༢༠༡༤ ཟླ་ ༡༡ ཚེས་ ༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༣ དང་ ༤ བཅས་ཉིན་གྲངས་གཉིས་རིང་ཨ་རིའི་ནིའུ་ཡོཀ་གྲོང་ཁྱེར་དུ་ཨ་རིའི་བོད་ཁང་དང་བོད་བརྒྱུད་ནང་བསྟན་སློབ་གཉེར་ཁང་གཉིས་ཀྱིས་ཇི་ལྟར་གསོལ་བ་བཏབ་པ་ལྟར། ནེའུ་ཡོཀ་གྲོང་ཁྱེར་གྱི་བྷེ་ཀན་ཐེ་ཊར་(Beacon Theater)རུ་རྗེ་ཙོང་ཁ་པ་ཆེན་པོས་མཛད་པའི་དྲང་ངེས་ལེགས་བཤད་སྙིང་པོའི་གསུང་ཆོས་སྩལ་ཡོད།
དེ་ཡང་ཐོག་མར་ཨ་རིའི་ཁོ་ལོམ་བྷི་ཡ་གཙུག་ལག་སློབ་གྲྭ་ཆེན་མོའི་སློབ་དཔོན་ཆེན་མོ་རོ་བྷར་ཊི་ཐར་མན་ (Robert Thurman) ལགས་ཀྱིས་༸གོང་ས་མཆོག་གི་ངོ་སྤྲོད་མཛད་རིམ་གྱི་དེབ་ནང་བཀོད་ཡོད་པས་ཆོས་ཞུ་བ་རྣམས་ལ་གསུང་ཆོས་དུས་ཚོད་གང་མང་མང་ཐོང་ཆེད་དམིགས་བསལ་ངོ་སྤྲོད་ཞུ་རྒྱུ་མིན། ཞེས་གསུང་བཤད་གནང་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཞུ་བ་མི་གྲངས་ ༣༠༠༠ ཙམ་ལ་བཀའ་སློབ་སྩལ་དོན། ཐར་མན་ཁོང་ཐོག་མར་རྡ་རམ་ས་ལར་ཕྱི་ལོ་ ༡༩༦༤ ལོར་ཕེབས་པ་རེད། དེ་དུས་ཁོང་ནི་རབ་ཏུ་བྱུང་བའི་རྟགས་འཛིན་པ་ཞིག་དང་། ཀླུ་སྒྲུབ་ཀྱི་སློབ་མ་ཨརྱ་དེ་བ་བཞིན་དུ་སྤྱན་གཅིག་མ་གཏོགས་ཡོད་པ་མ་རེད། དེ་ནས་བཟུང་ངེད་གཉིས་གྲོགས་པོ་ཉེ་བོ་ཆགས་ཡོད།
ཁོང་རང་མཐོ་རིམ་སློབ་གྲྭའི་སློབ་དཔོན་གནང་བ་ནས་ཤེས་ཡོན་སྡེ་ཚན་ཁག་ཏུ་རྗེ་ཙོང་ཁ་པའི་གསུང་རྩོམ་འགྲེལ་བཤད་གནང་བ་དང་། དགེ་ལུགས་པའི་བསྟན་པ་ལ་དམིགས་བསལ་གྱིས་དོ་འཁུར་གནང་ཡོད། སྤྱིར་ས་དགེ་བཀའ་རྙིང་ཇོ་ནང་བོན་དང་བཅས་པ་ན་ལེནྡྲའི་ཆོས་བརྒྱུད་འཛིན་པ་གཅིག་མཚུངས་ཆགས་ཡོད། དེ་ལ་ང་རང་ཚོ་ཐུན་མོང་ནས་དམིགས་བསལ་གྱིས་དོ་སྣང་བྱེད་དགོས་པར་ངོས་རང་ནམ་རྒྱུན་ནས་བསམ་བློ་འཁོར་གྱི་ཡོད། ང་ཚོའི་ཆོས་བརྒྱུད་ཚང་མས་ན་ལེནྡྲའི་པཎ་གྲུབ་ཆེན་པོ་དག་གིས་མཛད་པའི་གཞུང་ཆེན་མོར་སློབ་གཉེར་བྱེད་ཀྱི་ཡོད། རྗེ་ཙོང་ཁ་པ་ཆེན་པོས་ཀྱང་རྒྱ་གར་གྱི་མཁས་པ་ཆེན་པོ་དག་གི་གཞུང་ཆེན་དེ་དག་ལ་འགྲེལ་བ་བརྩམས་ཡོད་པ་དང་། ཐར་མན་ལགས་ཀྱིས་རྗེ་རིན་པོ་ཆེས་མཛད་པའི་བསྟན་བཅོས་ཁག་ལ་དམིགས་བསལ་གྱིས་དོ་སྣང་གནང་ཡོད་པ་དེ་ལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་སྩལ་གྲུབ་བསྟུན། བཞུགས་ཁྲིར་འཁོད་དེ་ཤེས་རབ་སྙིང་པོ་གསུང་འདོན་གནང་རྗེས་བཀའ་སློབ་སྩལ་དོན། མཁན་པོ་དང་མཁན་ཟུར། དགེ་བཤེས་དང་མཁས་དབང་རྣམ་པ་ཚང་མར་འཚམས་འདྲི་ཞུ་ཡི་ཡིན།
དེ་རིང་ཁྱེད་རང་ཚོ་འདིར་ཕེབས་དོན་ངོས་རང་ལ་ཡིག་ཚད་ལེན་དུ་སླེབས་པ་མིན་ནམ་སྙམ་གྱི་འདུག རྣམ་པ་ཚོས་ལོ་ ༣༠ ལ་ཉེ་བའི་རིང་སངས་རྒྱས་ཀྱི་བསྟན་པའི་དོན་དུ་དཀའ་ལས་སྐྱོན་ནས་སློབ་གཉེར་གནང་བ་དེར་རྗེས་སུ་ཡི་རང་ཞུ་རྒྱུ་ཡིན། རྣམ་པ་ཚོ་འདུལ་བ་འཛིན་པ་ཆེན་པོ་ཡིན་པས་འདུལ་ཁྲིམས་བཟུང་ཡོད་ཀྱང་། ཞི་གནས་སམ་ཏིང་ངེ་འཛིན་གྱི་ཆ་ནས་ཁྱེད་རང་ཚོར་སྒོམ་ལོང་བྱུང་ཡོད་ཀྱི་མ་རེད། ཡིན་ནའང་། ལྷག་པའི་བསླབ་པ་གསུམ་པ་ཤེས་རབ་ཀྱི་བསླབ་པའི་ཆ་ནས་སོ་སོའི་རྒྱུད་དང་འདྲེས་ནས་ཉམས་མྱོང་བསགས་ཡོད། དེར་བརྟེན་ཁྱེད་རྣམ་པའི་མདུན་ནས་གཞུང་ཆེན་མོ་འདིར་བཤད་ཁྲིད་བྱེད་རྒྱུ་བྱུང་བ་ནི་ཧ་ཅང་སྐལ་བ་བཟང་པོ་བྱུང་། སངས་རྒྱས་ཀྱི་འཕྲིན་ལས་ཡོད་དོ་ཅོག་ནི་སྙིང་རྗེ་ཆེན་པོས་སྐུལ་བ་ཡིན།
ཡོངས་གྲགས་སུ་སངས་རྒྱས་བཅོམ་ལྡན་འདས་ཀྱིས་ཐོག་མར་བྱང་ཆུབ་མཆོག་ཏུ་ཐུགས་བསྐྱེད་པ་དང་། བར་དུ་བསྐལ་ཆེན་གྲངས་མེད་གསུམ་དུ་ཚོགས་གཉིས་བསགས། མཐར་མངོན་པར་རྫོགས་པའི་སངས་རྒྱས་ཞེས་བརྗོད་ཀྱི་ཡོད། དེར་བརྟེན་བཅོམ་ལྡན་འདས་ནི་ཐ་གཅིག་ཏུ་གཞན་ལ་དངོས་སུ་ཕན་འདོགས་ཐུབ་མཁན་གྱི་ཚད་མའི་སྐྱེས་བུ་ཞིག་ཏུ་གྱུར་ཡོད། ནང་པ་སངས་རྒྱས་པའི་དམིགས་ཡུལ་ནི་སྙིང་རྗེའི་ཀུན་ནས་སྐུལ་པའི་གཞན་ཕན་བསྒྲུབ་རྒྱུ་དང་། གཙོ་བོ་ཕྱིན་ཅི་ལོག་གི་ལྟ་བ་ཐམས་ཅད་སྤངས་རྒྱུ་དེ་རེད། སངས་རྒྱས་བཅོམ་ལྡན་འདས་ཀྱིས་འགྲན་ཟླ་མེད་པའི་གསུང་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་ལས་གྲོལ་བར་བྱེད་ཀྱི་ཡོད།
ཆོས་ལུགས་ཚང་མས་གཅིག་མཚུངས་ཀྱིས་གཞན་ལ་འཚེ་བ་མི་བྱེད་པ་དང་། ཕན་པ་བསྒྲུབ་རྒྱུ་གསུངས་ཡོད། དེ་ནི་ཐབས་ཀྱི་ཆ་ཡིན་པ་དང་། དེ་ལ་བསྟེན་ནས་མངོན་མཐོ་ལྷ་མིའི་གོ་འཕང་ཐོབ་ཐུབ་ཀྱི་ཡོད། ཐར་པ་དང་ཐམས་ཅད་མཁྱེན་པའམ་ངེས་པར་ལེགས་པའི་ཆ་དེ་ཡང་དག་པའི་ལྟ་བར་གཞི་བཅོལ་ནས་སྒྲུབ་ཀྱི་ཡོད། དྲང་ངེས་ལེགས་བཤད་སྙིང་པོས་སེམས་ཙམ་པ་དང་དབུ་མ་བའི་ལྟ་བའི་སྐོར་ལ་འགྲེལ་བཤད་སྐྱོན་གྱི་ཡོད། ཅེས་དང་། ༸གོང་ས་མཆོག་གིས་དྲང་ངེས་ལེགས་བཤད་སྙིང་པོའི་གསུང་ཆོས་ཡོངས་འཛིན་གླིང་རིན་པོ་ཆེའི་དྲུང་ནས་༸རྒྱལ་དབང་སྐུ་ཕྲེང་གཉིས་པའི་མཛད་པའི་འགྲེལ་བའི་སྟེང་གསན་སྐོར་སོགས་བཀའ་སློབ་སྩལ་ཡོད་པ་དང་། ༸རྒྱལ་དབང་སྐུ་ཕྲེང་གཉིས་པ་ལ་རིས་མེད་པའི་ཞྭ་སེར་མོ་བ་ཞེས་མཚན་འབོད་སྲོལ་ཡོད། ཅེས་སོགས་བཀའ་སློབ་སྩལ་ཡོད།
