༢༠༡༤ ཟླ་ ༩ ཚེས་ ༦ རེས་གཟའ་སྤེན་པ།
༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ནས་བོད་མིའི་ཚོང་ལས་ཡར་རྒྱས་གཏོང་ཕྱོགས་ཀྱི་ལས་གཞིའི་སྐོར་གཞིས་ཆགས་ཀྱི་མང་ཚོགས་ལ་གོ་རྟོགས་སྤེལ་འདུག
དེ་ཡང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བོད་མིའི་ཚོང་ལས་ཡར་རྒྱས་ཚན་པའི་འབྲེལ་ཡོད་ལས་བྱེད་གཉིས་ཀྱིས་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཏུ་བོད་མིའི་ཚོང་ལས་ཡར་རྒྱས་ཀྱི་རམ་འདེགས་ཞེས་པའི་ལས་གཞིའི་འོག་ཕྱི་ལོ་ ༢༠༡༤ ཟླ་ ༩ ཚེས་ ༣ ཉིན་འབྲེལ་ཡོད་ལས་བྱེད་གཉིས་ཀྱིས་སྦེལ་ཀོབ་བོད་མིའི་གཞིས་ཆགས་ཀྱི་མང་ཚོགས་ལ་གོ་རྟོགས་སྤེལ་སྐབས་གསུང་གསལ། ལས་གཞི་འདིའི་དགོས་དམིགས་གཙོ་བོ་ནི་བཀའ་ཤག་གི་དགོངས་དོན་བོད་མིའི་གཞིས་ཆགས་ཁག་སྲ་བརྟན་རྒྱུན་གནས་ཡོང་ཐབས་ཀྱི་ཆེད་གཞོན་སྐྱེས་ཁྱད་ལས་མང་དག་ཅིག་གསོ་སྐྱོང་གནང་སྟེ། གཞོན་སྐྱེས་རྣམ་པར་ལས་ཀའི་གོ་སྐབས་ཐོབ་པ་བྱེད་རྒྱུ་དེ་ཆགས་ཡོད། སྤྱིར་བཏང་ལས་གཞི་དེའི་ནང་ཚོང་གི་ལས་འཆར་བཟོ་སྟངས་ཀྱིས་གཙོས་ཁྲིམས་ལུགས་དང་མཐུན་པའི་ཚོང་ལས་གཉེར་ཕྱོགས། མ་རྩ་བཀོད་སྒྲིག་བྱེད་ཕྱོགས། དེབ་སྐྱེལ་བྱེད་ཕྱོགས། ཚོང་འབྲེལ་བྱེད་ཕྱོགས་བཅས་ལས་འཆར་མང་དག་ཅིག་ཡོད། ཅེས་སོགས་ཀྱི་ངོ་སྤྲོད་གནང་ཡོད་པ་མ་ཟད། མོན་གྷོ་འདོད་རྒུ་གླིང་གི་མི་མང་ཚོགས་ཁང་ནང་གོང་མཚུངས་ལྟར་མང་ཚོགས་ལ་ལས་གཞི་དེའི་སྐོར་གོ་རྟོགས་དང་འགྲེལ་བརྗོད་གནང་འདུག
