༢༠༡༤ ཟླ་ ༡༡ ཚེས་ ༡༧ རེས་གཟའ་ཟླ་བ།

༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༡༣ ཉིན་གྱི་ཕྱེད་ཡོལ་དུ་སྲིད་སྐྱོང་བློ་བཟང་སེང་གེ་མཆོག་གིས་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཝིར་བྷདྲ་སིངྒ་མཆོག་ Chief Minister Virbhadra Singh དང་མཇལ་འཕྲད་གནང་འདུག ཉིན་དེར་ཧི་མཱ་ཅལ་མངའ་སྡེའི་ཉེན་རྟོག་རུ་དཔོན་མཆོག་ Director General of Police གིས་མངའ་སྡེའི་སྤྱི་ཁྱབ་བློན་ཆེན་མཆོག་དང་སྲིད་སྐྱོང་མཆོག དེ་བཞིན་མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་བྷི་རི་ཇི་བྷི་ཧ་རི་ལལ་བྷུ་ཊེལ་ Brij Behari Lal Butail མཆོག མངའ་སྡེའི་གྲོང་གསེབ་དང་གྲོང་ཁྱེར་ཡར་རྒྱས་བློན་ཆེན་སྐུ་ཞབས་སུ་དྷིར་ཤརྨ་ Sudhir Sharma མཆོག དེ་བཞིན་ཉེན་རྟོག་མི་སྣ་མཐོ་གྲས་སོགས་ཀྱིས་གཙོས་གནད་ཡོད་མི་སྣ་ཁག་གཅིག་ལ་གསོལ་སྟོན་འབུལ་ལམ་ཞུས་འདུག སྐབས་དེར་སྲིད་སྐྱོང་མཆོག་གིས་ཆུ་ཚོད་གཅིག་ཙམ་རིང་མངའ་སྡེའི་སྤྱི་ཁྱབ་བློན་ཆེན་མཆོག་གིས་གཙོས་གནད་ཡོད་མི་སྣ་ཁག་དང་མཇལ་མོལ་གནང་ཡོད་པ་མ་ཟད། ལྷག་པར་སྲིད་སྐྱོང་བློ་བཟང་སེང་གེ་མཆོག་གིས་མངའ་སྡེའི་སྤྱི་ཁྱབ་བློན་ཆེན་མཆོག་ལ་དེང་སྐབས་བོད་ནང་གི་ཛ་དྲག་གནས་སྟངས་དང་རྒྱ་གར་ནང་བཙན་བྱོལ་བོད་མིའི་གནས་སྟངས་སྤྱི་དང་། ལྷག་པར་ཧི་མཱ་ཅལ་མངའ་སྡེའི་ནང་གི་བཙན་བྱོལ་བོད་མིའི་གནས་སྟངས་དང་དཀའ་ངལ་ཇི་འཕྲད་སྐོར་སོགས་སྙན་སེང་ཞུས་འདུག སྐབས་དེར་མངའ་སྡེའི་སྤྱི་ཁྱབ་བློན་ཆེན་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཧ་ཅང་ཞུ་བཞིན་པ་མ་ཟད། བོད་དང་བོད་མི་རྣམས་དང་སེམས་ཐག་ཧ་ཅང་ཉེ་པོ་ཡོད་སྐོར། དེ་བཞིན་བོད་མིའི་འཐབ་རྩོད་ལ་གདུང་སེམས་མཉམ་སྐྱེའི་རྒྱབ་སྐྱོར་ཞུས་དང་ཞུ་མུས་ཡིན་སྐོར་གསུངས་འདུག