་རྒྱས་ཀྱི་བསྟན་པ་རིན་པོ་ཆེ་མ་ནུབ་པར་གནས་ཐུབ་པ་དེ་དག་བསྟན་འཛིན་གྱི་སྐྱེས་བུ་དམ་པ་དེ་ཚོའི་བཀའ་དྲིན་ཡིན་པ་ནི་བརྗོད་མི་དགོས་པ་ཞིག་རེད། ལྷག་པར་བོད་གངས་ཅན་ལྗོངས་འདི་འཕགས་པ་སྤྱན་རས་གཟིགས་ཀྱི་འདུལ་ཞིང་དུ་སོང་བ་ཡིན་དུས་གོང་དུ་ཆེད་བརྗོད་སྐབས་ལ་གསུང་པ་བཞིན་རེད། བདེ་ལྡན་ཞིང་གི་མགོན་པོ་འོད་དཔག་མེད། སྲས་ཀྱི་ཐུ་བོ་འཕགས་མཆོག་སྤྱན་རས་གཟིགས། ཞེས་གསུང་པ་ལྟར་སྤྱན་རས་གཟིགས་ཀྱི་རིགས་ཀྱི་བདག་པོ་འོད་དཔག་མེད་དང་འོད་དཔག་མེད་ཀྱི་སྲས་ཀྱི་ཐུ་བོར་གྱུར་པ་འཕགས་མཆོག་སྤྱན་རས་གཟིགས་གཉིས་ཀྱིས་བོད་ཁམས་ཀྱི་འགྲོ་བ་ཡོངས་སུ་རྫོགས་པར་ཐོག་མར་ཐུགས་བསྐྱེད་ནས་བཟུང་ད་ལྟ་བར་བསྐྱངས་གནང་བ་ཞིག་རེད། བོད་གངས་ཅན་ལྗོངས་ལ་ཆོས་ཀྱི་རྒྱལ་པོ་རྒྱལ་བ་ཙོང་ཁ་པ་ཆེན་པོས་སངས་རྒྱས་ཀྱི་བསྟན་པ་སྤྱི་དང་ལྷག་པར་དམ་ཆོས་འདུལ་བའི་བསྟན་པ་ལ་དག་ཐེར་རྨད་དུ་བྱུང་བ་མཛད་ནས་རི་བོ་དགེ་ལྡན་པའི་བསྟན་པ་དར་ཁྱབ་བྱུང་རྗེས། བོད་ཀྱི་གདན་ས་ཆེན་པོ་བཞི་ཡི་ནང་ནས་གདན་ས་ཆེན་པོ་བཀྲིས་ལྷུན་པོ་དེ་དམིགས་བསལ་གྱི་གལ་གནད་ཆེ་བའི་གདན་ས་ཞིག་ཆགས་ཡོད། ༸རྒྱལ་བ་སྐུ་ཕྲེང་དང་པོ་ཐམས་ཅད་མཁྱེན་པ་དགེ་འདུན་གྲུབ་པ་མཆོག་གིས་བཀྲིས་ལྷུན་པོ་ཕྱག་བཏབ་ནས་དེ་རིང་བར་དུ་ལོ་ ༥༦༣ ཕྱིན་པ་རེད། དེའི་རིང་ལ་བསྟན་པའི་བྱ་བ་རླབས་ཆེན་མཛད་པ་དང་བསྟན་པ་འཛིན་པའི་སྐྱེ་བོ་གྲངས་ལས་འདས་པ་ཞིག་ཐོན་ཡོད།
རྗེས་ལ་བཀྲིས་ལྷུན་པོའི་གདན་ས་བསྐྱར་གསོ་གནང་སྟེ་ད་ལྟ་བཤད་སྒྲུབ་འཆད་ཉན་ཉམས་མེད་ཡོད་པ་དེ་ཧ་ཅང་གི་དགའ་བསུ་བྱེད་འོས་པའི་གནས་བབ་ཅིག་རེད། གོང་དུ་༸གོང་ས་༸སྐྱབས་མགོན་ཆེན་པོས་བརྟན་བཞུགས་སྐབས་བཀའ་སློབ་ཕེབས་པ་ལྟར་ཐམས་ཅན་མཁྱེན་པ་དགེ་འདུན་གྲུབ་པའི་ཡང་སྲིད་ཀྱིས་བཀྲིས་ལྷུན་པོའི་གདན་ས་འཛིན་སྐྱོང་མ་གནང་བ་ཡིན་ནའང་། པཎ་ཆེན་ཡེ་ཤེས་རྩེ་མོ་ནས་བརྒྱུད་དེ་པཎ་ཆེན་སྐུ་ཕྲེང་རིམ་བྱོན་གྱིས་བཀྲིས་ལྷུན་པོ་འཛིན་སྐྱོང་གནང་བར་བརྟེན་ནས་༸རྒྱལ་བ་ཡབ་སྲས་གཉིས་ཀྱིས་དབུས་གཙང་སོགས་ཁྱོན་ཡོངས་ལ་སངས་རྒྱས་བསྟན་པའི་མཛད་རྗེས་རླབས་པོ་ཆེ་གནང་བ་དེ་ང་ཚོ་ཚང་མའི་ཡིད་ལ་ཡོད་པ་མ་ཟད། ང་ཚོས་རྗེས་དྲན་ཞུ་འོས་པ་ཞིག་ཆགས་ཡོད། ལྷག་པར་པཎ་ཆེན་སྐུ་གོང་མ་སྐུ་ཕྲེང་བཅུ་པ་མཆོག་ཆབ་སྲིད་གནས་བབ་ཛ་དྲག་ཡོད་པའི་སྐབས་ལ་སྐུའི་སྐྱེ་བ་བཞེས་པའི་གནས་བབ་བྱུང་བ་ཡིན་དུས་འདས་པའི་ལོ་ལྔ་བཅུའི་རིང་གི་བོད་མི་རིགས་ཀྱི་བྱུང་རབས་ནང་ལ་རླབས་ཆེན་གྱི་མཛད་རྗེས་ཡོད་པའི་སྙིང་སྟོབས་ཅན་གྱི་སེམས་པ་ཆེན་པོ་གཞན་དང་མི་འདྲ་བ་ཞིག་ཕེབས་པ་དང་ཁོང་གི་སྐུ་ཚེའི་མཛད་འཕྲིན་ཡོངས་སུ་མ་གྲུབ་པའི་སྔོན་ནས་སྐུ་ན་གཞོན་དུས་ནས་དགོངས་པ་གཞན་དོན་དུ་གཤེགས་དགོས་རྒྱུ་དེ་དག་ཕྱོགས་གཅིག་ནས་བོད་སྤྱི་དོན་གྱི་བསོད་ནམས་ཀྱི་མ་ཁྱོག་པ་དང་།
ཕྱོགས་གཞན་ཞིག་ནས་སྐུ་སྲོག་བློས་གཏོང་གནང་བ་དེས་བོད་ཀྱི་སྐྱེ་འགྲོ་དང་རྒྱལ་བསྟན་ཆབ་སྲིད་ཀྱི་དོན་རླབས་ཆེན་ཞིག་ངེས་པར་དུ་བསྒྲུབས་ཡོད་པ་དེ་ད་ལྟ་ང་ཚོས་གསལ་པོ་ཤེས་ཀྱི་མེད་པ་ཡིན་ན་ཡང་འབྱུང་འགྱུར་བྱུང་རབས་ནང་རིམ་པས་གསལ་ཡོང་རྒྱུ་ཞིག་ལ་ང་ཚོས་ངོས་འཛིན་བྱེད་ཀྱི་ཡོད། དམ་པ་དང་དཔའ་བོ་སེམས་པ་ཆེན་པོ་དེ་ཉིད་ཀྱི་མཛད་རྗེས་མུ་མཐུད་བསྐྱང་རྒྱུ་དང་ལྷག་པར་དུ་སྐུ་ཕྲེང་བཅུ་བཞི་པ་ཆེན་པོ་མཆོག་མཛད་པ་འཕྲིན་ལས་རྒྱས་རྒྱུའི་ཆེད་ང་ཚོས་ཕྱོགས་ཀུན་ནས་འབད་པ་རླབས་ཆེན་བྱེད་དགོས་རྒྱུའི་གནས་སྐབས་ཛ་དྲག་ཅན་ཞིག་ལ་ཐུག་ཡོད། དེར་བརྟེན་བཙན་བྱོལ་བོད་གཞུང་ངོས་ནས་པཎ་ཆེན་ཡང་སྲིད་མཆོག་སྤྲུལ་རིན་པོ་ཆེ་མཆོག་རིང་མིན་རང་དབང་ཐོབ་རྒྱུར་རྒྱལ་སྤྱིའི་ནང་ཡིན་ནའང་རེད། བོད་པའི་སྤྱི་ཚོགས་ཡིན་ནའང་རེད་ཐབས་ཤེས་ཡོད་རྒུ་རྩལ་སྤྲུགས་ཞུས་དང་ཞུ་བཞིན་པ་རེད་ལ་ལྷག་པར་འབྲེལ་ཡོད་སྐྱོང་ཡུལ་བཀྲིས་ལྷུན་པོའི་གདན་ས་དང་། ཕྱོགས་མཚུངས་ལས་ཀྱི་བྱེད་པོ་ཚང་མས་དེའི་ཐོག་ལ་སྔར་ལས་ལྷག་པའི་ཤུགས་སྣོན་སྐྱོན་དགོས་རྒྱུའི་དུས་ཚོད་ངེས་ཅན་ཞིག་ལ་སླེབས་ཡོད་པ་ང་ཚོས་མཐོང་གི་ཡོད། དེར་བརྟེན་བོད་སྤྱི་དོན་བསོད་ནམས་ཀྱི་ཁྱོག་པ་ཡིན་ན་རིང་པོར་མི་ཐོག་པར་༸རྒྱལ་དབང་ཡབ་སྲས་གཉིས་ཞལ་འཛོམས་ཐུབ་པ་དང་། བོད་ཀྱི་བདེན་མཐའ་སེལ་ནས་གཞིས་བྱེས་བོད་མི་ཡོངས་རྫོགས་མཉམ་འདུས་ཀྱི་དགའ་སྟོན་ཡོང་རྒྱུར་ང་ཚོས་རེ་འདུན་དང་སྨོན་ལམ་ཞུ་གི་ཡོད། མཐའ་དོན་དེ་རིང་འདིར་མཛད་སྒོ་གནང་མཁན་དང་མཛད་སྒོར་ཕེབས་མཁན་ཡོངས་སུ་རྫོགས་པར་པཎ་ཆེན་སྐུ་ཕྲེང་བཅུ་པ་མཆོག་ལ་རྗེས་དྲན་དང་ཆབས་ཅིག་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་ཅིང་། པཎ་ཆེན་སྐུ་གོང་མའི་ཐུགས་བཞེད་ལྟར་མྱུར་དུ་ཁ་བ་ཅན་གྱི་ལྗོངས་སུ་༸ཞབས་སོར་འཁོད་ཐུབ་པའི་སྨོན་འདུན་ཞུ་གི་ཡོད། ཐུགས་རྗེ་ཆེ། ཞེས་གསུང་བཤད་གནང་ཡོད།
