༢༠༡༠ ཕྱི་ཟླ་ ༡ ཚེས་ ༢ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་བ་ ༡ ཚེས་ ༡ ཉིན་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དང་རྒྱ་གར་མངའ་སྡེ་གུ་ཇུ་ར་ཊིའི་ཕྱོགས་སུ་བཞུགས་སྒར་ནས་ཆིབས་སྒྱུར་སྐྱོང་སྐབས་དད་ལྡན་མི་མང་རྣམས་ཀྱིས་ལག་ཏུ་བདུག་སྤོས་དང་དཀར་གཙང་མཇལ་དར་ཐོགས་ཏེ་ཕེབས་སྐྱེལ་གཟབ་རྒྱས་ཞུས་ཡོད།
ཕྱི་ཚེས་ ༣ ཉིན་མགོན་པོ་གང་ཉིད་མཆོག་གུ་ཇུ་ར་ཊིའི་མངའ་སྡེའི་ནང་གཅེར་བུ་བའི་གནས་ཆེན་གྲོང་ཁྱེར་པ་ལི་ཏཱ་ན་ཞེས་པ་དེར་གཅེར་བུ་བའི་མཁས་དབང་དང་ལྷན་ཞུགས་ཀྱིས་ཚོགས་འདུར་ཆིབས་སྒྱུར་བཀྲིན་བསྐྱང་གནང་མཛད་རྒྱུ་དང་དེ་རྗེས་༸གོང་ས་མཆོག་གནས་མཆོག་རྡོ་རྗེ་གདན་དུ་ཆིབས་སྒྱུར་བསྐྱང་སྟེ་ཕྱི་ཚེས་ ༥ ནས་ ༨ བར་ཉིན་གྲངས་བཞིའི་རིང་དད་ལྡན་ཆོས་ཞུ་བ་ཚོར་དཔལ་མགོན་ཀླུ་སྒྲུབ་ཀྱིས་མཛད་པའི་འཇིག་རྟེན་ལས་འདས་པའི་བསྟོད་པ་དང་།
ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་སྒྲོན། ཀུན་མཁྱེན་ཀླློང་ཆེན་རབ་འབྱམས་པས་མཛད་པའི་སེམས་ཉིད་ངལ་གསོ། རྗེ་ཙོང་ཁ་པ་ཆེན་པོས་མཛད་པའི་ལམ་རིམ་བསྡུས་དོན་བཅས་ཀྱི་གསུང་ཆོས་བཀའ་སློབ་བཀའ་དྲིན་བསྐྱང་གནང་མཛད་རྒྱུ་ཡིན་པ་དང་། ཕྱི་ཚེས་ ༩ སྔ་དྲོ་ཚེ་དབང་བཀའ་དྲིན་སྩལ་གནང་མཛད་རྒྱུ་དང་། དེ་བཞིན་དད་ལྡན་ཆོས་ཞུ་བ་རྣམས་ཀྱིས་༸གོང་ས་མཆོག་ལ་བརྟན་བཞུགས་འདེགས་འབུལ་ཞུ་རྒྱུ་ཡིན་པ་བཅས་ཀྱི་གནས་བསྡུས་སུ།།
