༢༠༠༩ ཕྱི་ཟླ་ ༡༢ ཚེས་ ༨ རེས་གཟའ་མིག་དམར།
༸གོང་ས་མཆོག་ལ་ཊསི་མ་ནི་ཡ་གཙུག་ལག་སློབ་གྲྭ་ཆེན་མོའི་གཙོ་འཛིན་ནས་ཕེབས་བསུ་ཞུ་བཞིན་པ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༤ ཉིན་ནིའུ་ཛི་ལནཌིའི་རྒྱལ་ཁབ་ནང་རྟེན་གཞི་བྱས་པའི་༸གོང་ས་མཆོག་གདན་ཞུ་ཚོགས་ཆུང་ནས་ཇི་ལྟར་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་གྱི་ཨོ་སི་ཊོ་ལི་ཡ་ནས་ནིའུ་ཛི་ལནཌིར་ཆིབས་སྒྱུར་སྐྱོང་སྐབས་། ༸གོང་ས་མཆོག་གདན་ཞུ་ཚོགས་ཆུང་གི་ཚོགས་གཙོ་ཚེ་བརྟན་སྐལ་བཟང་ལགས་དང་། ནིའུ་ཛི་
༸གོང་ས་མཆོག་ནས་ཧོ་བྷཊ་ལ་བཀའ་སློབ་སྩོལ་བཞིན་པ།
ལནཌིར་ཡོད་པའི་རྒྱ་གར་གཞུང་ཚབ་ཀྱི་ལས་བྱེད་རྣམ་པ། དེ་བཞིན་སེར་སྐྱ་མི་མང་ཧ་ཅང་མང་པོས་ལག་ཏུ་དཀར་གཙང་མཇལ་དར་དང་བདུག་སྤོས་སོགས་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། དེ་ཉིན་༸གོང་ས་༸སྐྱབས་མགོན་ཆེན་པོ་མཆོག་བཞུགས་གནས་མགྲོན་ཁང་དུ་༸ཞབས་སོར་འཁོད་རྗེས་ནིའུ་ཛི་ལནཌིའི་ངལ་རྩོལ་ཚོགས་པའི་ཚོགས་གཙོ་ཕིལ་གོཕ་ (PhilGoff) མཆོག་དང་མཇལ་འཕྲད་ཀྱང་མཛད་ཡོད། སྐབས་དེར་ཁོང་གིས་༸གོང་ས་མཆོག་ལ་འཚམས་འདྲི་ཞུས་ཡོད། དེ་ནས་མགོན་པོ་གང་ཉིད་མཆོག་གིས་ཕིལ་གོཕ་མཆོག་ལ་བོད་ཀྱི་གནད་དོན་ཐད་གསུང་མོལ་དང་ད་ལན་ནིའུ་ཛི་ལན་ཌིར་ཆིབས་སྒྱུར་བསྐྱངས་དགོས་པའི་རྒྱུ་མཚན་གཙོ་བོ་གཉིས་ཡོད་པའི་ནང་ནས་གཅིག་ནི་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཆོས་འབྲེལ་སྩལ་རྒྱུ་ཡིན་པ་དང་། གཉིས་པ་དེ་ནི་སེར་སྐྱ་མི་མང་རྣམས་ལ་ནང་སེམས་ཀྱི་ཞི་བདེ་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་སྐོར་བཀའ་ཕེབས་ཡོད། ཕྱི་ཟླ་ ༡༢ ཚེས་ ༥ ཉིན་༸གོང་ས་མཆོག་གིས་ནིའུ་ཛི་ལནཌིའི་གྲོང་ཁྱེར་ཨོཀ་ལེན་ཌིར་མི་མང་གཅིག་སྟོང་ ༡༠༠༠ བརྒལ་བར་ཝིཀ་ཊོར་ཨེ་རི་ན་ (Vector Arena) ཚོམས་ཆེན་དུ་ནང་སེམས་ཀྱི་ཞི་བདེ་ཐོག་བཀའ་སློབ་སྩལ་ཡོད། ཉིན་དེར་༸གོང་ས་མཆོག་གིས་ནིའུ་ཛི་ལནཌིར་གནས་སྡོད་བྱེད་བཞིན་པའི་གདོད་མའི་མི་རིགས་མའོ་རི་ (Maori) ལ་མཇལ་ཁ་སྩལ་བ་དང་། དེ་རྗེས་སོག་རིགས་ཁག་གཅིག་དང་། དེ་བཞིན་ནིའུ་ཛི་ལནཌིར་ཡོད་པའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་དང་མཇལ་འཕྲད་དང་གསུང་མོལ་མཛད་ཡོད་པ་མ་ཟད། ནིའུ་ཛི་ལནཌིའི་ལྗང་ཁུ་ཚོགས་པའི་འཐུས་མི་ཁག་གཅིག་ལ་མཇལ་ཁ་དང་གསུང་མོལ་མཛད་ཡོད། ༸གོང་ས་མཆོག་གིས་ནིའུ་ཛི་ལནཌིར་ཆིབས་སྒྱུར་བསྐྱངས་དགོས་པའི་རྒྱུ་མཚན་གཙོ་བོ་གཉིས་ཡོད། འཛམ་གླིང་ནང་བྱམས་བརྩེ་དང་ཆོས་ལུགས་ཕན་ཚུན་མཐུན་སྒྲིལ་དགོས་པ་དེ་གཉིས་ཡིན་ཞེས་དང་། དེ་བཞིན་༸གོང་ས་མཆོག་གིས་ད་ལྟའི་བོད་ནང་གི་གནད་དོན་དང་འཛམ་གླིང་གི་ཁོར་ཡུག་སོགས་ཀྱི་ཐོག་བཀའ་སློབ་སྩལ་ཡོད།
ཕྱི་ཟླ་ ༡༢ ཚེས་ ༦ ཉིན་ནིའུ་ཛ་ལནཌིར་ཡོད་པའི་བོད་རིགས་ནང་པའི་མཐུན་ཚོགས་ནས་མགོན་པོ་གང་ཉིད་མཆོག་ལ་ཇི་ལྟར་གསོལ་འདེབས་ཞུས་པ་བཞིན་གོང་འཁོད་ཀྱི་ཚོགས་ཁང་དེའི་ནང་མགོན་པོ་ཀླུུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་སློབ་སྩལ་ཡོད་པ་རེད། གཞན་ཡང་༸གོང་ས་མཆོག་ནིའུ་ཛི་ལནཌི་ཁུལ་གྱི་མཛད་འཕྲིན་རྣམས་ལེགས་གྲུབ་རྗེས་ཕྱི་ཚེས་ ༧ ཉིན་བསྐྱར་དུ་ཨོ་སི་ཊོ་ལི་ཡར་ཆིབས་སྒྱུར་བསྐྱངས་ཡོད་པ་རེད། ཕྱི་ཚེས་ ༨ ཉིན་ཨོ་སི་ཊོ་ལི་ཡར་རྟེན་གཞི་བྱས་པའི་༸གོང་ས་མཆོག་གདན་ཞུ་ཚོགས་ཆུང་ནས་ཇི་ལྟར་གསོལ་འདེབས་ཞུས་དོན་ལྟར། ༸གོང་ས་མཆོག་ནས་ཧོ་བྷཊ་ (Hobart) ཞེས་པར་སྙིང་རྗེའི་རྣམ་པ་འདྲ་མིན་ཐོག་མང་ཚོགས་ལ་བཀའ་སློབ་སྩལ། དེ་ནས་ཕྱི་ཚེས་ ༩ ཉིན་༸གོང་ས་མཆོག་མེལ་བོན་དུ་རྒྱལ་སྤྱིའི་ཆོས་ལུགས་མཐུན་སྒྲིལ་ཚོགས་འདུའི་མཇུག་བསྡོམས་ཐོག་ཆིབས་སྒྱུར་བསྐྱང་རྒྱུ་མ་ཟད་བཀའ་སློབ་ཀྱང་སྩལ་རྒྱུ་ཡིན་པ་བཅས་ཀྱི་གནས་བསྡུས་སུ།
