༢༠༡༤ ཟླ་ ༡༢ ཚེས་ ༥ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༤ ཉིན་གྱི་སྔ་དྲོ་ཆུ་ཚོད་ ༡༡ ཡོལ་ཙམ་ལ་རྡ་ས་མེག་གྷན་བོད་ཀྱི་གསོལ་མགྲོན་ཁང་དུ་བོད་རིགས་གཞས་པ་དང་ཁབ་གཙགས་རི་མོ་བ་རྟ་མགྲིན་ཚེ་བརྟན་ལགས་ཀྱི་༼ཡངས་པའི་ལམ།༽ ཞེས་པའི་ཆེད་སྒྲིག་བརྙན་འཁོར་གཉིས་པ་དེ་བོད་མི་མང་སྤྱི་འཐུས་ཚོགས་གཙོ་མཆོག་གིས་དབུ་འབྱེད་གནང་འདུག
དེ་ཡང་བརྙན་འཁོར་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་། བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་སྤྲོ་ཚིགས་ཆོས་གྲགས་ལགས། དེ་བཞིན་རྡ་ས་ཁུལ་གྱི་བོད་རིགས་གཞས་པ་གཞས་མ་ཁག་གཅིག གསར་འགོད་པ་བཅས་འདུ་འཛོམས་ཀྱིས་ཐོག་མར་དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་ཟུར་པ་རྨེའུ་དཀོན་རྒྱམ་ལགས་ཀྱིས་སྒྱུ་རྩལ་བ་རྟ་མགྲིན་ཚེ་བརྟན་ལགས་ངོ་སྤྲོད་དང་འབྲེལ་གསུང་བཤད་གནང་། དེ་རྗེས་སྐུ་མགྲོན་གཙོ་བོ་མཆོག་གིས་བརྙན་འཁོར་དབུ་འབྱེད་གནང་རྗེས་སྒྱུ་རྩལ་བ་རྟ་མགྲིན་ལགས་ཀྱིས་ཁོང་རང་གི་ཆེད་སྒྲིག་བརྙན་འཁོར་དང་འབྲེལ་བའི་སྐོར་གསུང་བཤད་གནང་། དེ་རྗེས་སྤྲོ་ཚིགས་ཆོས་གྲགས་ལགས་དང་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་རྣམ་གཉིས་ཀྱིས་གསུང་བཤད་གནང་གྲུབ་མཚམས། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་དོན།
ཁྱེད་རང་དང་ཁྱེད་རང་འདྲ་བའི་གང་ཟག་ག་ཚོད་མང་བ་ཡོད་ན་དེ་ཙམ་གྱིས་ང་ཚོའི་རྩ་དོན་ལ་ཕན་གྱི་འདུག ལྷག་པར་གཞས་ཀྱི་སྒྱུ་རྩལ་འདིའི་ཐོག་ནས་གཞོན་སྐྱེས་མང་པོ་ཞིག་གི་བསམ་བློར་འགྱུར་བ་གཏོང་ཐུབ་པའི་གནས་བབ་ཅིག་ཆགས་ཀྱི་འདུག སྤྱི་ཡོངས་ཀྱི་གནས་སྟངས་ལ་ལྟ་སྐབས། ང་ཚོ་ཚོགས་འདུ་སྐོང་འཚོགས་གནང་སྐབས་ཚོགས་འདུར་ཡོང་མཁན་ལོ་ན་རྒན་པ་རྐྱང་རྐྱང་མ་གཏོགས་གཞོན་སྐྱེས་དེ་ཙམ་ཡོང་མཁན་མེད། གཞས་ཟེར་དུས་རང་བཞིན་གྱིས་གཞོན་སྐྱེས་ཧ་ཅང་མང་པོ་ཞིག་ཡོང་གི་ཡོད་སྟབས། གཞས་ཀྱི་ནང་ཆབ་སྲིད་དང་འབྲེལ་བ་ཡིན་ན་རང་བཞིན་གྱིས་གཞས་ཚིག་ལ་བསམ་བློ་གཏོང་དགོས་པའི་གནས་སྟངས་ཤིག་ཆགས་ཀྱི་ཡོད་པར་བརྟེན། གཞས་ཀྱི་བརྒྱུད་ལམ་དེ་ཡང་ཕན་ཐོགས་ཆེན་པོ་ཞེ་དྲག་ཅིག་ཆགས་ཀྱི་ཡོད།
ང་ཚོའི་སྤྱི་ཚོགས་ནང་ལས་འགུལ་ལ་རྣམ་གྲངས་མང་པོ་ཡོད། ཁག་གཅིག་གི་བསམ་བློའི་ནང་ལས་འགུལ་ཟེར་དུས་ལམ་ཀར་ཐོན་ནས་སྐད་རྒྱག་པ་གཅིག་པུ་ཙམ་མ་གཏོགས་གཞན་པ་དེ་ཚོ་ལས་འགུལ་དུ་བརྩིས་ཀྱི་མེད། འོན་ཀྱང་ཆབ་སྲིད་དང་འབྲེལ་བའི་གཞས་ཚིག་རྩོམ་པ་དང་གཏོང་བ་སོགས་ནི། ལས་འགུལ་གྱི་ནང་ནས་གལ་ཆེ་ཤོས་ཤིག་དང་ནུས་པ་ཆེ་ཤོས་ཤིག་ལ་ངོས་འཛིན་ཞུ་བཞིན་ཡོད་སྟབས། མུ་མཐུད་དེ་བོད་དོན་དང་འབྲེལ་བའི་ལས་འགུལ་འདི་རིགས་སྤེལ་རོགས་གནང་ཞུ་རྒྱུ་དང་། ང་ཚོ་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཁྱེད་རང་གིས་ད་ལྟ་བར་དུ་བོད་དོན་ཆེད་ཕྱག་ལས་གང་གནང་བཞག་པ་དང་གང་གནང་བཞིན་པ། མ་འོངས་གནང་འཆར་ག་རེ་ཡོད་པ་ཚང་མར་ཡི་རང་བསྔགས་བརྗོད་ཞུ་བཞིན་ཡོད། ཅེས་སོགས་ཀྱི་གསུང་བཤད་གནང་འདུག
