༢༠༡༤ ཟླ་ ༡༠ ཚེས་ ༡ རེས་གཟའ་ལྷག་པ།
༄༅། །ཕྱི་ཟླ་ ༩ ཟླ་མཇུག་ཙམ་ལ་འབྲི་རུ་རྫོང་། ཁུལ་ཤག་ཆུ་གྲོང་རྡལ་གྱི་ཝ་ཐང་འབྲོང་ངུར་བཀའ་བརྒྱུད་འཕེལ་རྒྱས་གླིང་དགོན་པའི་དགེ་འདུན་པ་དྲུག་རྒྱ་གཞུང་གིས་འཛིན་བཟུང་བྱས་པ་དང། ད་ལྟ་དགོན་པ་དམག་གིས་བསྐོར་ཞིང་དམ་བསྒྲགས་ཧ་ཅང་ཆེན་པོ་བྱེད་ཀྱི་ཡོད་འདུག
དེ་ཡང་ཕྱི་ལོ་ ༢༠༡༤ ཟླ་ ༩ ཚེས་ ༣༠ ཉིན་བརྒྱུད་ལམ་ཁག་གཅིག་ནང་གནས་ཚུལ་ཐོན་གསལ་ལྟར་ན། དགེ་འདུན་པ་དྲུག་ལས་གཉིས་ཝ་ཐང་གྲོང་ནས་ཡིན་པ་དང་། གཅིག་གི་ཕ་མིང་ལ་མ་ནེ་དགྲ་འདུལ་དང་། གཅིག་གི་ཕ་མིང་ལ་འབྱུང་གནས་ཞུ་ཡི་ཡོད་པ་དང་དགེ་འདུན་པ་ཁོང་ཚོ་ལོ་ཉི་ཤུ་ནང་ཡིན་པ་ཙམ་ལས། དགེ་འདུན་པ་གཞན་བཞིའི་གྲོང་པ་དང་ཁོང་ཚོའི་མིང་སོགས་ད་ལྟ་ཤེས་ཐུབ་ཀྱི་མི་འདུག
ཁོང་རྣམ་པ་འཛིན་བཟུང་བྱེད་དགོས་པའི་རྒྱུ་མཚན་ནི། དགོན་ཐོག་ཏུ་བཙུགས་པའི་རྒྱ་དར་ཕབས་ཏེ་མེར་སྲེག་བཏང་བའི་རྐྱེན་ཡིན་པ་མ་ཟད། ད་ལྟའི་ཆར་སྡེ་དགོན་གཉིས་དཀའ་ངལ་ཚད་མེད་ཀྱི་འོག་ཏུ་གནས་ཡོད་འདུག ཤག་ཝ་ཐང་འབྲོང་ངུར་དགོན་འདི་ནི་ཕྱི་ལོ་ ༡༢༥༨ ལོར་འབྲོང་ངུར་ཆོས་རྗེ་སྐུ་ཕྲེང་དང་པོ་རྒྱལ་བ་གངས་པ་རིན་ཆེན་འོད་ཟེར་གྱིས་ཕྱག་བཏབ་པའི་བཀའ་བརྒྱུད་ཀྱི་དགོན་རྙིང་ཞིག་ཡིན།
ཕྱི་ལོ ༡༩༦༩ ལོར་རྒྱ་ནག་གིས་དགོན་པར་བསྙད་དེ་རྩ་གཏོར་བཏང་བ་དང་། དགོན་བདག་འབྲོང་ངུར་ཆོས་རྗེ་བཅོ་ལྔ་པ་བསྟན་འཛིན་འགྲོ་འདུལ་འབྲི་རུ་རྫོང་ཟིང་འཁྲུག་སློང་མཁན་གྱི་ཉེས་མིང་གཡོགས་ཏེ། ཕྱི་ལོ ༡༩༧༠ འབྲི་རུ་རྫོང་དུ་སྲོག་ཁྲིམས་བཅད་པ་རེད། ཕྱི་ལོ་ ༡༩༨༠ ནང་ཉམ་གསོ་བྱས་ཡོད་འདུག་ལ་དགེ་འདུན་པ་རྣམས་ཀུན་སྤྱོད་ལེགས་པ་དང་ཨུ་ཡོན་རག་སྡིས་ཆུང་དུས་དགེ་འདུན་པ་བྱེད་མྱོང་བ་དང་ཁོང་ཐེངས་མང་ཕེབས་པ་སོགས་ལ་བརྟེན། རྒྱལ་གཅེས་ཆོས་གཅེས་ཀྱི་དགོན་པ་ཞིག་ཡིན་པར་རིམ་པ་ཁག་གིས་དཔང་ཡིག་ལན་མང་སྤྲད་མྱོང་བ་ཞིག་རེད། །
