༢༠༡༤ ཟླ་ ༡༠ ཚེས་ ༢༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་ཀ་ཊ་ལོ་ནི་ཡ་ (Catalonia ) གྲོས་ཚོགས་སུ་ཕེབས་སྐབས་ཀ་ཊ་ལོ་ནི་ཡའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཇོར་ཌི་སོལ་ཕེ་རན་ཌ་ (Mr. Jordi Sole I Ferranda) མཆོག་གིས་ཕེབས་བསུའི་སྣེ་ལེན་ཞུས་པ་དང་འབྲེལ་གསུང་དོན། དེ་རིང་ང་ཚོའི་གྲོས་ཚོགས་ནང་བོད་མིའི་སྐུ་ཚབ་ལ་ཕེབས་བསུ་ཞུ་རྒྱུ་བྱུང་བར་ཧ་ཅང་དགའ་སྤོབས་སྐྱེས་བྱུང
་། འཛམ་གླིང་ས་ཕྱོགས་གང་དུའང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་ཚེ་ཀ་ཊ་ལོ་ནི་ཡ་གྲོས་ཚོགས་ཀྱིས་སེམས་འཚབ་ཀྱི་རྣམ་པ་ཤུགས་ཆེ་འདོན་བཞིན་ཡོད་པ་ལྟར། ཐེངས་འདིར་ང་ཚོས་བོད་ནང་གི་ད་ལྟའི་ཛ་དྲག་གནས་སྟངས་ཐོག་སེམས་འཚབ་ཡོད། ཞུ་རྒྱུ་ཡིན་ཞེས་གསུངས། སྐབས་དེར་སྲིད་སྐྱོང་མཆོག་གིས་བོད་ནང་གི་ཛ་དྲག་གནས་སྟངས་སྤྱི་དང་ལྷག་པར་བོད་མིའི་རང་ལུས་མེར་སྲེག་སྐོར་གསུང་དོན། ཕྱི་ལོ་ ༢༠༠༩ ལོ་ནས་བཟུང་ད་བར་བོད་མི་ ༡༣༢ རང་ལུས་མེར་སྲེག་བཏང་ཡོད་ཁོངས་ནས་བོད་མི་ ༡༡༣ འདས་གྲོངས་སུ་གྱུར་ཡོད། བོད་མིའི་སྒྲིག་འཛུགས་ཀྱིས་བོད་མིའི་རང་ལུས་མེར་སྲེག་གི་དོན་རྐྱེན་འབྱུང་བཞིན་པ་དེར་ཧ་ཅང་བློ་འཚབ་བྱེད་བཞིན་ཡོད། བོད་མིའི་སྒྲིག་འཛུགས་ཀྱི་ངོས་ནས་དུས་རྟག་ཏུ་རང་ལུས་མེར་སྲེག་ལྟ་བུའི་ཚབས་ཆེའི་ལས་འགུལ་རིགས་མ་སྤེལ་རོགས་ཞེས་འབོད་སྐུལ་ཞུ་བཞིན་ཡོད། འོན་ཀྱང་བོད་མི་དེ་དག་གིས་༸གོང་ས་མཆོག་བོད་དུ་གདན་འདྲེན་ཞུ་དགོས་པ་དང་བོད་ལ་རང་དབང་དགོས་པའི་མངོན་འདོད་འདོན་བཞིན་དུ་འུ་ཐུག་ཐབས་ཟད་ཀྱི་ལས་འགུལ་མུ་མཐུད་སྤེལ་བཞིན་ཡོད།
སྤྱིར་བོད་མི་དེ་དག་གི་མངོན་འདོད་ལ་བོད་མིའི་སྒྲིག་འཛུགས་ཀྱིས་རྒྱབ་སྐྱོར་ཞུ་བཞིན་ཡོད། དེ་བཞིན་འདས་པའི་ལོ་ངོ་ ༥༠ ལྷག་རིང་རྒྱ་ནག་གཞུང་གིས་བོད་ནང་བཙན་འཛུལ་དང་དྲག་གནོན་བྱས་ཡོད་ཀྱང་ང་ཚོས་རྒྱ་ནག་རྒྱལ་ཁབ་ཀྱི་བདག་དབང་དང་ས་ཁྱོན་ཆིག་སྒྲིལ་ལ་གུས་བརྩི་ཞུས་ཐོག་དབུ་མའི་ལམ་གྱི་སྲིད་བྱུས་རྒྱུན་སྐྱོང་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཐོབ་ཐབས་བྱེད་བཞིན་ཡོད། འོན་ཀྱང་སྟབས་མ་ལེགས་པ་ཞིག་ལ་ཕྱི་ལོ་ ༢༠༡༠ ནས་བཟུང་བོད་རྒྱ་འབྲེལ་མོལ་བསྐྱར་གསོ་ཐུབ་མེད། ཅེས་གསུངས་འདུག
དེ་རྗེས་སྲིད་སྐྱོང་མཆོག་ཀ་ཊ་ལོ་ནི་ཡ་གྲོས་ཚོགས་ཀྱི་ཚོགས་གཞོན་ལྕམ་སྐུ་ཨ་ན་སི་མོ་ཀ་སི་ཊི་ལོ་ (Mrs. Anna Simo I Castello) མཆོག་དང་ལྷན་མཇལ་འཕྲད་གནང་གྲུབ་མཚམས། ཉིན་གུང་གསོལ་ཚིགས་སྐབས་ཀ་ཊ་ལོ་ནི་ཡའི་རྒྱལ་ས་སྦར་སི་ལོ་ན་ (Barcelona) གྲོང་སྡེའི་སྤྱི་ཁྱབ་གཞོན་པ་ (Mr. Jaume Ciurana) ལགས་མཇལ་འཕྲད་གནང་འདུག
སྲིད་སྐྱོང་མཆོག་ཀ་ཊ་ལོ་ནི་ཡའི་རྒྱལ་ས་སྦར་སི་ལོ་ནའི་ནང་ཉིན་གྲངས་གཉིས་རིང་གི་ལས་རིམ་སྐབས་ཁུལ་དེའི་གསར་འགོད་པའི་བཅའ་འདྲི་དང་ལེན་གྱིས་ལས་རིམ་བཅུའི་ནང་མཉམ་ཞུགས་གནང་ཡོད་པ་མ་ཟད། སྦར་སི་ལོ་ནའི་ནང་ཡོད་པའི་Barcelona Press Club ཞེས་པར་གསར་འགོད་གསལ་བསྒྲགས་ཤིག་གནང་སྐབས་སྲིད་སྐྱོང་མཆོག་གིས་གསུང་དོན། ཁ་སང་སྦར་སི་ལོ་ན་དབུས་སུ་མི་མང་ཧ་ལས་པའི་མང་པོ་འཛོམས་འདུག བོད་ནང་འདི་ལྟར་མི་མང་འཛོམས་སྲིད་ཀྱི་མ་རེད་ལ་ཆོག་གི་ཡང་མེད། བོད་ནང་ལ་མཚོན་ན་བོད་མི་ཚོས་རྒྱ་ནག་གཞུང་ལ་ཞི་རྒོལ་གྱི་རྣམ་པ་གང་འདྲ་ཞིག་བྱས་ཀྱང་རྒྱ་ནག་གཞུང་གིས་ལམ་སེང་འཛིན་བཟུང་བཙོན་འཇུག་དང་མནར་གཅོད་གཏོང་གི་ཡོད། ཅེས་སོགས་གསུངས་རྗེས་གསར་འགོད་པ་ཞིག་གིས་ཀ་ཊ་ལོ་ནི་ཡའི་མི་མང་ཚོས་སི་པེན་ནས་ཁ་བྲལ་གྱི་རང་བཙན་རྩོད་བཞིན་ཡོད་སྐོར་དང་འབྲེལ་བའི་དྲི་བར་ལན་འདེབས་གནང་དོན། ང་ཚོས་ད་ལྟ་ཁྱེད་རྣམས་ལ་ཡོད་བཞིན་པའི་རང་སྐྱོང་གི་གནས་བབ་དེ་རྩོད་བཞིན་ཡོད་པ་ལས་རྒྱ་ནག་དང་ཁ་བྲལ་རྩོད་ཀྱི་མེད། མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ནི་རྒྱ་ནག་གཞུང་གི་རྩ་ཁྲིམས་ནང་གསལ་པོ་འཁོད་ཡོད། དེར་བརྟེན་ང་ཚོས་རྩོད་རྒྱུ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གསལ་བའི་རང་སྐྱོང་གི་གནས་བབ་དེ་རྩོད་བཞིན་ཡོད། ཅེས་གསུངས་འདུག
