༢༠༡༤ ཟླ་ ༩ ཚེས་ ༣ རེས་གཟའ་ལྷག་པ།
༄༅། །འདི་གར་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་བཅར་བ་འཐུས་མི་ཡོངས་ནས་ཕྱི་ལོ་ ༢༠༡༤ ཟླ་ ༩ ཚེས་ ༣ ཉིན་བཏང་གནས་ནང་འཁོད་དོན། བར་ལམ་ཞིག་ནས་རང་གཞན་གཉིས་ཕུངས་ཀྱི་བྱ་བར་ཞུགས་པའི་ལོག་འདྲེན་པ་རེ་ཟུང་གིས་བསླུ་བྲིད་འོག་རྒྱལ་ཞེན་བྲལ་ལ། མི་རིགས་ཀྱི་ལ་རྒྱ་ཡོངས་སུ་སྤངས་བའི་བོད་རིགས་དང་བོད་རིགས་མ་ཡིན་པ་དམ་སྲི་དོལ་རྒྱལ་བསྟེན་གསོལ་བྱེད་མཁན་གྱི་སྡེ་ཚན་འགའ་ཞིག་ནས། མངོན་སུམ་འཛེམས་མེད་ཀྱིས་བོད་མི་སྤྱི་བོ་གནམ་བསྟན་ཡོངས་ཀྱི་ལྟ་བའི་མིག་དང་ཁོག་པའི་སྙིང་ལྟ་བུའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཨ་རི་དང་། ཡུ་རོབ་སོགས་ཕྱིའི་རྒྱལ་ཁབ་ཁག་ཏུ་ཆིབས་སྒྱུར་བསྐྱངས་སྐབས་གཞི་རྩ་བྲལ་ལ་དྲང་བདེན་མིན་པའི་སྐྱོན་བརྗོད་དང་། ངོ་རྒོལ། དེ་བཞིན་སྐུའི་གསང་གསུམ་ལ་མཚན་སྨད་ཞུས་དང་ཞུ་བཞིན་ཡོད་པ་མ་ཟད ལྷག་པར་དོལ་རྒྱལ་རྗེས་འབྲང་པས། ཆོས་དད་རང་དབང་མེད་ཚུལ་སོགས་གཞི་མེད་སྐྱོན་བརྗོད་སྣ་མང་བྱེད་བཞིན་པ་དེ་དག་ནི། ཁྲིམས་ལུགས་དང་རྒྱུ་མཚན་གྱི་གཞི་རྟེན་གང་ཡང་མེད་པའི་ར་སྤྲོད་གསལ་པོ་ཞིག་རྒྱལ་སྤྱི་ཉེས་ཡངས་ཚོགས་པ་དང་། ལྡི་ལིར་རྟེན་གཞི་བྱས་པའི། རྒྱལ་ཡོངས་འགྲོ་བ་མིའི་ཐོབ་ཐང་ལྷན་ཚོགས་ནས་ས་རིས་ཐང་གསལ་བཟོས་ཟིན་པ་ཡིན། ལར་ནས། ཉི་ཤར་སྦར་མོས་འགོག་ཐབས་མེད་ཀྱང་།
སྤྱིར་རྒྱལ་བསྟན་ཡོངས་ཀྱི་མངའ་བདག ཁྱད་པར་འཛམ་གླིང་ཞི་བདེའི་དེད་དཔོན་ཆེན་པོ། ཡང་སྒོས་བོད་མི་ས་ཡ་དྲུག་གི་འདི་དང་ཕྱི་མའི་སྐྱབས་གནས་དམ་པ་གང་ཉིད་མཆོག་ལ་མཚན་སྨད་ཞུ་མུས་ཀྱི་ཐ་ཤལ་བྱ་བ་འདི་དག་གིས་གཞིས་བྱེས་བོད་མི་ཡོངས་དང་། མགོན་པོ་གང་གི་སྐྱབས་འོག་ཡོད་པའི་གདུལ་བྱ་ཡོངས་ཀྱི་སྙིང་ལ་བཟོད་མི་ཐུབ་པའི་རྨ་ཁ་དང་། ཟུག་རྔུ་དྲག་པོ་སྦྱིན་བཞིན་ཡོད་སྟབས། བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་བཅར་བ་འཐུས་མི་ཡོངས་ནས་ངོ་རྒོལ་དང་སྐྱོན་བརྗོད་མཐའ་གཅིག་ཏུ་ཞུ་རྒྱུའི་གསར་འགོད་གསལ་བསྒྲགས་སུ། ཨ་རིའི་རྒྱལ་ས་ཝ་ཤིང་ཊོན་ནས་ཕྱི་ལོ་ ༢༠༡༤ ཟླ་ ༩ ཚེས་ ༡ ལ།།
