༢༠༡༤ ཟླ་ ༡༡ ཚེས་ ༡༠ རེས་གཟའ་ཟླ་བ།
བློ་བཟང་རྒྱ་མཚོ་ལགས།
༄༅། །བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༤ ཟླ་ ༡༡ ཚེས་ ༨ ཉིན་བཏང་གནས་ནང་འཁོད་དོན། ཕྱི་ལོ་༢༠༡༤ ཟླ་ ༡༡ ཚེས་༧ ཉིན་གྱི་བོད་ནང་གི་སྔ་དྲོའི་ཆུ་ཚོད་༡༡ ཙམ་ལ་རྔ་བ་ཀིརྟི་དགོན་པའི་གྲྭ་བློ་བཟང་བསྟན་པ། རང་ལོ་ ༡༩ ཡིན་པ་ཁོང་ལ་རྔ་བ་རང་སྐྱོང་ཁུལ་གྱི་ལྟེ་གནས་འབར་ཁམས་འབྲིང་རིམ་མི་མང་ཁྲིམས་ཁང་ཟེར་བས་རྒྱལ་ཁབ་ལ་ངོ་ལོག་གི་བྱ་སྤྱོད་སྤེལ་བའི་ཉེས་མིང་འོག་ལོ་ ༢ ཀྱི་བཙོན་འཇུག་ཁྲིམས་ཐག་བཅད་ཅིང་། མི་འགྱང་བར་ས་གནས་གཞན་གྱི་བཙོན་ཁང་དུ་བསྐྱལ་རྒྱུ་ཡིན་འདུག ཁོང་ནི་ད་ལོ་ཕྱི་ ཟླ་ ༤ ཚེས་ ༢༦ ཉིན་རྔ་བ་རྫོང་མཁར་གྱི་གཞུང་ལམ་དབུས་མ་ནས་མགོ་ལ་བོད་ཀྱི་རྒྱལ་དར་བྲིས་མ་ཞིག་དཀྲིས་ཤིང་ལག་ཏུ་གོང་ས་མཆོག་གི་སྐུ་པར་ཆེན་པོ་ཞིག་བཟུང་ནས་“བོད་ལ་རང་དབང་དགོས་པ་དང་། རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས་”ཞེས་པའི་འབོད་ཚིག་སྒྲོག་བཞིན་གོམ་བགྲོད་གནང་མཁན་དེ་ཡིན་ལ། སྐབས་ཐོག་དེར་ཁྲོམ་ལམ་དུ་ཡོད་པའི་ཉེན་རྟོག་པ་རྣམས་ཀྱིས་བཙན་ཁྲིད་བྱས་ཏེ་ད་བར་མནར་གཅོད་སྣ་ཚོགས་མྱངས་མཐར་གཞི་ནས་ཐག་གཅོད་དེ་ལྟར་བྱས་པ་ཡིན་འདུག ཁོང་ལ་ཁྲིམས་ཐག་གཅོད་སྐབས་ནང་མིར་བརྡ་བཏང་སྟེ་ཁྲིམས་རྭར་ཡོང་བཅུག་ཡོད་ཀྱང་ནང་མིར་ཁྲིམས་རྩོད་པ་གླ་རྒྱུའི་གོ་སྐབས་སྤྲད་མེད་པ་རེད།
བློ་བཟང་བསྟན་པ་ལགས།
ཁོང་གི་ཕ་ཡུལ་བོད་མདོ་སྨད་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་གཉིས་པ་ཡིན་ཞིང་། ཕ་ངག་ཆུང་དང་མ་སྒྲོལ་མ་ཆོས་ཁོ་གཉིས་ཀྱི་བུ་ཆུང་བ་ཡིན་པ་དང་། ཆུང་ཆུང་སྐབས་ནས་རྔ་བ་ཀིརྟི་དགོན་པར་ཆོས་བཞུགས་གནང་ནས་དེང་སྐབས་རྔ་བ་ཀིརྟི་དགོན་པའི་སྔོན་འགྲོའི་འཛིན་གྲྭ་དགུ་བ་ཡིན་འདུག ཁོང་ལ་མ་གཅིག་གི་སྤུན་རྒན་པ་གྲྭ་པ་གཉིས་ཡོད་པའི་གཅིག་དེང་སྐབས་རྒྱ་གར་ལྷོ་ཕྱོགས་འབྲས་སྤུངས་སུ་སློབ་གཉེར་གནང་བཞིན་ཡོད་ལ། གཅིག་རྔ་བ་ཀིརྟི་དགོན་པའི་ནང་དུ་ཡོད་འདུག དེ་བཞིན་གོང་ཚེས་ཉིན་ཁོང་དང་མཉམ་དུ་རྔ་བ་ཀིརྟི་དགོན་པའི་གྲྭ་བློ་བཟང་རྒྱ་མཚོ། རང་ལོ་༢༠ ཡིན་པ་ཁོང་ལ་ཡང་རྒྱལ་ཁབ་ལ་ངོ་ལོག་གི་བྱ་སྤྱོད་སྤེལ་བའི་ཉེས་མིང་འོག་ལོ་༣ གྱི་བཙོན་འཇུག་ཁྲིམས་ཐག་བཅད་ཅིང་། མི་འགྱང་བར་ས་གནས་གཞན་གྱི་བཙོན་ཁང་དུ་བསྐྱལ་རྒྱུ་ཡིན་འདུག ཁོང་གིས་ཀྱང་ད་ལོའི་ཕྱི་ཟླ་༤ ཚེས་༢ ཉིན་རྔ་བ་རྫོང་མཁར་གྱི་གཞུང་ལམ་དུ་ཐོན་ནས་ལག་ཏུ་ཁོང་རང་ཉིད་ཀྱིས་བྲིས་པའི་བོད་ཀྱི་རྒྱལ་དར་ཞིག་བཟུང་ནས་“བོད་ལ་རང་དབང་དགོས་པ་དང་། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་”ཞེས་པའི་འབོད་ཚིག་སྒྲོག་བཞིན་སྐད་འབོད་གནང་ཡོད་འདུག་ལ། སྐབས་ཐོག་དེར་ཉེན་རྟོག་པའི་ལག་ཏུ་མ་ཤོར་བར་ཡར་དགོན་པའི་ནང་དུ་འབྱོར་ཐུབ་ཙམ་བྱུང་ཡང་།
བློ་བཟང་བསྟན་པ་ལགས།
ཕྱི་ཟླ་༤ ཚེས་༡༥ ཉིན་དགོན་པའི་ནང་ནས་ཉེན་རྟོག་པས་འཛིན་བཟུང་བྱས་ཏེ་ད་བར་བཀག་ཉར་ཁང་སོགས་བརྒྱུད་དེ་མནར་གཅོད་རིམ་པར་མྱངས་མཐར་ཐག་གཅོད་བྱས་པ་ཡིན་འདུག ཁོང་ལ་ཁྲིམས་ཐག་གཅོད་སྐབས་ནང་མིར་བརྡ་བཏང་སྟེ་ཁྲིམས་རྭར་ཡོང་བཅུག་ཡོད་ཀྱང་ཁྲིམས་རྩོད་པ་གླ་རྒྱུའི་གོ་སྐབས་སྤྲད་མེད་པ་གཅིག་མཚུངས་རེད། ཁོང་གི་ཕ་ཡུལ་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་གསུམ་པ་ཡིན་ཞིང་། ཕ་བྷེ་ཚེ་དང་། མ་ཞིས་ཆུང་གཉིས་ཀྱི་བུ་ཡིན་ཞིང་། སྲིང་མོ་ཆུང་ཆུང་ཞིག་ཀྱང་ཡོད་འདུག ཆུང་ཆུང་སྐབས་ནས་རྔ་བ་ཀིརྟི་དགོན་པར་ཆོས་བཞུགས་གནང་ནས་དེང་སྐབས་སྔོན་འགྲོའི་འཛིན་གྲྭ་དགུ་པ་ཡིན་པ་བཅས།
