༢༠༡༤ ཟླ་ ༨ ཚེས་ ༢༦ རེས་གཟའ་མིག་དམར།

༄༅། ། ཕྱི་ལོ་ ༢༠༡༤ ཟླ་ ༨ ཚེས་ ༢༡ ནས་ཚེས་ ༢༢ བར་ཉིན་གཉིས་རིང་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་དཔལ་ལྡན་ཁྲིམས་ཞིབ་པ་ཆེ་བ་མཆོག་དང་། ཁྲིམས་ཞིབ་པ་ངག་དབང་ཆོས་གྲགས་མཆོག སྤྱི་ཁྱབ་ཁྲིམས་དྲུང་། བྱང་ཕྱོགས་དང་ལྷོ་ཕྱོགས། ལ་དྭགས། ཤར་ཕྱོགས་བཅས་ཟུར་བཙུགས་ས་གནས་ཁྲིམས་ཞིབ་ཁང་བཞིའི་ཁྲིམས་ཞིབ་པ་དང་ཁྲིམས་དྲུང་། དེ་བཞིན་བལ་ཡུལ་འཇོ་ལ་ཁེལ་དང་། གློ་སྒྲིག བཀྲ་ཤིས་དཔལ་འཁྱིལ། བཀྲ་ཤིས་གླིང་བཅས་གཅིག་ལྕོགས་ས་གནས་ཁྲིམས་ཞིབ་ཁང་བཞིའི་ཁྲིམས་ཞིབ་པ་དང་ཁྲིམས་དྲུང་བཅས་ལྷན་འཛོམས་ཐོག་ཁྲིམས་འཛིན་ཚོགས་འདུ་ཐེངས་བཞི་པ་བསྐོངས་འཚོགས་གནང་ཡོད་པ་དང་།

ཕྱི་ཚེས་ ༢༡ ཉིན་གྱི་དབུ་འབྱེད་མཛད་སྒོའི་སྐུ་མགྲོན་གཙོ་བོར་དཔལ་ལྡན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་སྟན་འཕེལ་མཆོག་ངོ་ཕེབས་ཀྱིས། ཆེས་མཐོའི་ཁྲིམས་ཞིབ་ཁང་གི་ཁྲིམས་འཛིན་དྲ་རྒྱ་ trimzin.org དབུ་འབྱེད་དང་སྦྲགས། བོད་མིའི་སྒྲིག་འཛུགས་ཀྱི་ད་ལྟའི་གྲུབ་འབྲས་འདི་དག་གི་རྒྱབ་ལྗོངས་དང་འཕེལ་རིམ་ནས་གླེང་བསླངས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོའི་ཐུགས་རྗེ་བྱིན་རླབས་དང་། བོད་མིའི་སྤྱི་མཐུན་བསོད་ནམས་ཀྱི་འབྲས་བུ་གཅེས་སྲུང་དགོས་པའི་གཞེན་སྐུལ། ཁྲིམས་ལུགས་ཀྱི་ལྟ་གྲུབ་འཛིན་ཚུལ། ལྷག་བསམ་ཁྱེར་སྟངས། དྲང་བདེན་སྲུང་ཐབས་བཅས་ཀྱི་ཐོག་གསུང་བཤད་གནང་ཡོད་པ་དང་། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་ནས་ཁྲིམས་འཛིན་ལྷན་ཚོགས་ཐེངས་བཞི་པའི་དགོས་པ་དམིགས་ཡུལ་དང་། འདས་པའི་ལོ་ ༥ ཙམ་རིང་ཆེས་མཐོའི་ཁྲིམས་ཞིབ་ཁང་མ་ལག་དང་བཅས་པའི་ཁྲིམས་དོན་དང་འཛིན་སྐྱོང་ལས་དོན་ཐོག་འབད་བརྩོན་གནང་སྟངས་དང་། ད་ལྟ་འགྲོ་བཞིན་པ་དང་། མ་འོངས་ལས་འཆར་གལ་ཆེན་ཁག་ཅིག་ངོ་སྤྲོད་བཅས་ཀྱི་གསུང་བཤད་གནང་ཡོད།

ཚོགས་འདུ་ཉིན་གཉིས་ཀྱི་ཚོགས་ཐུན་ ༧ ཐོག་ཁྲིམས་ཞིབ་པ་ཆེ་བ་དབུ་བཞུགས་ཀྱིས་གྲོས་གཞི་དོན་ཚན་བཞི་རེ་རེར་དགོངས་འཆར་གསུང་གླེང་གནང་སྟེ། ཕྱི་ཚེས་ ༢༢ ཉིན་གྱི་ཆུ་ཚོད་ ༥ ཐོག་ཁྲིམས་ཞིབ་པ་ཆེ་བ་མཆོག་གིས་མཇུག་བསྡོམས་གསུང་བཤད་གནང་སྐབས། ཐེངས་འདིའི་ལྷན་ཚོགས་ལ་ཚད་མཐོའི་གདེང་འཇོག་གནང་བ་དང་སྦྲགས། གྲོས་གཞི་དོན་ཚན་དང་པོ་ཁྲིམས་སྒྲིག་བསྐྱར་བཅོས་ཐད། སྤྱི་མང་གཏུག་བཤེར་ཁྲིམས་ཡིག་གི་དོན་ཚན་ ༡༣ པ་དང་། ༡༩། ༢༣། ༢༤། ༢༦། ༣༢། ༣༥། ༣༦། ༣༩། ༤༡། ༤༥། ༤༧། ༧༦། བཅས་ལ་དགོས་ངེས་ཀྱི་ཁ་གསལ་མེད་རིགས་གསལ་བཟོ་དང་། གསར་སྣོན་དགོས་པའི་བསྐྱར་བཅོས་གྱི་དགོངས་འཆར་གནང་བ་དེ་དག་ཕལ་ཆེ་བ་ཡིག་ཐོག་ཏུ་ཡོད་པ་མ་ཟད། དགོས་པ་རྒྱུ་མཚན་དང་། ཡུལ་ཁྲིམས་ཀྱི་ཆ་རྐྱེན་དང་གནང་བ་ཇི་ཡོད་ཁྲིམས་ཡིག་ལུང་འདྲེན་བྱས་ཡོད་པ་དང་། དེ་བཞིན་བཙན་བྱོལ་བོད་མིའི་བཅའ་ཁྲིམས་དང་། འབྲེལ་ཆགས་སྒྲིག་གཞི་གཞན་གྱི་དོན་ཚན་ཁག་གཅིག་ལ་བསྐྱར་ཞིབ་དགོས་པའི་དགོངས་འཆར་ཡང་བྱུང་ཡོད།

གོང་གསལ་དགོངས་འཆར་ཁག་ཏུ། ཁྲིམས་སྒྲིག་ཁག་ལ་དགོས་ངེས་ཀྱི་བྱ་རིམ་དང་འགྲོ་ལུགས། ཆ་རྐྱེན། བྱེད་ཐབས་བཅས་གསར་སྣོན་ཇི་འོས་ཀྱི་ཐབས་ལམ་བསྟན་ཡོད་པ་དེ་དག་ཆེས་མཐོའི་ཁྲིམས་ཞིབ་ཁང་ནས་མ་འོངས་པར་ཁྲིམས་ཡིག་ཁག་ལ་བསྐྱར་བཅོས་གཏོང་རྒྱུའི་དཔྱད་གཞི་རྩ་ཆེན་ཆགས་རྒྱུ་དང་། འཕྲུལ་རིག་ཡར་རྒྱས་ཀྱི་གནས་སྟངས་ལ་བསྟུན་ཏེ། ཨི་མེལ་བརྒྱུད་བརྡ་ཐོ་གཏོང་རྒྱུ་དང་། བརྙན་འཕྲིན་དྲ་ལམ་ video conference བརྒྱུད་དཔང་པོ་འདོན་འབུལ་ཆོག་པའི་ཐབས་ལམ་བསྟེན་འོས་པའི་དགོངས་འཆར་གནང་བ་དེ་རིགས་སྤྱི་སྒེར་གཉིས་ཀར་ཕན་ཐོགས་ཡོང་རྒྱུ།

བཟའ་ཚང་འབྲལ་བཟླུམས་སྐོར་ལ་ཡུལ་ཁྲིམས་ཀྱི་དགག་ཆའམ་གནང་ཡོད་མེད་བགྲོ་གླེང་གནང་སྐབས། དེ་སྔ་ཡུལ་ཁྲིམས་སློབ་སྟོན་པ་སྐུ་ཞབས་མུ་ཁེ་ལགས་ཀྱིས་ལམ་སྟོན་སྔ་རྗེས་གནང་བ་ལྟར། ཁྲིམས་ཞིབ་ཁང་ནས་དེའི་ཐོག་གོམ་པ་སྤོ་རྒྱུར་བློ་བསྐྱེད་མི་དམན་ཙམ་བྱུང་བ་དང་། ད་དུང་མུ་མཐུད་ཞིབ་འཇུག་གིས་ངེས་པ་རྙེད་མཚམས་བྱེད་ཕྱོགས་གང་དགའ་བལྟ་རྒྱུ།

བོད་མི་མང་སྤྱི་འཐུས་ལྷན་ཚོགས་ནས་ཁ་མཆུའི་ཆད་འགེལ་རྣམ་གྲངས་དང་། ཆད་འགེལ་བྱེད་ཕྱོགས་གཏན་འབེབས་གནང་དགོས་ཀྱི་དགོངས་འཆར་དེ་སྔ་ཁྲིམས་འཛིན་ལྷན་ཚོགས་སྔ་མའི་སྐབས་སུའང་བྱུང་ཡོད་པ་དང་། ཐེངས་འདིར་བཅའ་ཁྲིམས་སུ་གཏན་འབེབས་གནང་བའི་ཁྲིམས་ལུགས་དབང་འཛིན་གྱི་ཁྲིམས་ཞིབ་ཁང་གི་ཁྲིམས་ཁོངས་ཁྱབ་ཚད་གཞིར་བཟུང་། སྤྱི་མང་ནོར་འཁྲུལ་ལམ། ཐོབ་ཐང་དོ་ཕོག་ tort གི་ཁྲིམས་ཡིག་དང་། འཛིན་སྐྱོང་གཏུག་བཤེར་ཁྲིམས་ཡིག་གཉིས་སྤྱི་ལྷན་ནས་གཏན་འབེབས་གནང་རྒྱུར་དུས་ལ་བབས་ཡོད་པའི་དགོངས་འཆར་དེ་ཆེས་མཐོའི་ཁྲིམས་ཞིབ་ཁང་ནས་ཀྱང་གལ་ཆེན་པོར་བརྩི་གི་ཡོད་ལ། འདི་སྔོན་ཐབས་ཤེས་ཀྱང་རིམ་པར་བྱས་པ་ཡིན། བྱང་ཕྱོགས་ས་གནས་ཁྲིམས་ཞིབ་པས་དེའི་སྐོར་ཡིག་ཐོག་ནས་དགོངས་འཆར་གནང་བའང་བྱུང་ཡོད། འདིའི་ཐོག་འབྲེལ་ཡོད་ལ་གོ་བསྡུར་དང་། སློབ་སྟོན་ཞུ་སྒོ། ལས་འཆར་སྒྲིག་སྟངས་སོགས་གོམ་པ་ག་འདྲ་སྤོ་དགོས་མིན་ཁྲིམས་ཞིབ་ལྷན་ཚོགས་སུ་བཀའ་བསྡུར་གནང་གི་ཡིན།

དེ་བཞིན་གྲོས་གཞི་དོན་ཚན་གཉིས་པ་ཁྲིམས་ཞིབ་ཁང་རིམ་པའི་ཁྲིམས་དོན་དང་འཛིན་སྐྱོང་བྱེད་སྒོ་གོང་མཐོར་གཏོང་ཕྱོགས་དང་། གསུམ་པ་ཁྲིམས་རྩོད་པ་སྐྱེད་སྲིང་དང། ནུས་རྩལ་མཐོར་འདེགས་བྱེད་ཕྱོགས། བཞི་པ་མང་ཚོགས་ལ་བཙན་བྱོལ་བོད་མིའི་ཁྲིམས་ལུགས་གོ་རྟོགས་སྤེལ་སྟངས་ཡར་རྒྱས་གཏོང་ཕྱོགས་བཅས་པར་ལག་ལེན་བསྟར་རུང་གི་དགོངས་འཆར་གང་མང་བྱུང་ཡོད་པ་དེ་དག་ཆེས་མཐོའི་ཁྲིམས་ཞིབ་ཁང་གི་དཔྱད་གཞི་གལ་ཆེན་ཆགས་རྒྱུ་ཡིན་སྐོར་སོགས་གསུངས་ཏེ། ལྷན་ཚོགས་ཀྱི་མཛད་རིམ་མཇུག་སྒྲིལ་གནང་ཡོད། །