༢༠༠༩ ཕྱི་ཟླ་ ༡༢ ཚེས་ ༡༡ རེས་གཟའ་ཕུར་བུ།
༄༅། །བོད་རྒྱལ་ལོ་ ༢༡༣༦ བོད་ཟླ་ ༡༠ ཚེས་ ༢༤ ཕྱི་ལོ་ ༢༠༠༩ ཕྱི་ཟླ་ ༡༢ ཚེས་ ༡༠ ཉིན་གངས་ལྗོངས་བོད་རྒྱལ་ཁབ་ཆེན་པོའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་ལྷ་མིའི་རྣམ་འདྲེན་༸སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་
འཛམ་གླིང་ནང་སྙན་གྲགས་ཤིན་ཏུ་ཆེ་བའི་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ཉི་ཤུ་འཁོར་བའི་དུས་ཆེན་དང་། ཧི་མ་ཅལ་གཞུང་ནས་རྗེས་དྲན་གྱི་དགའ་སྟོན་ཐེངས་བཅུ་བཞི་པ། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་བཅས་གལ་ཆེའི་དུས་ཆེན་གསུམ་འཛོམས་འཁེལ་གྱི་ཡོད་པ་ལྟར་འདི་ག་བཞུགས་སྒར་ཐེག་ཆེན་ཆོས་
གླིང་གཙུག་ལག་ཁང་དུ་གཞུང་འབྲེལ་གྱི་དུས་དྲན་མཛད་སྒོ་རྒྱ་ཆེ་ཞིག་སྲུང་བརྩི་གཟབ་རྒྱས་ཞུས་ཡོད་པ་རེད། དེ་ཉིན་སྔ་དྲོ་ཆུ་ཚོད་ ༩ ཐོག་དཔལ་ལྡན་ཁྲིམས་ཞིབ་པ་ཆེ་བ་མཆོག་གིས་དབུས་ཁྲིམས་ཞིབ་པ་གཞན། བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་དབུས་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོ་ཚོགས་
གཞོན་མཆོག་གིས་དབུས་སྤྱི་འཐུས་རྒྱུན་ལས་རྣམ་པ། དྲུང་ཆེ་ཆུང་རྣམ་པས་གཙོས་གཞུང་ཞབས་ལས་བྱེད་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན་རྣམ་པ་བཞུགས་གྲལ་དུ་འཁོད་བསྟུན་བོད་གཞུང་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་གཏོང་སྐབས་དཔལ་ལྡན་བཀའ་བློན་ཁྲི་ཚབ་ཆོས་རིག་བཀའ་བློན་མཆོག་ནས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་།
དེ་རྗེས་བོད་གཞུང་ཟློས་གར་ཚོགས་པས་ནོ་བེལ་ཞི་བདེའི་གཟེངས་རྟགས་ཀྱི་བསྟོད་དབྱངས་ཕུལ་གྲུབ་རྗེས་བཀའ་བློན་ཁྲི་ཚབ་མཆོག་ནས་བཀའ་ཤག་གི་གཏམ་བཤད་གནང་གྲུབ་བསྟུན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་སྤྱི་འཐུས་ཀྱི་གཏམ་བཤད་གནང་། དེ་ནས་གཞུང་ཞབས་འདེམས་བསྐོ་ལྷན་ཁང་གི་དྲུང་ཆེ་སྣང་ས་ཆོས་སྒྲོན་ལགས་ནས་སྲི་ཞུ་བ་བགྲེས་ཡོལ་དུ་ཕེབས་མི་རྣམས་ངོ་སྤྲོད་དང་སྦྲགས་དཔལ་ལྡན་བཀའ་བློན་ཁྲི་ཚབ་མཆོག་ནས་ལེགས་སྐྱེས་གསོལ་སྩལ་གནང་། དེ་རྗེས་བོད་གཞུང་འཕྲོད་བསྟེན་ལས་ཁུངས་ནས་འཕྲོད་བསྟེན་ཁྱབ་ཁོངས་ཞབས་ལོ་ ༢༥ འཁོར་བའི་ལས་བྱེད་རྣམ་པར་ལེགས་མཚོན་བྱ་དགའ་གནང་རྒྱུར་ཟུང་དྲུང་ཚེ་རིང་དབྱངས་སྐྱིད་ལགས་ནས་ངོ་སྤྲོད་དང་འབྲེལ་དཔལ་ལྡན་བཀའ་བློན་ཁྲི་ཚབ་མཆོག་ནས་བྱ་དགའ་གསོལ་སྩལ་གནང་གྲུབ་མཚམས་ནོར་ཝེ་བོད་ཀྱི་རོགས་ཚོགས་ནས་པར་སྐྲུན་གནང་བ་དང་སྒྲོལ་དཀར་ལགས་ནས་བོད་ཡིག་ཐོག་བསྒྱུར་བ་བོད་རིགས་རྩོམ་པ་པོ་ཚེ་རིང་འོད་ཟེར་ལགས་ནས་རྒྱ་ཡིག་ཐོག་བརྩམས་པ་༼གསར་བརྗེ་༽ཞེས་པ་བོད་བསྒྱུར་ཞུས་པའི་དེབ་གསར་པ་དང་། དེ་བཞིན་བོད་མིའི་ཚོང་ལས་བདེ་ཚོགས་ནས་གསར་བསྐྲུན་ཞུས་པ་༼རྒྱ་གར་ནང་ཚོང་འབྲེལ་བྱེད་ཐབས་༽ཞེས་པ། བོད་གཞུང་ཕྱི་དྲིལ་ལས་ཁུངས་ནས་པར་སྐྲུན་ཞུས་པ་༼གྲགས་ཅན་མི་སྣས་བོད་དོན་གླེང་བ༽ཞེས་པ་རྣམས་རིམ་བཞིན་བཀའ་བློན་ཁྲི་ཚབ་མཆོག་གིས་དབུ་འབྱེད་གནང་བ་དང་ཕྱོགས་མཚུངས་སྒྲོན་མེ་རྩོམ་སྒྲིག་ཁང་ནས་འདི་ལོ་བོད་གཞིས་བྱེས་གཉིས་སུ་གྱེས་ནས་མི་ལོ་ཧྲིལ་པོ་ལྔ་བཅུ་འཁོར་བའི་སྐབས་དང་བསྟུན་སྒྲོན་མེ་ཆེད་རྩོམ་འགྲན་བསྡུར་གོ་སྒྲིག་གིས་༼ཤེས་རྟོགས་དང་ལག་ལེན་༽ཞེས་པའི་གསར་བསྐྲུན་ཞུས་པའི་དེབ་བཀའ་བློན་ཁྲི་ཚབ་མཆོག་གིས་དབུ་འབྱེད་དང་འབྲེལ་འགྲན་ཞུགས་བྱ་དགའ་ཐོབ་མཁན་རྣམས་ལ་ལེགས་སོའི་བྱ་དགའ་གསོལ་སྩལ་ཡང་གནང་ཡོད། དེ་ནས་བོད་གཞུང་ཟློས་གར་ཚོགས་པ་དང་ཐང་སྟོང་གླུ་གར། གངས་སྐྱིད་ལས་བྱེད་ཁག་གཅིག དེ་བཞིན་རྡ་སའི་ཉེ་འཁོར་དུ་གནས་པའི་སློབ་གྲྭ་ཁག་བཅས་ནས་མཛད་གཙོ་རྣམ་པ་དང་སེར་སྐྱ་མི་མང་ཁྱོན་མི་གྲངས་སྟོང་ཕྲག་བརྒལ་བ་རྣམས་ལ་གཞས་སྣ་ཁག་ ༡༡ ཙམ་འཁྲམ་སྟོན་ཞུས་ཏེ་སྔ་དྲོའི་མཛད་སྒོ་ལེགས་པར་གྲུབ་པ་དང་ཆབས་ཅིག་ཉིན་རྒྱབ་ཧིན་བོད་མཛའ་འབྲེལ་ཚོགས་པས་གོ་སྒྲིག་ཞུས་ཐོག་རྡ་སའི་ཉེ་འཁོར་དུ་གནས་པའི་རྒྱ་གར་སློབ་གྲྭ་ཁག་དང་དེ་བཞིན་བོད་པའི་སློབ་གྲྭ་ཁག་སོགས་ནས་ཀྱང་གཞས་སྣ་ཁག་གཅིག་འཁྲབ་སྟོན་གྱིས་དུས་དྲན་སྲུང་བརྩི་གཟབ་རྒྱས་ཞུས་ཡོད།
