༢༠༡༤ ཟླ་ ༡༢ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུད་སྟོད་གྲྭ་ཚང་དུ་འཇམ་མགོན་བླ་མ་ཙོང་ཁ་པ་ཆེན་པོས་འགྲེལ་པ་བཞི་སྦྲགས་ལྗགས་རྩོམ་མཛད་ནས་ལོ་ངོ་ ༦༠༠ འཁོར་བའི་རྗེས་དྲན་དང་འབྲེལ། སྔགས་ཀྱི་མཁས་པའི་བགྲོ་གླེང་གི་ཚོགས་མགོན་དུ་ཆིབས་སྒྱུར་གྱིས་བཀའ་སློབ་ཟབ་རྒྱས་སྩལ་ཡོད།
དེ་ཡང་ཐོག་མར་༸གོང་ས་མཆོག་གིས་ཚོགས་བཅར་བ་ཡོངས་ལ་འཚམས་འདྲི་དང་སྦྲགས་བཀའ་སློབ་སྩལ་དོན། ད་ལྟ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེས་གསུང་བཤད་གནང་བ་བཞིན་སངས་རྒྱས་བཅོམ་ལྡན་འདས་ཀྱི་བསྟན་པ་འདི་ལོ་ ༢༦༠༠ ལྷག་འགྲོ་བཞིན་ཡོད། དེའི་རིང་སངས་རྒྱས་ཀྱི་བསྟན་པ་དེ་རྒྱ་གར་འཕགས་པའི་ཡུལ་ལ་ཆ་བཞག་ན་དར་རྒུད་མང་པོ་བྱུང་ཡོད། དུས་ད་ལྟ་སྟག་ཤཱ་ཤི་ལ་དང་ནཱ་ལེནྡྲ། བི་ཀར་མ་ཤཱི་ལ་གྱང་གོག་མ་གཏོགས་གང་ཡང་མེད། བསྟན་པ་རྒྱ་ནག་ནས་མར་ཐེག་པ་ཆེན་པོ་སྔགས་དང་བཅས་པ་ཆོས་བརྒྱུད་དང་། འབར་མ་དང་ཐེ་ལན་ལ་སོགས་པའི་ནང་ལོ་སྟོང་ཕྲག་རིང་ནས་པཱ་ལིའི་ཆོས་བརྒྱུད་གཙོ་བོ་བྱས་ཡོད། བསྟན་པར་སྐབས་རེ་དར་རྒུད་ཡོང་གི་ཡོད་ཀྱང་བསྟན་པའི་མ་རྩ་བསྡད་ཡོད། དཔལ་ནཱ་ལེནྡྲའི་ཆོས་བརྒྱུད་འཛིན་མཁན་གཅིག་པུའི་ནང་ཀླུ་སྒྲུབ་ཡབ་སྲས་དང་། ཐོགས་མེད་སྐུ་མཆེད་དེ་ལྟ་བུའི་ཟབ་པ་དང་རྒྱ་ཆེ་བའི་གཞུང་དོན་རྣམས་ཚད་མ་རིག་པའི་སྒོ་ནས་གཏན་ལ་ཕབ་རྒྱུ་དང་། དེ་ནས་ཚད་མའི་གཞུང་ནི་སློབ་དཔོན་ཕྱོགས་གླང་དང་ཆོས་གྲགས། རྗེས་སུ་མཁན་ཆེན་ཞི་བ་འཚོ་དང་ཀ་མ་ལ་ཤི་ལ་དེ་དག་གིས་རིག་པའི་ལམ་ནས་ཟབ་པ་དང་རྒྱ་ཆེ་བའི་ལམ་གཏན་ལ་ཕབ་རྒྱུ་དེ་ཕལ་ཆེར་བོད་ཁོ་ན་མ་གཏོགས་མེད། དེང་སང་འཛམ་གླིང་འདིའི་ཐོག་ནང་པ་དུང་ཕྱུར་བཅུ་གྲངས་ཙམ་ཡོད་ཁོངས་ནས་དཔལ་ནཱ་ལེནྡྲའི་མཁས་པའི་དབང་པོ་རྣམས་ཀྱིས་མཛད་པའི་གཞུང་དེ་དག་ལ་ཐོས་བསམ་སློབ་གཉེར་ལོ་ཉི་ཤུ་སུམ་ཅུ་གནང་སྟེ། དེ་ལྟ་བུའི་བསྟན་པ་འཛིན་མཁན་དེ་ཡང་ཕལ་ཆེར་བོད་གཅིག་པུ་མ་གཏོགས་མེད།
ང་ཚོའི་བོད་ལ་ཆ་བཞག་ན་བོད་མི་ཡ་ས་དྲུག་ཡོད་པས་ཆོས་ལ་དད་པ་བྱེད་ཀྱི་ཡོད། འོན་ཀྱང་དད་པ་བྱེད་སའི་ཆོས་ཤེས་སྟངས་དེ་ཆོས་ལ་སློབ་སྦྱོང་བྱས་ནས་ཤེས་དགོས་པ་རེད་མ་གཏོགས། སོ་སོའི་ཁྱིམ་ཚང་ནང་མཆོད་གཤོམས་དང་ཡོན་ཆབ་ཕུལ་བ་དེ་འདྲ་ཞིག་གི་ཐོག་ནས་སངས་རྒྱས་ཀྱི་ཆོས་དེ་ཁྱད་དུ་འཕགས་པ་དང་ཐུན་མོང་མ་ཡིན་པ་ཞིག་ཡིན་པ་ཤེས་རྒྱུ་ཁག་པོ་རེད། ང་རང་ཚོས་སངས་རྒྱས་ལ་སྐྱབས་སུ་མཆིའོ་ཞེས་བརྗོད་ཀྱི་ཡོད་ཀྱང་། སྟོན་པ་དང་བསྟན་པའི་ཁྱད་པར་ངོ་ཐོག་ཏུ་ཤེས་མཁན་ང་ཚོའི་བོད་པའི་ནང་ཆོས་ཐོག་སློབ་གཉེར་བྱེད་མཁན་ཚོས་ཤེས་ཀྱི་རེད་མ་གཏོགས་གཞན་ཁག་པོ་རེད། ང་ཚོ་སངས་རྒྱས་པའི་ཆོས་པ་ཞིག་ཡིན་པའི་ངོས་ནས་བཤད་ན་བོད་གངས་ཅན་གྱི་ལྗོངས་ལ་ཡོད་པའི་སངས་རྒྱས་ཀྱི་བསྟན་པ་འདི་ཡོངས་སུ་རྫོགས་པ་རིག་པའི་ལམ་ནས་གཏན་ལ་ཕབ་ཐུབ་རྒྱུ་ཞིག་ཡོད། ངའི་བླ་མས་གསུངས་ཀྱི་འདུག་ཅེས་བརྗོད་པ་ཁོ་ན་མིན་པར་རིག་པའི་ལམ་ནས་བློ་སྟོབས་ཀྱི་སྒོ་ནས་ཤོད་རྒྱུད་ཡོད་པ་ཞིག་དགོས། སངས་རྒྱས་པའི་ཆོས་དེ་རིག་པའི་ལམ་ནས་གཏན་ལ་ཕབ་རྒྱུ་ཡོད་སྟབས་དེ་རིང་སང་ཚན་རིག་པ་ཚོས་ཧ་ཅང་དོ་སྣང་བྱེད་ཀྱི་འདུག ཚན་རིག་པ་སྙན་གྲགས་ཅན་དེ་འདྲས་སངས་རྒྱས་པའི་ཆོས་དེ་ཚན་རིག་གི་སྡེ་ཚན་གཅིག་དང་ཚན་རིག་དང་མཐུན་པ་ཞིག་རེད་འདུག་ཅེས་གསུངས་ཀྱི་འདུག དེ་ལྟ་བུའི་ཐོག་ནས་ཚང་མས་ཡིད་འཕྲོག་སའི་ཆོས་བརྒྱུད་ཅིག་ཆགས་ཡོད།
ངོས་ཀྱིས་ནང་པའི་ཆོས་དེ་ཆོས་གཞན་དག་ལས་ཡག་གི་རེད་ནམ་ཡང་ཟེར་གྱི་མེད། ཡག་ཉེས་ཟེར་བ་དེ་སོ་སོར་ཕན་ཐོགས་ཡོད་མེད་ལ་བསམ་བློ་གཏོང་དགོས་པ་རེད། སྨན་གཅིག་ཡར་བླངས་ཏེ་དེ་ཡག་ཤོས་རེད་ཅེས་བརྗོད་ཤེས་ཀྱི་མ་རེད། ན་ཚ་འགའ་ཤས་ལ་སྨན་ཡག་ཤོས་རེད་ཟེར་རྒྱུ་དེས་ནད་ཁག་གཅིག་ལ་གནོད་སྲིད་པ་ཞིག་ཡིན་སྟབས། ནད་པའི་གནས་སྟངས་ལ་གཞིགས་ནས་སྨན་དེ་ཡག་ཤོས་རེད་ཅེས་བརྗོད་དགོས་ཀྱི་རེད། དེར་བརྟེན་ང་ཚོས་སེམས་ཅན་གྱི་ནང་ཁམས་དང་མོས་པ་སྣ་ཚོགས་ཡོད་པའི་ནང་། ཁམས་དང་མོས་པ་ཇི་འདྲ་བ་ཞིག་གི་དོན་ལ་འཚམ་པའི་ཆོས་དེ་དེར་རན་པོ་ཆགས་ཡོད། དེར་བརྟེན་འཛམ་གླིང་འདིའི་ནང་དུ་ནང་པའི་ཆོས་དེ་ཆོས་ཚང་མའི་ནང་ནས་ཡག་ཤོས་རེད་ནམ་ཡང་བརྗོད་ཀྱི་མེད་ལ་བརྗོད་ཐུབ་ཐབས་ཀྱང་མེད། འོན་ཀྱང་ལྟ་གྲུབ་ཀྱི་ཐོག་ནས་ཤོད་སྐབས་ནང་པའི་ཆོས་དེ་རྒྱས་ཤོས་དང་ཟབ་ཤོས་རེད་ཅེས་བརྗོད་ཀྱི་ཡོད། རྒྱུ་མཚན་གཅིག་ནས་གཉིས་བགྲང་སྟེ་བཤད་རྒྱུ་ཡོད་པ་དེ་ནི་ནང་པའི་ཆོས་དེ་གཙོ་བོ་ཆགས་འདུག
ང་རང་ཚོའི་བོད་སྐད་ཀྱི་ནང་བཀའ་འགྱུར་བསྟན་འགྱུར་པོ་ཏི་ ༣༠༠ ལྷག་ཅིག་ཡོད་པའི་ཁྲོད་ནས་རྒྱ་ནག་ནས་བསྒྱུར་བའི་པོ་ཏི་ ༡༠ ལྷག་ཙམ་མ་གཏོགས་གཞན་མང་ཆེ་བ་རྒྱ་གར་ནས་བསྒྱུར་བ་ཤ་སྟག་རེད། དེང་སྐབས་ནང་ཆོས་སྤྱི་དང་ལྷག་པར་དཔལ་ནཱ་ལེནྡྲའི་མཁས་པ་ཚོས་མཛད་པའི་གཞུང་གི་འགྲེལ་བཤད་རྒྱག་དགོས་བྱུང་ཚེ་བོད་ཡིག་ལས་ལྷག་པ་གཅིག་ཀྱང་མེད། དེར་བརྟེན་ཆོས་ཀྱི་གནས་ཚུལ་ཐོག་ནས་བཤད་ན་ང་ཚོ་བོད་ལ་ཡོད་པའི་སངས་རྒྱས་པའི་ཆོས་དེ་ཆ་ཚང་བ་ཞིག་ཆགས་ཡོད། ཀླུ་སྒྲུབ་ཡབ་སྲས་དང་། ཕྱོགས་གླང་། ཆོས་གྲགས། ཐོགས་མེད་སྐུ་མཆེད་ཚོ་ད་ལྟ་འཛམ་གླིང་འདིའི་སྟེང་ཕེབས་ན་ང་ཚོ་བོད་པ་ཚོར་ལག་ཁྱེར་ཨང་དང་པོ་དེ་གནང་གི་རེད་སྙམ་གྱི་འདུག ང་ཚོ་བོད་པ་ཚོར་ཡོད་པའི་སངས་རྒྱས་པའི་ཆོས་ཡོད་པ་དེ་དངོས་གནས་སྤུས་དག་ཅིག་རེད་འདུག འདི་ནི་ང་ཚོ་མི་རིགས་ཀྱི་ཆ་ནས་མི་རིགས་ལོགས་སུ་ཕྱེ་ཐུབ་པ་དང་། མཐོང་བསླེབ་རྒྱུ་ལྟ་བུར་མཚོན་ནའང་སངས་རྒྱས་པའི་ཆོས་ཀྱི་ཧ་ཅང་ཕན་ཐོགས་ཡོང་གི་ཡོད། བོད་མི་རིགས་ཀྱི་སེམས་རྒྱུད་ལ་ཆ་བཞག་ནའང་དུས་ད་ལྟ་བར་དུས་རབས་༧།༨།༩ རྗེས་བོད་སིལ་བུར་འཐོར་བའི་རྗེས་ང་ཚོས་ཆབ་སྲིད་ཀྱི་ཐོག་ནས་ཆིག་སྒྲིལ་མེད་པའི་རྐྱེན་གྱིས་འཐུས་ཤོར་ཧ་ལས་པ་ཕྱིན་ཡོད། ལུང་པ་རེ་རེར་དཔོན་ཆུང་རེ་རེ་དང་བླ་མ་རེ་རེ་བྱུང་ཡོད། འོན་ཀྱང་བོད་ཆོལ་ཁ་གསུམ་ཙམ་མ་ཟད། མངའ་རིས་ནས་སོག་པོ་ཕྱི་ནང་བར་དུ་བོད་གངས་ཅན་གྱི་ལྗོངས་ལ་ཡོད་པའི་སངས་རྒྱས་པའི་ཆོས་དཔལ་ནཱ་ལེནྡྲའི་ཆོས་བརྒྱུད་དེ་ཁྱབ་སྟེ་མི་རིགས་རང་འཚོ་བཟུང་ཐུབ་པ་ཡོང་རྒྱུ་དེ་སངས་རྒྱས་པའི་ཆོས་ལས་བྱུང་བ་ཞིག་ཡིན། མ་འོངས་པར་སངས་རྒྱས་པའི་ཆོས་ཞེས་པ་དེ་སློབ་སྦྱོང་བྱས་པའི་ཐོག་ནས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་དགོས་ཀྱི་རེད་མ་གཏོགས་ལམ་དང་ལུགས་སྲོལ་གྱི་ཐོག་ནས་བྱེད་ཐུབ་རྒྱུ་མེད། དེར་བརྟེན་སངས་རྒྱས་པའི་ཆོས་དེ་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུར་ང་ཚོ་བོད་རིགས་སྐྱ་སེར་ཕོ་མོ་དབྱེ་བ་མེད་པས་སློབ་སྦྱོང་བྱས་ཏེ་སེམས་ལ་ངེས་པ་བརྙེད་ནས་བསྟན་པར་ཤེས་ཏེ་དེར་དད་པ་ཐོབ་པ་ཞིག་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད།
གོང་དུ་ཆོས་རིག་བཀའ་བློན་གྱིས་གསུངས་པ་ལྟར་ང་ཚོ་བཙན་བྱོལ་ལ་བསླེབས་པའི་རྗེས་དཔེར་ན་བཙུན་མ་ཚུན་ཆད་དགེ་བཤེས་མ་འཐོན་རྒྱུ་ལྟ་བུ་ཆགས་ཡོད། སྔ་མོ་བོད་ཀྱི་དགོན་པ་རིགས་གཅིག་གིས་སྔགས་པ་གྲྭ་ཚང་གིས་སྔགས་ཆོག་འདོན་རྒྱུ་མ་གཏོགས་གཞུང་ཆེན་བལྟ་རྒྱུ་མེད་པ་དེ་འདྲའི་རིགས་ཤིག་ཡོང་གི་ཡོད། ང་ཚོ་རྒྱ་གར་ལ་འབྱོར་རྗེས་འདི་གའི་རྣམ་རྒྱལ་གྲྭ་ཚང་ནང་གཞུང་ཆེན་བལྟ་རྒྱུ་འགོ་བཙུགས་ཡོད། རྒྱུད་གྲྭ་སྟོ་སྨད་ནས་རྒྱུད་གཞུང་གིས་མཚོན་དཔེ་ཆ་མང་པོ་ཞིག་ལྟ་དགོས་པའི་སྒང་གཞུང་ཆེན་དང་མཚན་ཉིད་ལྟོས་ཨང་ཞེས་ངོས་ནས་འབོད་སྐུལ་བྱས་པ་ལྟར། ཁྱེད་རང་ཚོས་ཧུར་ཐག་འབད་ཐག་དཔེ་ཆ་བལྟས་ནས་ད་ཆ་ཚིག་ཁ་ནས་འདོན་རྒྱུ་ཡོད་པ་ཙམ་མ་ཟད། དོན་གྱི་ཐོག་བསམ་བློ་གཏོང་རྒྱུ་ཡོད་པ་ཞིག་ཆགས་ཡོད། དེར་བརྟེན་བར་སྐབས་ང་ཚོ་ཡར་རྒྱས་གང་ཙམ་ཕྱིན་ཡོད་ཀྱང་ད་དུང་མུ་མཐུད་འབད་བརྩོན་བྱེད་རྒྱུ་ཧ་ཅང་གལ་ཆེན་པོ་རེད། ང་ཚོའི་སློབ་གྲྭ་ཁག་གི་ནང་ཆོས་དགེ་ཡོད་པ་ཚོས་ལས་འགན་ཞལ་འདོན་བསླབ་རྒྱུ་མིན་པར། ཆོས་དགེ་ཚོས་སངས་རྒྱས་ཀྱི་ཆོས་ངོ་སྤྲོད་གནང་དགོས། དེ་ལྟ་བུའི་སངས་རྒྱས་པའི་ཆོས་ངོ་སྤྲོད་བྱེད་ཡོང་དུས་སངས་རྒྱས་ཀྱི་ཆོས་དེ་ཐར་པ་ཐོབ་ཆེད་ཡིན། ཐར་པ་ཞེས་པ་དེ་སེམས་ཀྱི་གཏིང་ནས་བསྒྲུབ་དགོས་པ་དང་། ཐར་པ་དེ་ཡང་སེམས་ཀྱི་ཆོས་ཉིད་སྟེང་ནས་འཇོག་དགོས་ཀྱི་ཡོད། དེར་བརྟེན་སེམས་ཀྱི་རྣམ་གཞག་ཤེས་རྒྱུ་ཧ་ཅང་གལ་ཆེན་པོ་ཆགས་ཡོད། སངས་རྒྱས་པའི་ཆོས་ཀྱི་ནང་སེམས་ཁམས་རིག་པའི་སྐོར་ཧ་ཅང་རྒྱས་པོ་ཐོན་ཡོང་གི་ཡོད། གང་ལ་ཞེ་ན། སེམས་དུལ་དགོས་ཀྱི་ཡོད། བདེ་སྐྱིད་དེ་ཡང་ཤེས་རབ་ཀྱི་ཐོག་ནས་ཡོང་དགོས་ཀྱི་ཡོད་སྟབས་དེ་ཡང་སེམས་སམ་བློ་ཞིག་རེད། ཅེས་སོགས་ཀྱི་བཀའ་སློབ་སྩལ།།
