༢༠༡༤ ཟླ་ ༡༡ ཚེས་ ༡༨ རེས་གཟའ་མིག་དམར།
༄༅། །འདི་གར་ཆེད་གཉེར་གསར་འགོད་པ་རྣམ་རྒྱལ་ཚེ་དབང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༡༡ ཚེས་ ༡༧ ཉིན་རྒྱ་གར་གྱི་རྒྱལ་ས་ལྡི་ལིའི་ནང་རྒྱ་གར་དབུས་གཞུང་ནང་སྲིད་ལས་ཁུངས་ཀྱི་གོ་སྒྲིག་འོག་བཙན་བྱོལ་བོད་མིའི་གཞིས་ཆགས་ཁག་གི་ས་གནས་འགོ་འཛིན་དང་བཟོ་ཚོགས་ཁག་གི་འགན་འཛིན་རྣམ་པ། དེ་བཞིན་དགོན་སྡེ་ཁག་གི་འབྲེལ་ཡོད་སྐུ་ཚབ་བཅས་ལ་ཉེ་ཆར་རྒྱ་གར་གཞུང་གིས་གསལ་བསྒྲགས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པའི་སྲིད་བྱུས་གཏན་འབེབས་གནང་བ་དེའི་སྐོར་ཟབ་སྦྱོང་ཞིག་ཕུལ་འདུག
ཟབ་སྦྱོང་ཐོག་རྒྱ་གར་ནང་སྲིད་ལས་ཁུངས་ཀྱི་ཁྱབ་ཁོངས་རྒྱལ་ཡོངས་མངའ་སྡེའི་ལས་ཁུངས་ཀྱི་བློན་ཆེན་སྐུ་ཞབས་ཀེ་རན་རི་ཇི་ཇུ (Kiren Rijiju) མཆོག་དང་། རྒྱ་གར་ནང་སྲིད་ལས་ཁུངས་ཀྱི་ཟུང་དྲུང་ཁག་གཉིས་དང་རྒྱ་གར་གཞུང་གི་ཕྱི་འབྲེལ་ལས་ཁུངས་བཅས་ནས་འབྲེལ་ཡོད་ལས་བྱེད། དེ་བཞིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་། ལྡི་ལི་དོན་གཅོད་བཀའ་ཟུར་བསྟན་པ་ཚེ་རིང་མཆོག ཕྱོགས་བཞུགས་སྤྱི་འཐུས་ཆོས་སྐྱོང་དབང་ཕྱུག་ལགས་དང། དབུ་དཀར་ཚང་གཡུ་སྒྲོན་ལགས། ཚེ་རིང་གཡུ་སྒྲོན་ལགས། འཇིགས་མེད་འབྱུང་གནས་ལགས་བཅས་ཕེབས་གནང་ཡོད།
ཟབ་སྦྱོང་ཐོག་བཙན་བྱོལ་བོད་མིའི་གནས་ཡུལ་མངའ་སྡེ་སོ་སོའི་འབྲེལ་ཡོད་རྒྱ་གར་གཞུང་གི་ལས་ཁུངས་ཁག་གི་སྐུ་ཚབ་ཁག་བཅས་ཀྱང་ཕེབས་འདུག སྐབས་དེར་སྐུ་ཞབས་ཀེ་རན་རི་ཇི་ཇུ་མཆོག་གིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པ་འདི་གཏན་འབེབས་བྱེད་ཐུབ་པར་དགའ་འཚོར་ཆེན་པོ་བྱུང་ཞེས་དང་། སྲིད་བྱུས་འདི་དེ་འདྲ་ཞིག་གཏན་འབེབས་ཡོང་བར་ད་བར་ཁོང་ཉིད་མཆོག་ནས་གང་ཐུབ་འབད་བརྩོན་ཞུས་པ་དང་། སྲིད་བྱུས་དེ་བརྒྱུད་བཙན་བྱོལ་བོད་མི་ཚོའི་དཀའ་ངལ་ཆ་ཚང་སེལ་མ་ཐུབ་ཀྱང་ལམ་སྟོན་ལྟ་བུ་ཞིག་ཏན་ཏན་ཆགས་རྒྱུ་ཡིན་སྐོར་གསུང་པ་དང་སྦྲགས། བོད་མི་སྐྱབས་བཅོལ་བའི་སྐོར་གསུང་དོན།
བཙན་བྱོལ་བོད་མི་ཚོ་ང་ཚོའི་ཆེས་མཐོའི་སྐུ་མགྲོན་ཞིག་ཆགས་ཀྱི་ཡོད། ལོ་རྒྱུས་ཐོག་ནས་འཕགས་བོད་ཡུལ་གཉིས་དབར་དམིགས་བསལ་གྱི་འབྲེལ་བ་ཞིག་ཡོད་སྟབས། ང་ཚོ་ཕན་ཚུན་དཀའ་ངལ་ནམ་འཕྲད་སྐབས་གཅིག་གིས་གཅིག་ལ་རོགས་བྱེད་རྒྱུ་དེ་ང་ཚོའི་ལས་འགན་ཡང་ཆགས་ཀྱི་ཡོད། ད་ལན་སྲིད་བྱུས་འདི་འདྲ་ཞིག་གཏན་འབེབས་ཐུབ་པ་དེར་རང་ཉིད་སྒེར་ལ་མཚོན་ན་དགའ་འཚོར་དང་འདོད་བློ་ཁེངས་པོ་ཞིག་བྱུང་སོང་། ད་ལན་སྲིད་བྱུས་འདི་འགོ་འཛུགས་ཙམ་རེད། མ་འོངས་པར་བོད་མི་སྐྱབས་བཅོལ་བ་རྣམས་ལ་དེ་ལས་ལྷག་པ་གང་བྱེད་ཐུབ་མིན་ཐོག་ལ་ང་ཚོས་འབད་བཙོན་བྱ་རྒྱུ་ཡིན། ཞེས་གསུངས།
ཕྱོགས་མཚུངས་སྲིད་བྱུས་འདིའི་གཙོ་འགན་བཞེས་མཁན་རྒྱ་གར་ནང་སྲིད་ལས་ཁུངས་ཀྱི་ཟུང་དྲུང་ཀེ་ཀེ་པ་ཐག་ K K pathak མཆོག་གིས་སྐབས་དེར་གསུང་དོན། སྲིད་བྱུས་འདིའི་ཐོག་ནས་ང་ཚོས་རྒྱ་གར་ནང་གནས་སྡོད་བཙན་བྱོལ་བོད་མི་ཚོའི་དཀའ་ལང་སེལ་རྒྱུའི་ཐོག་གང་ཐུབ་འབད་བརྩོན་ཞུས་ཡོད་ཁུལ་ཡིན། ཞེས་གསུངས་པ་དང་ཆབས་གཅིག་སྲིད་བྱུས་ཀྱི་ནང་དོན་ཁག་རེ་རེ་བཞིན་མངའ་སྡེ་སོ་སོའི་འབྲེལ་ཡོད་རྒྱ་གར་ལས་ཁུངས་ཁག་གི་སྐུ་ཚབ་དང་ཚོགས་བཅར་བ་ཡོངས་ལ་འགྲེལ་བརྗོད་གནང་བ་མ་ཟད། མངའ་སྡེ་སོ་སོའི་སྐུ་ཚབ་ཚོར་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་༢༠༡༤ ཞེས་པ་དེའི་ནང་གསལ་གྱི་འབྲུ་དོན་ཁག་ལག་བསྟར་འཐུས་ཚང་གནང་དགོས་པའི་སྐུལ་མ་ཡང་གནང་།
དེ་བཞིན་རྒྱ་གར་དབུས་གཞུང་ཕྱི་འབྲེལ་ལས་ཁུངས་ཀྱི་སྐུ་ཚབ་མཆོག་བོད་མི་ཚོར་སྐྱབས་བཅོལ་ལག་དེབ་དང་ཕྱིར་བསྐྱོད་ལག་དེབ་སེར་པོ་དང་འབྲེལ་བའི་གནད་དོན་ཐོག་ལ་ཡང་འགྲེལ་བརྗོད་གནང་ཡོད། དེ་རྗེས་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་རྒྱ་གར་གཞུང་དམངས་ཡོངས་ལ་སྲིད་བྱུས་དེ་འདྲ་ཞིག་གཏན་འབེབས་གནང་བར་སྙིང་ཐག་པ་ནས་བཀའ་དྲིན་ཆེ་ཞུས་པ་དང་། སྲིད་བྱུས་དེས་བོད་མིའི་སྒྲིག་འཛུགས་ལ་ཡང་བཙན་བྱོལ་བོད་མིའི་དཀའ་ངལ་སེལ་རྒྱུར་ཕན་ཐོགས་ཆེན་པོ་བྱུང་ཡོད་པ་དང་། ས་གནས་འགོ་འཛིན་ཚོར་ཡང་མང་ཚོགས་ཀྱི་བདེ་སྡུག་སེལ་རྒྱུར་སྔར་ལྷག་གདེང་སྤོབས་དང་ནུས་པ་ཡོངས་ངེས་ཡིན་སྐོར་གསུངས་པ་མ་ཟད། ནང་སྲིད་བཀའ་བློན་མཆོག་གིས་རྒྱ་གར་གཞུང་མང་གིས་བཙན་བྱོལ་བོད་མི་རྣམས་ལ་མཐུན་འགྱུར་རོགས་རམ་གནང་བར་བཀའ་དྲིན་རྗེས་དྲན་མཚོན་སླད་འབྲེལ་ཡོད་བློན་ཆེན་མཆོག་གིས་གཙོས་རྒྱ་གར་དབུས་གཞུང་དང་ས་གནས་གཞུང་འབྲེལ་མི་སྣ་རྣམས་ལ་མཇལ་དར་རེ་ཕུལ་ཡོད། མཛད་གཙོ་རྣམ་པའི་གསུང་བཤད་ཁག་ཡོངས་སུ་གྲུབ་མཚམས་ཚོགས་བཅར་བ་རྣམས་ཀྱི་དྲི་བར་མཛད་གཙོ་རྣམ་པས་ལན་འདེབས་དང་གསལ་བཤད་ཞིབ་ཕྲ་གནང་འདུག
