༢༠༡༤ ཟླ་ ༩ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༩ ཚེས་ ༥།༦ ཉིན་ཨི་ཊ་ལིའི་ (Italy) གྲོང་སྡེ་པོ་མ་ཡ་རུ་ (Pomaia) ཡུ་རོབ་བོད་རིགས་སྤྱི་མཐུན་ཚོགས་པའི་ཚོགས་གཙོའི་ཚོགས་འདུ་རྒྱས་འཛོམས་སྐབས་སྤྱིར་བོད་དོན་འཐབ་རྩོད་སོགས་དོན་མཚན་གལ་ཆེ་མང་པོར་གྲོས་བསྡུར་གནད་སྨིན་བྱུང་ཡང་། ཚོགས་མི་ཡོངས་ནས་ཆེས་གལ་འགངས་ཆེ་བའི་དོན་རྐྱེན་གླེང་གཞི་གཙོ་ཆེ་དང་བློ་ཡུལ་ལ་བརྗོད་དཀའ་བ་ནི་ཉེ་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་ཡུལ་གྲུ་ཁག་ཏུ་ཆིབས་སྒྱུར་བསྐྱངས་སྐབས་དམ་སྲི་དོལ་རྒྱལ་རྗེས་འབྲང་བ་ཉུང་ཤས་ཤིག་ནས་ཁུངས་ལུང་དང་དྲང་བདེན་རྩ་བ་ནས་མེད་པའི་མཚན་སྨད་ཞུ་བཞིན་པར་ཚོགས་ཕེབས་ཡོངས་ནས་བཟོད་མེད་ངོ་རྒོལ་གྱི་གསར་འགོད་གསལ་བསྒྲགས་ཤིག་སྤེལ་རྒྱུར་གྲོས་མཐུན་བྱུང་།
དེ་ཡང་ལོ་ཤས་ནས་༸གོང་ས་ལྷ་མིའི་རྣམ་འདྲེན་༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་ཨ་རི་དང་ཡུ་རོབ་རྒྱལ་ཁབ་ཁག་ཏུ་ཆིབས་སྒྱུར་བསྐྱངས་གནས་དུ་མར་རང་རིགས་ཁྲེལ་གཞུང་མེད་པ་དོལ་རྒྱལ་བསྟེན་གསོལ་བྱེད་མི་ཉུང་ཤས་ཤིག་དང་དེ་ཚོའི་དཔུང་རོགས་ཕྱི་མི་བསླུ་བྲིད་འོག་ཏུ་ཚུད་པ་ནང་པ་སངས་རྒྱས་པའི་བསྟན་པའི་རྗེས་འབྲང་ཡིན་ཁུལ་བྱེད་མཁན་འགས་བླུན་གཏམ་ཁུངས་མེད་ཀྱི་ངོ་རྒོལ་འབོད་སྒྲ་དང་ཕྲེད་དར་འཕྱར་བ་སོགས་མཚན་སྨད་ཞུས་དང་ཞུ་བཞིན་ལ་ཚོགས་བཅར་ཡོངས་ནས་ངོ་རྒོལ་དང་སྐྱོན་བརྗོད་མཐའ་གཅིག་ཏུ་བྱེད་རྒྱུ་དང་། དོལ་རྒྱལ་རྗེས་འབྲང་པ་དེ་རིགས་ཀྱིས་ནང་ཆོས་ལ་དད་གུས་དགའ་ཞེན་ཡོད་ཁུལ་ཙམ་ལས་དོན་དངོས་ཐོག་རྒྱ་དམར་གྱིས་བོད་ནང་སངས་རྒྱས་ཀྱི་བསྟན་པ་དང་རིག་གཞུང་རྩ་མེད་བཏང་དང་གཏོང་མུས་ཀྱི་སྲིད་བྱུས་དང་བྱ་སྤྱོད་ཐབས་སྡུག་ལ་ངོ་རྒོལ་བྱེད་མྱོང་མེད་ཅིང་། སངས་རྒྱས་ཀྱི་བསྟན་པ་འཛམ་གླིང་འདིའི་ནང་ཉི་འོད་ལྟར་སྤེལ་མཁན་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བསམ་ཡུལ་ལས་འདས་པའི་མཚན་སྨད་ངོ་རྒོལ་སྐད་འབོད་བྱེད་བཞིན་པ་ནི་ངོ་ཚ་ཁྲེལ་མེད་ཀྱི་བྱ་སྤྱོད་ཐ་ཤལ་ཞིག་དང་གཞི་མེད་སྐྱོན་བརྗོད་དུ་ངོས་འཛིན་ཐོག་རང་གཞན་གཉིས་ཕུངས་ཀྱི་ལས་འགུལ་དེར་ཡུ་རོབ་བོད་རིགས་ཚོགས་ཁག་གི་ཚོགས་གཙོའི་ཚོགས་འདུར་བཅར་བའི་ཚོགས་མི་ཡོངས་ནས་མཐའ་གཅིག་ཏུ་ངོ་རྒོལ་དང་མ་འོངས་པར་གདོང་ལེན་ནན་པོ་བྱ་རྒྱུའི་གསར་འགོད་གསལ་བསྒྲགས་སུ། ཨི་ཊ་ལིའི་གྲོང་སྡེ་པོ་མ་ཡ་ནས་ཕྱི་ལོ་ ༢༠༡༤ ཟླ་ ༩ ཚེས་ ༦ ལ།།
