༢༠༠༩ ཕྱི་ཟླ་ ༡༢ ཚེས་ ༡༡ རེས་གཟའ་ཕུར་བུ།
འཇམ་དཔལ་དབང་ཕྱུག
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ། སྔ་ལོར་ཟླ་ ༣ ཚེས་ ༡༠ བཟུང་བོད་ཀྱི་འབྲས་སྤུངས་དགོན་པའི་དགེ་འདུན་པ་ཚོས་ཞི་བའི་སྐད་འབོད་བྱས་པ་སོགས་ལ་བརྟེན་དགོན་པར་དམ་བསྒྲགས་ཆེན་པོ་བྱས་ཡོད་པ་མ་ཟད། དགེ་འདུན་པ་ཧ་ཅང་མང་པོ་འཛིན་བཟུང་དང་། ལྷག་པར་སྔ་ལོའི་ཕྱི་ཟླ་ ༤ པའི་ནང་འབྲས་སྤུངས་དགོན་ནས་དགེ་འདུན་པ་ཁྱོན་ཆེ་གང་བྱུང་འཛིན་བཟུང་གིས་ཉེས་རྡུང་ཚད་ལས་འདས་པ་བཏང་སྟེ་དགོན་པ་ནས་བཙོན་ཁང་ཁག་དང་། སོ་སོའི་ཕ་ཡུལ་དུ་བཙན་ཤེད་ཀྱི་ཐོག་ནས་ཕྱིར་སློག་ བཏང་བའི་གནས་ཚུལ་ཐོན་ཡོད། འདི་ལོའི་ལོ་འགོར་སླེབས་སྐབས་འབྲས་སྤུངས་དགོན་པའི་དགེ་འདུན་པ་ ༤༢ ལྷག་ལ་དུས་ཡུན་ལོ་ ༢ ནས་ལོ་ ༡༥ བར་གྱི་ཁྲིམས་ཐག་བཅད་ཡོད་པའི་གནས་ཚུལ་ཐོན་ཡོད་པ་ལྟར་ལོ་ཚད་བཟོས་ཟིན་པའི་བཙོན་པ་མང་པོ་ཞིག་གཞིས་རྩེ་ས་ཁུལ་ཉ་རི་བཙོན་ཁང་དང་། ལྷ་སའི་ཆུ་ཤུལ་བཙོན་ཁང་ནང་བཙོན་འཇུག་བྱེད་བཞིན་ཡོད་པ་ལྟར། ནང་མི་སྤུན་མཆེད་དང་ཉེ་འབྲེལ་ཚོས་ཐབས་ཤེས་གང་ཡོང་གིས་རྩད་ཞིབ་བྱས་ཀྱང་གོང་གསལ་དུས་ཚོད་དེའི་ནང་འཛིན་བཟུང་དུ་ཚུད་པའི་དགེ་འདུན་པ་གསུམ་ད་ལྟ་གར་ཡོད་ཤེས་རྟོགས་མེད་པར་གྱུར་ཡོད་པ་སྟེ།
དཀོན་མཆོག་ཉི་མ།
༡༽འཇམ་དཔལ་དབང་ཕྱུག སྐྱ་མིང་ཚེ་འཕེལ། རང་ལོ་ ༥༤ སྐྱེས་ཡུལ་འཕན་པོ་ལྷུན་གྲུབ་རྫོང་མཚོ་སྟོད་ཤང་། འབྲས་སྤུངས་དགོན་བློ་གསལ་གླིང་དགེ་བསྐོས་ཟུར་པ།
༢༽དཀོན་མཆོག་ཉི་མ། རང་ལོ་ ༤༢ སྐྱེས་ཡུལ་ཨ་མདོ་ཁུལ་ནས་ཡིན་པ། འབྲས་སྤུངས་སྒོ་མང་དཔེ་ཆའི་དགེ་རྒན།
༣༽ངག་དབང་ཆོས་ཉིད། སྐྱ་མིང་སྐལ་ལྡན། རང་ལོ་ ༣༨ སྐྱེས་ཡུལ་ལྷ་ས་ཤ་སར་ཟུར། འབྲས་སྤུངས་སྔགས་པ་གྲྭ་ཚང་གི་དཔེ་ཆའི་དགེ་རྒན་བཅས་གོང་གསལ་དགེ་འདུན་པ་གསུམ་སྔ་ལོའི་ཞི་རྒོལ་རྗེས་དགོན་པ་ནས་ཟླ་བ་གཅིག་ཙམ་རྗེས་ནག་ཉེས་ཇི་ཡིན་ཁ་གསལ་མེད་པར་འཛིན་བཟུང་བྱས་རྗེས་དཀོན་མཆོག་ཉི་མ་ལགས་ཕ་ཡུལ་དུ་བསྐྱལ་ཡོད་སྐོར་ཐོན་ཡོད་ཀྱང་ད་ལྟ་ཕ་ཡུལ་དུ་མཐོང་རྒྱུ་མེད་པ་དང་།
ངག་དབང་ཆོས་ཉིད།
ངག་དབང་ཆོས་ཉིད་དང་འཇམ་དཔལ་དབང་ཕྱུག་གཉིས་དེ་སྔ་འབྲས་གྲྭ་གྲངས་ ༤༢ ཙམ་ལོ་ཚད་བཟོས་པའི་ཁོངས་ཡོད་པའི་གནས་ཚུལ་སོགས་ཐོན་ཡོད་ཀྱང་། ད་ལྟ་ཁོང་གསུམ་པོ་ལྷ་ས་དང་ཉེ་ཁུལ་བཙོན་ཁང་ཡོད་ཚད་ནང་རྩད་ཞིབ་བྱས་ཀྱང་རྩ་བ་ནས་ཤེས་རྟོགས་མེད་པར་གྱུར་ཡོད་པ་རེད།།
