༢༠༡༤ ཟླ་ ༨ ཚེས་ ༢༩ རེས་གཟའ་པ་སངས།
༄༅། །འདི་གར་རྡོར་གླིང་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༨ ཚེས་ ༢༦ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད ༡༠ ཐོག་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་རྡོར་གླིང་ཏ་ར་མགྲོན་ཁང་ནས་ཕེབས་ཐོན་གྱིས་རང་འཚོ་བཟོ་གྲྭར་འབྱོར་བ་དང་བཟོ་གྲྭའི་འགན་འཛིན་རྡོ་རྗེ་ཚེ་བརྟན་ལགས་ཀྱིས་ཕེབས་བསུ་དང་བཅས་བཟོ་གྲྭའི་ཚོགས་ཁང་ནང་ཁྱོན་མི་གྲངས་དྲུག་ཅུ་ཙམ་ལ་གསུང་བཤད་གནང་།
ཉིན་རྒྱབ་ཆུ་ཚོད་གཉིས་པའི་ཐོག་རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་འཛིན་ཁང་ལ་འཚམས་གཟིགས་གནང་། སྐབས་དེར་རིག་གཞུང་གཅེས་འཛིན་ཁང་གི་དྲུང་ཆེ་ཚེ་རིང་ནོར་བུ་ལགས་ཀྱིས་རིག་གཞུང་གཅེས་འཛིན་ཁང་གི་ལས་བསྡོམས་སྙིང་བསྡུས་སྒྲོགས་སྦྱང་དང་བཅས་རིག་གཞུང་གཅེས་འཛིན་ཁང་གི་འགན་འཛིན་ལྷན་འཚོགས་མཉམ་བཞུགས་མོལ་ཚོགས་འདུ་གནང་།
ཕྱི་ཚེས་ ༢༧ ཉིན་རྡོར་གླིང་ནས་སྔ་དྲོ་ཆུ་ཚོད་བརྒྱད་པའི་ཐོག་ཕེབས་ཐོན་གྱིས་མི་རིག་བོད་མིའི་སྤྱི་ཁང་ནང་ཆུ་ཚོད་བཅུ་པར་འབྱོར་ནས་མང་ཚོགས་ཉི་ཤུ་ལྷག་ཙམ་ལ་གསུང་བཤད་གནང་།
ཕྱེད་ཡོལ་ཆུ་ཚོད་དང་པོར་མི་རིག་འབོ་དཀར་ངེས་དོན་ཆོས་འཁོར་གླིང་དགོན་པའི་མཁན་རིན་པོ་ཆེ་མཇལ་བཅར་དང་འབྲེལ། དགོན་པར་གནས་གཟིགས་དང་གུང་ཚིགས་དགོན་པས་འདེགས་འབུལ་ཞུས། དེ་རྗེས་འབོ་དཀར་དགོན་པའི་ཉིན་སློབ་འཛིན་གྲྭ་ཁག་ལ་གཟིགས་སྐོར་ད
ང་དགེ་ལས་སློབ་མ་རྣམས་ལ་འཚམས་གཟིགས་གནང་།
ཕྱི་ཚེས་ ༢༨ ཉིན་གྱི་སྔ་དྲོ་ཆུ་ཚོད་དགུ་པའི་ཐོག་རྡོར་གླིང་མི་མང་ཚོགས་ཁང་ནང་ཁྲོམ་གཞུང་བོད་རིགས་མང་ཚོགས་རྣམས་ལ་དབུ་མའི་ལམ་གྱི་སྐོར་གསུང་བཤད་གནང་རྗེས་མང་ཚོགས་ཀྱི་དྲི་བར་ལན་འདེབས་གནང་། ཕྱེད་ཡོལ་ཆུ་ཚོད་གཉིས་པ་ནས་གསུམ་དང་ཕྱེད་ཀའི་བར་རྡོར་གླིང་ཁྲོམ་གཞུང་རང་འཚོ་བཟོ་གྲྭའི་ཕྱི་ལུགས་སྨན་ཁང་དང་པར་ཁང་སོགས་ལ་གཟིགས་སྐོར་གནང་ཡོད།
