༢༠༡༤ ཟླ་ ༩ ཚེས་ ༡༨ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༩ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མུམ་བྷེའི་གྲོང་ཁྱེར་ནང་གསར་འགོད་པའི་དྲི་བར་བཀའ་ལན་སྩོལ་སྐབས་བོད་ཀྱི་དཀའ་ངལ་དེ་རྒྱ་གར་གྱི་དཀའ་ངལ་ཡིན་པ་དང་། རྒྱ་དཀར་ནག་གཉིས་དབར་ཡུན་རིང་ནས་ས་མཚམས་ཀྱི་རྩོད་རྙོག་ཡོད་པ་དེ་དག་སེལ་ཐབས་ངེས་པར་དུ་བྱེད་དགོས། འོན་ཀྱང་ཐབས་ལམ་དེ་འཚེ་བའི་ལམ་ལ་མ་བརྟེན་པར་ཞི་བའི་ཐབས་ལམ་ཐོག་ནས་དཀའ་རྙོག་སེལ་ཐབས་བྱ་རྒྱུ་ཧ་ཅང་གལ་ཆེན་པོ་ཆགས་ཡོད།
ཕྱི་ལོ་ ༡༩༥༠ གོང་ལ་རྒྱ་གར་བྱང་ཕྱོགས་ས་མཚམས་སུ་དམག་མི་གཅིག་རྐྱང་མེད་ཀྱང་ཞི་བདེ་ལྷིང་འཇགས་ཡོད། སྔ་ཕྱི་མ་གཏོགས་རྒྱ་དཀར་ནག་གཉིས་ཀྱི་ས་མཚམས་ཀྱི་རྩོད་རྙོག་སེལ་དགོས་པ་ཆགས་ཡོད། དེར་བརྟེན་ཞི་བའི་སྒོ་ནས་རྩོད་རྙོག་སེལ་ཐབས་གནང་དགོས། ཞེས་བཀའ་ལན་སྩལ།
བརྙན་འཕྲིན་གཟིགས་ཆེད་འདིར་གནོན།
ཕྱོགས་མཚུངས་༸གོང་ས་མཆོག་གིས་རྒྱ་ནག་གི་སྲིད་འཛིན་ཞི་ཅིན་ཕིང་ནི་རྒྱ་ནག་གི་སྲིད་འཛིན་གཞན་དང་བསྡུར་བ་ཡིན་ན། ཕྲན་བུ་བསམ་བློ་གུ་ཡངས་ཡོད་པའི་འགོ་ཁྲིད་གཅིག་ཡིན་པར་བརྟེན། ཐེངས་འདིར་རྒྱ་གར་ནང་རྒྱལ་དོན་འཚམས་གཟིགས་སྐབས་རྒྱ་གར་ནས་བློ་སྐྱེས་ལེན་ཐུབ་པའི་ཡིད་ཆེས་ཡོད་སྐོར་དང་། ལྷག་པར་རྒྱ་དཀར་ནག་གཉིས་ཀྱི་འབྲེལ་ལམ་འདི་ཕན་ཚུན་གཅིག་གིས་གཅིག་ལ་ཡིད་ཆེས་བྱས་ནས་འབྲེལ་ལམ་གྱི་རྨང་གཞི་སྲ་བརྟན་ཞིག་འཛུགས་ཐུབ་པ་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་བཀའ་ལན་སྩལ།
