༢༠༡༤ ཟླ་ ༡༢ ཚེས་ ༢༧ རེས་གཟའ་སྤེན་པ།
༄༅། །འདི་ག་ཕྱི་དྲིལ་བོད་ཡིག་ཚན་པའི་གསར་འགོད་པ་ངག་དབང་ཐོགས་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༡༢ ཚེས་ ༢༦ ཉིན་མོན་གྷོ་དགའ་ལྡན་བྱང་རྩེ་གྲྭ་ཚང་གི་འདུ་ཁང་ནང་༸གོང་ས་༸སྐྱབས་མགོན་ཆེན་པོ་མཆོག་གིས་བྱང་ཆུབ་ལམ་རིམ་ཆེན་མོའི་བཀའ་ཆོས་འཕྲོ་སྐྱོང་ཉིན་བཞི་པའི་སྔ་དྲོ་ཆུ་ཚོད་ ༩ ཡོལ་ཙམ་
ལ་བྲག་གཡབ་སྐྱབས་མགོན་བློ་ལྡན་ཤེས་རབ་རིན་པོ་ཆེ་མཆོག་གིས་དབུ་ཁྲིད་དེ་མདོ་ཁམས་བྲག་གཡབ་སེར་སྐྱ་མི་མང་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་ཡོད། དེ་ཡང་བརྟན་བཞུགས་འབུལ་ལམ་མ་ཞུས་སྔོན་ཙམ་ལ་འདི་གའི་གསར་འགོད་པས་བྲག་གཡབ་རིན་པོ་ཆེ་མཆོག་ལ་བརྟན་བཞུགས་དང་འབྲེལ་བའི་སྐོར་དྲི་བ་ཞུས་པར་ལན་འདེབས་གནང་དོན། འདི་ལོ་ཕྱི་ཟླ་བ་ལྔ་པའི་ཚེས་ ༢༩ ལ་བརྟན་བཞུགས་གོ་སྒྲིག་ཚོགས་ཆུང་བཙུགས་པ་རེད། འདིར་ཕྱི་རྒྱལ་དང་རྒྱ་བལ་འབྲུག་གསུམ་ནས་བྲག་གཡབ་མི་མང་ཁྱོན་མི་གྲངས་ ༨༠༠ མ་ཟིན་ཙམ་ཡོད། ཅེས་བཀའ་ལན་གནང་ཡོད།
དེ་ནས་གསར་འགོད་པས་བརྟན་བཞུགས་ཀྱི་ཆོ་ག་གང་ཡིན་སྐོར་གྱི་དྲི་བ་ཞུས་པར་ལན་འདེབས་གནང་དོན། སྤྱིར་བརྟན་བཞུགས་འདེགས་འབུལ་སྐབས་ཆོ་ག་འདྲ་མིན་ཡོད་ཀྱང་། ༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་མཛད་འཕྲིན་ཧ་ཅང་རྒྱས་པོ་ཡོད་སྟབས། སྐུ་མདུན་སྐུ་ངོ་མས་དགོངས་བཞེས་ལྟར་སྨོན་ལམ་གལ་ཆེ་བའི་རིགས་འགའ་ཤས་གསུང་རྒྱུ་མ་གཏོགས་ཆོ་ག་འདི་རེད་ཅེས་གང་ཡང་གནང་རྒྱུ་མ་རེད། འབུལ་མཚན་ལ་མཚོན་ན་བླ་མ་དགྱེས་པ་སྒྲུབ་པའི་མཆོད་པ། ཟེར་བ་ལྟར་༸རྒྱལ་བ་རིན་པོ་ཆེའི་བཀའ་གསུང་ཅི་སྒྲུབ་ཞུ་རྒྱུ་འདི་ང་ཚོའི་དམིགས་ཡུལ་གཙོ་བོ་དང་། ༸རྒྱལ་བ་རིན་པོ་ཆེའི་བཀའ་དྲིན་དྲན་པ་དང་། ཁོང་གི་གསང་གསུམ་གྱི་ཡོན་ཏན་ལ་ཡིད་ཆེས་དང་དད་པ་དེ་མ་རྩར་འཇོག་རྒྱུ་མཆོད་པའི་གཙོ་བོ་ཡིན། གཞན་ཡང་༸གོང་ས་མཆོག་གིས་ང་ཚོའི་བོད་བརྒྱུད་ནང་བསྟན་འདི་དཔལ་ནཱ་ལེནྡྲ་འི་ཆོས་བརྒྱུད་དྲི་མ་མེད་པ་ཞིག་ཡིན། ཞེས་དུས་རྟག་ཏུ་བཀའ་སྩལ་བཞིན་པ་ལྟར་དེའི་མཚོན་ཆེད་དུ་ནཱ་ལེནྡྲའི་པཎ་གྲུབ་བཅུ་བདུན་གྱི་སྐུ་འདྲ་ཞིག་རྒྱ་ནག་ལ་མངགས་ནས་དེ་རིང་འདིར་འབུལ་ལམ་ཞུ་རྒྱུ་ཡིན། སྐུ་བརྙན་དེ་དག་ང་ཚོ་བོད་མི་རང་གིས་ལག་བཟོ་བྱས་པ་དེ་འདྲ་རེད། ཅེས་ལན་འདེབས་གནང་ཡོད། དེ་རྗེས་བྲག་གཡབ་སྐྱབས་མགོན་རིན་པོ་ཆེ་མཆོག་གིས་ཐོག་མར་༸གོང་ས་༸སྐྱབས་མགོ
ན་ཆེན་པོ་མཆོག་ལ་མནྜལ་རྟེན་གསུམ་འདེགས་འབུལ་ཞུས།
དེ་ཡང་བརྟན་བཞུགས་བསྟར་འབུལ་མ་ཞུས་གོང་༸གོང་ས་མཆོག་གིས་བཀའ་སློབ་སྩལ་དོན། དེ་རིང་དུས་ཚོད་ཉུང་ཉུང་ཆགས་ཀྱི་འདུག་ཀྱང་འདིར་དད་པ་དམ་ཚིག་གཡོ་བ་མེད་པའི་ཐོག་ནས་འདུན་པ་རྩེ་གཅིག་པའི་སྒོ་ནས་ནས་བརྟན་བཞུགས་ཕུལ་དགོས་ཡོད་ཅེས་བརྗོད་མཁན་འགའ་ཤས་བྱུང་། དེ་རིང་འདིར་བྲག་གཡབ་མི་ཁོངས་ཚོའི་ཐོག་ནས་བརྟན་བཞུགས་གཅིག་འདི་ག་བྲག་གཡབ་རིན་པོ་ཆེས་དབུ་ཁྲིད་མཛད་ནས་གནང་རྒྱུ་རེད། བྲག་གཡབ་རིན་པོ་ཆེ་ཆུང་ཆུང་སྐབས་ནས་ལྷ་སའི་སྨོན་ལམ་གྱི་ཚོགས་མི་ཡིན་པ་ཡོད། སྐབས་དེ་དུས་ནས་ངོ་ཤེས་ཀྱི་ཡོད། འདིར་རྒྱ་གར་དུ་བསླེབས་ནས་རིན་པོ་ཆེས་ལས་འགན་རིམ་པར་འཁྱེར་ནས་ཧུར་ཐག་འབད་ཐག་བྱས་སོང་། བར་སྐབས་རིན་པོ་ཆེ་ཇར་མན་དུ་བཞུགས་ནས་གང་ཐུབ་ཀྱིས་བོད་ཀྱི་ཆོས་དང་རིག་གཞུང་ལ་དོ་སྣང་བྱེད་མཁན་ཚོར་ཁོང་ཚོའི་རེ་འདོད་བཀོང་རྒྱུ་དང་། བར་སྐབས་བོད་ཁང་གཅིག་བཙུགས་ནས་ཁ་སེང་ངོས་རང་དེར་ཕྱིན་པ་ཡིན། ཧུར་ཐག་འབད་ཐག་བྱས་པ་རེད། རྙོག་གྲ་གཅིག་རིན་པོ་ཆེ་ཐོག་མ་དོལ་རྒྱལ་བསྟེན་གྱི་ཡོད། ངོས་ནས་ཀྱང་བསྟེན་པ་རེད། ཕྱིས་སུ་ངོས་ཀྱིས་དེར་སྲེག་བཅད་བརྡར་གསུམ་གྱི་དཔྱད་པ་ཧ་ཅང་ཞིབ་ཚགས་པོ་བྱས་པ་ཡིན། ང་ཚོའི་དཔྱད་པ་གསུམ་གྱིས་དག་པ་ཟེར་བ་དེའི་ཐོག་ནས་བརྟག་དཔྱད་བྱས་རྗེས་དངོས་གནས་ཡིན་ལུགས་གང་འདྲ་ཡིན་མིན་ངོས་ཀྱིས་མར་གསལ་པོ་ཆགས་ཡོང་དུས་རིན་པོ་ཆེས་ཐེ་ཚོམ་སོམ་གཉིས་མེ་པར་ངོས་ཀྱིས་རྒྱུ་མཚན་ལྡན་པའི་སྒོ་ནས་རྒྱལ་བའི་དགོངས་པ་སྤྱི་དང་འཇམ་མགོན་བླ་མ་ཡབ་སྲས་ཀྱི་དགོངས་པ་དང་མཐུན་པའི་ལམ་སྟོན་བྱས་པ་དེར་རིན་པོ་ཆེས་ཤར་བསྐྱོད་གནང་ནས་ཧུར་ཐག་འབད་ཐག་གནང་སོང་། དེར་བརྟེན་རིན་པོ་ཆེར་དམིགས་བསལ་གྱི་ལྟ་སྐྱོང་བྱེད་དགོས་རྒྱུའི་འགན་ཞིག་ངོས་ལ་ཡོད། ཚུར་བརྒྱ་ཆ་བརྒྱ་ཐམ་པ་བློ་འགེལ་བྱས་ན་དེ་ལ་དཔགས་པ་ཕར་ལྟ་སྐྱོང་བྱེད་དགོས་ཀྱི་རེད། དེར་བརྟེན་དེ་རིང་བྲག་གཡབ་བརྟན་བཞུགས་འདི་གཞན་དང་མ་བསྲེས་བར་བྲག་གཡབ་པ་ཚོ་ཁེ་གཙང་བྱས་ནས་དགོས་ཀྱི་ཡོད། ཅེས་གསུངས་འདུག དུས་ཚོད་ཆ་ནས་བརྟན་བཞུགས་གཞན་དང་ཟླ་སྒྲིལ་གཏོང་དགོས་པ་ཞིག་འདུག་ཀྱང་མ་ཡིན་དགུ་ཡིན་བྱས་ནས་དེ་འགྲིག་གི་རེད་བྱས་པ་ཡིན། ཞེས་ཞལ་ཤོབ་ཀྱི་ཚུལ་དུ་བཀའ་སློབ་མཇུག་བསྡོམས་མཛད་རྗེས་བརྟན་བཞུགས་བསྟར་འབུལ་འགོ་འཛུགས་གནང་སྟེ་བྲག་གཡབ་སེར་སྐྱ་མང་ཚོགས་ཀྱི་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་དུ་བརྟན་པའི་བརྟན་བཞུགས་བསྟར་འབུལ་ཞུས་སོང་།།
