༢༠༠༩ ཕྱི་ཟླ་ ༡༢ ཚེས་ ༢༡ རེས་གཟའ་ཟླ་བ།

༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༢༠ ཉིན་རྡ་ས་ནས་ཀི་ལོ་མི་ཊར་ ༦༨ ཙམ་གྱི་རྒྱང་ཐག་ལ་ཡོད་པའི་ཅིནཏ་པུར་ནིར་རྒྱ་གར་གྱི་བོད་དོན་རྒྱབ་སྐྱོར་ཚོགས་པ་ནས་བོད་དོན་གོ་རྟེག་སྤེལ་པའི་ལས་འགུལ་ཞིག་ས་གནས་དེའི་སློབ་གྲྭར་ (Saraswati Vidya Mandir High School) གོ་སྒྲིག་ཞུས་ཡོད་པ་དེར་སློབ་ཕྲུག་གྲངས་ ༢༠༠ བརྒལ་བ་དང་། དགེ་རྒན་སོགས་

སློབ་ཕྲུག་ཚོས་བོད་དོན་གོ་རྟོག་དང་འབྲེལ་བའི་གསུང་བཤད་ཉན་བཞིན་པ།

ནས་མཉམ་ཞུགས་གནང་ཡོད། སློབ་ཕྲུག་ཚོས་རྩོམ་ཡིག་དང་སྙན་རྩོམ་འགྲན་བསྡུར་ཡང་བྱས་ཡོད། དེའི་ཉིན་ཤེས་རིག་ལས་ཁུངས་ཀྱི་སྐུ་ཚབ་ཨ་ཙ་ཀརྨ་སྨོན་ལམ་ལགས་དམིགས་བསལ་གཞུང་འབྲེལ་སྐུ་མགྲོན་དུ་གདན་ཞུས་ལྟར་ཆེད་ཕེབས་ཀྱིས་བོད་དང་བོད་ཀྱི་ཁོར་ཡུག་སྐོར་གྱི་བརྗོད་གཞིའི་ཐོག་གསུང་བཤད་གནང་ཡོད། ཕྱོགས་མཚུངས་ཁོང་གིས་སློབ་ཕྲུག་ཚོས་བོད་དོན་གོ་རྟོག་སྤེལ་ཆེད་རྩོམ་ཡིག་དང་སྙན་རྩོམ་གྱི་འགྲན་བསྡུར་ནང་མཉམ་ཞུགས་བྱས་པར་བསྔགས་བརྗོད་ཀྱང་གནང་ཡོད། ཡང་སྐུ་མགྲོན་གཙོ་བོ་རྒྱ་གར་ས་གནས་གྲོས་ཚོགས་ཀྱི་འཐུས་མི་ (Parveen Kumar) པར་ཝིན་ཀུ་མར་ལགས་ཀྱིས་བོད་ནང་ཁོར་ཡུག་གཏོར་སྐྱོན་བྱུང་དང་འབྱུང་བཞིན་པ་དེར་སེམས་འཁུར་གནང་གི་ཡོད་སྐོར་བརྗོད་འདུག བོད་གཞུང་ཕྱི་དྲིལ་ལས་ཁུངས་ནས། རྐུ་ཤོར་བའི་བོད་ཀྱི་ཕྲུག་གུ ཅེས་པའི་པཎ་ཆེན་བླ་མ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མའི་སྐོར་གྱི་གློག་བརྙན་ཞིག་རྒྱ་གར་གྱི་སྐད་ཐོག་བསྟན་ཡོད། གཞན་ཡང་བོད་ཀྱི་དགུ་བཅུ་གསུམ་ལས་འགུལ་ཚོགས་པ་ནས་ཀྱང་བོད་དོན་དང་འབྲེལ་བའི་སྐུ་པར་འགྲེམས་སྟོན་གནང་ཡོད་པ་བཅས་ཀྱི་གནས་བསྡུས་སུ།།