༢༠༡༤ ཟླ་ ༡༡ ཚེས་ ༤ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༣ ཉིན་འདི་གའི་ཆེད་གཉེར་གསར་འགོད་པ་རྣམ་རྒྱལ་ཚེ་དབང་ལགས་ཀྱིས་ས་གནས་ནས་བཏང་འབྱོར་ལྟར་ན། བོད་མིའི་སྒྲིག་འཛུགས་ཀྱི་སྲིད་སྐྱོང་མཁས་དབང་བློ་བཟང་སེང་གེ་མཆོག་གིས་ཁ་སང་སྒང་ཏོག་ཁུལ་གྱི་བོད་མི་རྣམས་ལ་གསུང་བཤད་གནང་ཡོད། སྐབས་དེར་སྲིད་སྐྱོང་མཆོག་གིས་གཙོ་བོ་བཀའ་ཤག་སྐབས་བཅུ་བཞི་པས་འདས་པའི་ལོ་གསུམ་རིང་གི་ལས་དོན་ཇི་ཞུས་སྐོར་དང། རྒྱལ་སྤྱིའི་ནང་བོད་དོན་ལ་རྒྱབ་སྐྱོར་གྱི་གནས་སྟངས། དབུ་མའི་ལམ་གྱི་སྲིད་བྱུས་ཀྱི་སྐོར། དེ་བཞིན་ཆིག་སྒྲིལ། གསར་གཏོད། རང་ཁ་རང་གསོ་བཅས་བཀའ་ཤག་གི་ལྟ་གྲུབ་གསུམ་གྱི་སྐོར་གསལ་བཤད་གནང་བ་མ་ཟད། ཤེས་རིག་ལས་ཁུངས་ཀྱི་སློབ་ཡོན་ལས་གཞི་ཁག་ཀྱང་ངོ་སྤྲོད་གནང་ཡོད། ཕྱོགས་མཚུངས་སྐབས་དེར་་སྲིད་སྐྱོང་མཆོག་གིས་ཕྱི་ལོ་ ༢༠༢༠ ནི་བོད་ཀྱི་ལོ་རྒྱུས་ནང་གནད་འགག་ཆེན་པོ་ཞིག་ཡིན་པའི་འགྲེལ་བརྗོད་དང་སྦྲགས་བོད་མི་མི་རབས་རྒན་པ་ཚོས་གཞོན་སྐྱེས་ཚོར་བོད་ཀྱི་ལོ་རྒྱུས་དང་རིག་གཞུང་རྒྱུད་སྤྲོད་བྱ་རྒྱུ་གལ་ཆེ་ཡིན་སྐོར་གསུང་དོན།
” ཕྱི་ལོ་ ༢༠༢༠ ནི་བོད་མི་རིགས་དང་ལོ་རྒྱུས་གཉིས་ཀའི་ཐོག་ཧ་ཅང་གནད་
འགག་ཆེ་བའི་དུས་སྐབས་ཤིག་ཆགས་རྒྱུ་ཡིན། ཕྱི་ལོ་ ༡༩༥༠ ལོར་རྒྱ་དམག་བོད་ནང་ཐོག་མར་འབྱོར་འགོ་བཙུགས་པར་བརྟེན། ཕྱི་ལོ་ ༢༠༢༠ ལོར་རྒྱ་དམག་བོད་ནང་འབྱོར་ནས་ལོ་ ༧༠ འཁོར་གྱི་ཡོད། དེར་བརྟེན་ཕྱི་ལོ་ ༢༠༢༠ ལོར་བོད་ཕྱི་ནང་གཉིས་སུ་དེ་སྔའི་བོད་རང་དབང་ཡིན་སྐབས་ཀྱི་གནས་སྟངས་དངོས་སུ་མཐོང་མྱོང་མཁན་གྱི་མི་རབས་རྒན་པ་ཧ་ལམ་ཆ་ཚང་རྫོགས་འགྲོ་གྱི་རེད།
དེ་རྗེས་ཀྱི་མི་རབས་ཚོས་བོད་རང་དབང་ཡིན་པའི་གནས་སྟངས་མཐོང་མྱོང་མེད། ཁོང་ཚོས་གང་མཐོང་བ་ནི་བོད་རིགས་རྣམས་རྒྱ་མིའི་དབང་བསྒྱུར་འོག་གདུག་སྦྱོང་མནར་གཅོད་མྱོང་བཞིན་པ་དེ་ཡིན། བཙན་བྱོལ་ནང་འཚར་ལོངས་བྱུང་བ་ཚོ་ཡིན་ན་སྐྱབས་བཅོལ་བའི་གནས་བབས་ཤིག་ཉམས་སུ་མྱོང་ཡོད། དེ་བཞིན་ཕྱི་རྒྱལ་ཁག་ལ་ཡོད་མཁན་གྱི་བོད་མི་མི་རབས་གཞོན་པ་ཚོས་བོད་མི་སྐྱབས་བཅོལ་བ་ཡིན་པ་གང་ཞིག་ལ་རྒྱལ་ཁབ་གཞན་གྱི་མི་སེར་ཡིན་པའི་ཉམས་མྱོང་བསགས་ཡོད། བོད་མི་སྐྱབས་བཅོལ་བའི་གནས་སྟངས་གཅིག་མཚུངས་ཆགས་ནའང་འཚར་ལོངས་བྱེད་སའི་ཁོར་ཡུག་གི་གནས་སྟངས་མི་འདྲ་བ་ཡོད་པར་བརྟེན་ཉམས་མྱོང་ཡང་མི་འདྲ
་བ་གསུམ་ཙམ་ཡོང་བཞིན་ཡོད།
ཕྱི་ལོ་ ༢༠༢༠ ལོར་བོད་མི་མི་རབས་ཆ་ཚང་ཞིག་བརྗེས་པོ་འཐེབ་འགྲོ་གི་ཡོད། དེར་བརྟེན་མི་རབས་རྒན་པ་ཚོས་ད་ལྟ་ནས་བོད་མི་གཞོན་སྐྱེས་ཚོར་བོད་ཀྱི་ལོ་རྒྱུས་དང་ཐུན་མིན་རིག་གཞུང་དང་གོམས་གཤིས་བཟང་པོ་ཡོད་པ་དེ་དག་བརྒྱུད་སྤྲོད་དང་སྦྲགས། ཡང་ཡང་སློབ་གསོ་གནང་ནས་བོད་མི་རིགས་ཀྱི་ཟློག་ཏུ་མེད་པའི་ལས་འགན་དེ་དག་ཕ་ཤུལ་བུས་འཛིན་ཐུབ་པ་གནང་རྒྱུ་ཧ་ཅང་གལ་ཆེན་པོ་ཡིན། དེ་བཞིན་བོད་མི་ཚང་མ་ནང་ཁུལ་དམ་ཚིག་རྡོག་རྩ་ཆིག་སྒྲིལ་བྱེད་དགོས། རྒྱ་གར་གཞུང་མང་གཉིས་ང་ཚོར་ཧ་ཅང་བཀའ་དྲིན་ཆེན་པོ་ཡིན། དེང་སྐབས་དོལ་རྒྱལ་རྗེས་འབྲང་པས་རྒྱ་ནག་གཞུང་གི་ངན་ཇུས་འོག་ནས་༸གོང་ས་མཆོག་ལ་གཞི་མེད་ཀྱི་མཚན་སྨད་ཞུས་དང་ཞུ་བཞིན་པ་དེ་དག་གཞི་རྩ་གང་ཡང་མེད། ཅེས་སོགས་འབྲེལ་བརྗོད་གནང་།
དེ་ཉིན་སྲིད་སྐྱོང་མཆོག་གིས་བཀྲིས་དགའ་ཚལ་གླིང་དུ་འབྲས་ལྗོངས་རྒྱལ་སྲས་སྐུ་གཞོན་འཇིགས་བྲལ་ཚེ་དབང་རྣམ་རྒྱལ་མཆོག་གི་སྐུ་ཕུང་ལ་མཇལ་དར་དང་རྗེས་
ཤུལ་ལྷ་ལྕམ་བསོད་ནམས་དབྱངས་ཅན་རྣམ་རྒྱལ་ལགས་དང་ནང་མི་ཚོར་ཐུགས་གསོ་གནང་ཡོད་པ་རེད།
སྲིད་སྐྱོང་མཆོག་གིས་དེ་ཉིན་རྣམ་རྒྱལ་བོད་ཀྱི་ཤེས་རིག་ཉམས་ཞིབ་ཁང་ལ་འཚམས་གཟིགས་དང། སྒང་ཏོག་ནང་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་ལས་སྣེ་ཚོ་དང་ལྷན་དུ་བཞུགས་མོལ་ཚོགས་འདུ་ཡང་གནང་ཡོད།
