༢༠༡༤ ཟླ་ ༩ ཚེས་ ༢༤ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༡༤ ཟླ་ ༡༠ ཚེས་ ༢ སྟེ་རྒྱ་གར་གྱི་བདག་ཉིད་ཆེན་པོ་གཱན་དྷི་མཆོག་གི་སྐུའི་འཁྲུངས་སྐར་དུས་ཆེན་ཉིན་དང་སྟབས་བསྟུན། ༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༥ འཁོར་བའི་དུས་དྲན་མཛད་སྒོ་སྲུང་བརྩི་ཞུ་རྒྱུ་ཡིན་འདུག དེ་ཡང་གོང་ཚེས་ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་མཛད་སྒོ་སྲུང་བརྩི་ཞུ་སྐབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་ཨ་རིའི་ལྕམ་སྐུ་ཇོ་ཌོ་ཝིལ་ཡེམ་སི་ Ms. Jody Williamsམཆོག་དང་། ཨི་རན་གྱི་ལྕམ་སྐུ་ཤི་རིན་ཨི་བྷ་ཌི་ Ms. Shirin Ebadi མཆོག་རྣམ་གཉིས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་ཞི་བདེའི་དབུ་ཁྲིད་གཉིས་མཉམ་ཞུགས་མཛད་རྒྱུ་ཡིན་འདུག དེ་ཡང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་དུས་དྲན་དང་འབྲེལ་བའི་སྐོར་གསུང་དོན།
འཛམ་གླིང་ས་ཕྱོགས་གང་ས་ནས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་དབུ་ཁྲིད་རྣམས་ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༥ འཁོར་བའི་དུས་དྲན་སྲུང་བརྩི་ཞུ་ཆེད་དམིགས་བསལ་ཆེད་ཕེབས་གནང་རྒྱུ་ཡིན་པ་འདིས། ༸གོང་ས་མཆོག་གིས་འགྲོ་བ་མིའི་བཟང་སྤྱོད་དང་ཆོས་ལུགས་མཐུན་སྒྲིལ། དེ་བཞིན་བོད་ཀྱི་རིག་གཞུང་སྲུང་སྐྱོབ་དང་གོང་འཕེལ་གཏོང་གནང་མཛད་རྒྱུའི་རླབས་ཆེན་གྱི་མཛད་ཁུར་གཙོ་བོ་གསུམ་གྱི་ཐོག་སྐུ་ངལ་འཛེམས་མེད་ཐོག་ཐུགས་བརྩོན་མཛད་བཞིན་པ་དེར་རྒྱབ་སྐྱོར་ཤུགས་ཆེ་ཞུ་བཞིན་ཡོད་པ་མཚོན་བཞིན་ཡོད། ཅེས་གསུངས། སྤྱིར་སྐབས་བཅུ་བཞི་པའི་བཀའ་ཤག་གིས་ཕྱི་ལོ་ ༢༠༡༤ ལོ་འདི་ནི་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་རྒྱུའི་ལོར་སྲུང་བརྩི་ཞུ་རྒྱུའི་གསལ་བསྒྲགས་སྔོན་སོང་ཟིན་རྗེས་གཞིས་བྱེས་བོད་མི་ཙམ་མ་ཟད། ༸གོང་ས་མཆོག་དང་ཞི་བདེ་ལ་དགའ་བའི་འཛམ་གླིང་མི་མང་ཚོས་མགོན་པོ་གང་ཉིད་མཆོག་ལ་དགའ་དད་སྤྲོ་གསུམ་གྱི་སྒོ་ནས་བཀའ་དྲིན་རྗེས་དྲན་ཞུས་དང་ཞུ་མུས་ཡིན་པར་བརྟེན། ཐེངས་འདིའི་མཛད་སྒོ་འདི་ལོ་རྒྱུས་ཐོག་མཛད་སྒོ་ཧ་ཅང་གལ་ཆེན་པོ་ཞིག་ལ་ངོས་འཛིན་ཞུ་ཆོག གཞན་ཡང་འདི་ལོའི་ཕྱི་ཟླ་ ༥ ནང་ནོར་ཝེའི་ཡུལ་གྱི་ནོ་བེལ་ཞི་བདེའི་གཟེངས་རྟགས་ལྷན་ཚོགས་ཀྱིས་༸གོང་ས་མཆོག་ལ་མགྲོན་འབོད་ཞུས་ནས་མགོན་པོ་གང་ཉིད་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༥ འཁོར་བའི་དུས་དྲན་གཟབ་རྒྱས་ངང་སྲུང་བརྩི་ཞུས་ཡོད།
སྐབས་དེར་ནོ་བེལ་ཞི་བདེའི་གཟེངས་རྟགས་ལྷན་ཚོགས་ཀྱི་ཚོགས་གཙོ་སྐུ་ཞབས་ཐོབ་ཇོན་ཇག་ལན་ཌི་ Thorbjørn Jagland མཆོག་གིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཚེ་མེད་ཞི་བའི་ལམ་ནས་བོད་མི་ཚོར་རང་དབང་བསྐྱར་གསོ་ཡོང་ཐབས་མཛད་པ་དང་ཁོར་ཡུག་སྲུང་སྐྱོབ་ཆེད་ཐུགས་བརྩོན་ཧ་ཅང་རྒྱ་ཆེ་མཛད་པ་དེར་ངོས་འཛིན་ཞུ་ཆེད་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཉིད་མཆོག་ནི་འཚེ་མེད་ཞི་བའི་ལམ་སྟོན་མཛད་མཁན་གྱི་ཆོས་ལུགས་དབུ་ཁྲིད་གཅིག་ཡིན་པར་བརྟེན། སྐྱེ་བོ་ཀུན་གྱིས་ཁོང་གི་བཀའ་སློབ་ཉན་རྒྱུ་དང་བཀའ་སློབ་ཞུ་ཡུལ་ཞིག་ཏུ་གྱུར་ཡོད། ཅེས་གསུངས།།
