གསར་འགོད་པ་ལྕམ་བྷེ་ཊི་ན་ཧན་སེན་ལགས་ཀྱི་ཆེད་དོན་དྲི་བར་བཀའ་ལན་སྩོལ་བཞིན་པ།
༢༠༡༤ ཟླ་ ༨ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༨ ཚེས་ ༢༣ ཉིན་༸གོང་ས་མཆོག་གིས་ཇར་མན་གྲོང་ཁྱེར་ཧམ་བྷག་གི་ཀོང་རེ་སི་ཚོགས་ཁང་དུ་མང་ཚོགས་ ༧༠༠༠ བརྒལ་བར་བཟང་སྤྱོད་ཐོག་བཀའ་སློབ་སྩལ་ཡོད། དེ་ཡང་༸གོང་ས་མཆོག་གིས་བཀའ་སློབ་དབུ་འཛུགས་མ་མཛད་གོང་ཐོག་མར་ (ZDF) ཞེས་པའི་ས་གནས་གསར་འགྱུར་བརྙན་འཕྲིན་ཁང་གི་བུད་མེད་ལས་རིམ་གཙོ་སྐྱོང་གནང་མཁན་གསར་འགོད་པ་ལྕམ་བྷེ་ཊི་ན་ཧན་སེན་ Bettina Hansen ལགས་ཀྱི་ཆེད་དོན་དྲི་བར་བཀའ་ལན་སྩལ། སྐབས་དེར་ཇར་མན་ཡུལ་དང་དམིགས་བསལ་འབྲེལ་བ་ཇི་ཡོད་སྐོར་གྱི་དྲི་བར་བཀའ་ལན་སྩོལ་སྐབས་༸གོང་ས་མཆོག་གིས་དེ་སྔ་བོད་ནང་གང་ཉིད་མཆོག་སྐུ་གཞོན་ནུའི་སྐབས་ནས་ཇར་མན་སྐད་རྒྱག་མཁན་ཨོ་སི་ཊི་རི་ཡའི་མི་རིགས་ཡིན་པ་སྐུ་ཞབས་པི་ཊར་ཨབ་ཤི་ནེ་ཊར་ལགས་དང་ཧེན་རིག་ཧེ་རར་གཉིས་དང་ཐུགས་འབྲེལ་ཧ་ཅང་ཆེན་པོ་ཡོད་སྐོར་བཀའ་ལན་སྩལ་བ་མ་ཟད། དམག་ཆེན་གཉིས་པའི་སྐབས་ཇར་མན་ཡུལ་ལ་དམག་འཁྲུག་གིས་གོད་ཆག་ཚབས་ཆེ་ཕོག་པ་དེར་ཐུགས་ཕམ་བྱུང་སྐོར་དང་ཕྱིས་སུ་ཡར་རྒྱས་ཚད་མཐོན་པོར་སོན་ཐུབ་པ་དེར་བསྔགས་བརྗོད་མཛད་བཞིན་ཡོད་སྐོར་སོགས་ཀྱི་བཀའ་ལན་སྩལ། དེ་རྗེས་གསར་འགོད་པས་༸གོང་ས་མཆོག་གི་ཐུགས་ནང་སྤྲོ་སྣང་ཇི་ལྟར་
ཡོང་མིན་གྱི་དྲི་བ་ཞུས་པར། མགོན་པོ་གང་ཉིད་མཆོག་གིས་སྐུ་ཉིད་འཛམ་གླིང་མི་འབོར་དུང་ཕྱུར་ ༡༣ ཡོད་ཁོངས་ཀྱི་ཆ་ཤས་ཤིག་ཡིན་བསམས་པའི་ཚོར་སྣང་དེར་ཐུགས་སྤྲོ་སྣང་ཡོང་བཞིན་ཡོད་སྐོར་བཀའ་ལན་སྩལ། དེ་རྗེས་༸གོང་ས་མཆོག་སྐུ་གཞོན་ནུའི་སྐབས་ཀྱི་བག་ཆགས་ཇི་འདྲ་ཞིག་ཡོད་སྐོར་གྱི་དྲི་བར་༸གོང་ས་མཆོག་གིས་བཀའ་ལན་སྩལ་དོན། ངོས་ཀྱི་ཨ་མ་ལགས་ཀྱི་བཞིན་རས་དྲན་གྱི་འདུག སྤྱིར་ངོས་ཀྱི་ཨ་མ་ལགས་ཤེས་ཡོན་ཅན་ཞིག་མིན་ཡང་ཐུགས་སེམས་ཧ་ཅང་བཟང་པོ་ཡོད། ཅེས་བཀའ་ལན་སྩལ།
དེ་རྗེས་ཆོས་ལུགས་ལ་བསྙད་ནས་ཉིན་ལྟར་འཁྲུག་རྩོད་དང་འཚེ་བའི་ལས་འགུལ་སྤེལ་བཞིན་པའི་གནས་སྟངས་སྐོར་གྱི་དྲི་བ་ཞུས་པར་བཀའ་ལན་སྩལ་དོན། འཇིག་རྟེན་བཀོད་པ་པོ་འདོད་མཁན་ཞིག་ཡིན་ན། སེམས་ཅན་ཐམས་ཅད་འཇིག་རྟེན་བཀོད་པ་པོས་བཀོད་པར་ཡིད་ཆེས་བྱེད་དགོས། དེར་བརྟེན་ང་ཚོ་ཚང་མ་དཀོན་མཆོག་གིས་བཟོས་པའི་གཅེན་གཅུང་ཤ་སྟག་ཡིན་པར་བརྟེན་ནང་ཕན་ཚུན་གསོད་རེས་བྱ་རྒྱུ་ཟེར་བ་ནི་བློ་ཡུལ་ལས་འདས་པ་ཞིག་ཡིན། ཞེས་སོགས་ཀྱི་བཀའ་ལན་སྩལ་ཡོད། དེ་རྗེས་༸གོང་ས་མཆོག་གིས་ཀོང་རེ་སི་ཚོགས་ཁང་དུ་མང་ཚོགས་ ༧༠༠༠ བརྒལ་བར་བཟང་སྤྱོད་སྐོར་གྱི་བཀའ་སློབ་སྩལ། དེ་ཡང་ཐོག་མར་༸གོང་ས་མཆོག་ཚོགས་ཁང་དུ་ཆིབས་སྒྱུར་བསྐྱངས་སྐབས་མང་ཚོགས་རྣམས་ཀྱིས་དགའ་བསུའི་ཐལ་མོ་བརྡབས་པ་དང་སྦྲགས། གུས་བཀུར་དང་ཆེ་མཐོང་ཞུ་སླད་ཚང་མ་སྐུ་བཞེངས་གནང་འདུག སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། ངོས་རང་དེ་རིང་འདིར་བཅར་རྒྱུ་བྱུང་བར་ཧ་ཅང་དགའ་པོ་བྱུང་།
ལྷག་པར་འདི་གའི་བོད་ཀྱི་བསྟི་གནས་ཁང་གིས་ནང་ཆོས
་སློབ་ཁྲིད་བྱ་རྒྱུ་ཙམ་མ་ཟད། ཆོས་ལུགས་རིས་མེད་ཀྱི་ལྟ་གྲུབ་དང་འབྲེལ་བའི་ནང་གི་བསམ་བློའི་རིན་ཐང་གོང་མཐོར་གཏོང་ཐབས་གནང་བཞིན་ཡོད། དེར་བརྟེན་ངོས་ཀྱི་བཀའ་དྲིན་ཆེ་ཟེར་རྒྱུ་ཡིན། ཞེས་བཟང་སྤྱོད་སྐོར་གྱི་བཀའ་སློབ་ཟབ་རྒྱས་སྩལ་བསྟུན། མང་ཚོགས་ཀྱི་དྲི་བར་བཀའ་ལན་སྩལ། ཉིན་གུང་ལྗགས་སྨིན་སྐབས་༸གོང་ས་མཆོག་གིས་ཇར་མན་གསར་འགྱུར་བརྙན་འཕྲིན་ཚན་པའི་དྲི་བར་བཀའ་ལན་སྩལ། སྐབས་དེར་དེང་སྐབས་རྒྱ་ནག་དེ་བཞིན་དཔལ་འབྱོར་དང་ཆབ་སྲིད་སོགས་གང་ཅིའི་ཐོག་ནས་ནུས་སྟོབས་ཆེ་རུ་འགྲོ་བཞིན་པར་བརྟེན་བོད་མི་ཚོར་རང་སྐྱོང་གི་གནས་བབ་འཐོབ་རྒྱུའི་རེ་བ་ཇི་ཙམ་ཡོད་སྐོར་གྱི་དྲི་བ་ཞུས་པར་བཀའ་ལན་སྩལ་དོན། དེང་སྐབས་རྒྱ་རིགས་ཤེས་ཡོན་ཅན་གྱི་མི་སྣ་མང་པོས་བོད་མིའི་གཞི་རྩའི་ཐོབ་ཐང་ལ་རྒྱབ་སྐྱོར་གནང་བཞིན་ཡོད་པ་མ་ཟད། ལྷག་པར་རྒྱ་རིགས་ནང་པ་ས་ཡ་སུམ་བརྒྱ་ལྷག་ཡོད་ཚོད་འདུག ཁོང་ཚོ་མང་པོ་ཞིག་གིས་བོད་བརྒྱུད་ནང་བསྟན་ལ་དོ་སྣང་གནང་གི་ཡོད་འདུག དཔལ་ནཱ་ལེནྡྲ་ནས་དར་བའི་ནང་པ་སངས་རྒྱས་པའི་ཆོས་འདི་བོད་ཙམ་མ་ཟད་དེ་སྔ་རྒྱ་ནག་ནང་དུའང་དར་ཁྱབ་ཆེན་པོ་བྱུང་ཡོད། ངོས་ལ་རྒྱ་རིགས་མང་པོ་ཞིག་གིས་དེང་སྐབས་རྒྱ་ནག་འཛམ་གླིང་ནང་སྟོབས་ཤུགས་ཆེ་ཡང་བཟང་སྤྱོད་ཀྱི་སྟོབས་ཤུགས་འདང་གི་མེད། ཅེས་བརྗོད་མཁན་བྱུང་། དེར་བརྟེན་རྒྱ་ནག་ནང་གཞུང་གིས་དམ་བསྒྲགས་བྱ་རྒྱུའི་ཚབ་ཏུ་ཕྱི་གསལ་ནང་གསལ་ཆེ་ཙམ་བྱེད་དགོས་པ་ཆགས་ཡོད། རྒྱ་མི་རིགས་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད། ཅེས་སོགས་ཀྱི་བཀའ་ལན་སྩལ།
ཇར་མན་གསར་འགྱུར་བརྙན་འཕྲིན་ཚན་པའི་དྲི་བར་བཀའ་ལན་སྩོལ་བཞིན་པ།
དེ་རྗེས་གསར་འགོད་ལྷན་ཚོགས་སྐབས་༸གོང་ས་མཆོག་གིས་ཐོག་མར་སྐུའི་མཛད་ཁུར་གཙོ་བོ་གསུམ་གྱི་སྐོར་བཀའ་སློབ་སྩལ། དེ་རྗེས་གསར་འགོད་པ་གཅིག་གིས་༸གོང་ས་མཆོག་ནས་འཚེ་མེད་ཞི་བ་གོང་འཕེལ་གཏོང་ཐབས་མཛད་བཞིན་ཡོད་ཀྱང་འཛམ་གླིང་ནང་འཚེ་མེད་ཞི་བའི་ལམ་ལ་དོ་སྣང་དང་བདག་སྤྲོད་བྱེད་མཁན་མེད་པར་བརྟེན། འཚེ་མེད་ཞི་བ་གོང་འཕེལ་གཏོང་ཐབས་མཛད་རྒྱུའི་ལས་འགུལ་དེ་ཅིའི་ཕྱིར་མཚམས་འཇོག་མ་མཛད་དམ། ཞེས་དྲི་བ་ཞུས་པར་བཀའ་ལན་སྩལ་དོན།
གསར་འགོད་ལྷན་ཚོགས་ཐོག་བཀའ་སློབ་སྩོལ་བཞིན་པ།
མིའི་གཞི་རིམ་གྱི་བསམ་བློའི་རང་བཞིན་དེ་ཞི་དུལ་ཅན་ཞིག་ཡིན། ངོས་ཀྱི་གྲོགས་པོ་ཚན་རིག་པ་སྐུ་ཞབས་རི་ཆ་ཌི་ཌེ་ཝི་ཌི་སན་ལགས་ཀྱིས་བརྟག་དཔྱད་གནང་ནས་བྱིས་པ་ཚོས་གཞན་ལ་གནོད་བྱ་རྒྱུ་ལས་ཕན་པ་བསྒྲུབ་རྒྱུའི་ལས་ལ་དགའ་བ་བྱེད་བཞིན་ཡོད་པ་དཔང་རྟགས་ར་སྤྲོད་ཐུབ་ཡོད། ཅེས་བཀའ་ལན་སྩལ། དེ་རྗེས་གསར་འགོད་པ་གཅིག་གིས་ཚོགས་ཁང་གི་ཕྱི་རོལ་ན་དོལ་ཚོགས་ཀྱིས་༸གོང་ས་མཆོག་ལ་ངོ་རྒོལ་སྐད་འབོད་བྱེད་བཞིན་པ་དེར་དགོངས་ཚུལ་གང་ཡོད་ཀྱི་དྲི་བ་ཞུས་པར་བཀའ་ལན་སྩལ་དོན། གལ་ཏེ་ཁྱེད་ཚོས་ལོ་ངོ་བཞི་བརྒྱ་ཙམ་གྱི་ལོ་རྒྱུས་ལ་དཔྱད་པ་བྱས་ན་ད་གཟོད་དོལ་རྒྱལ་གྱི་རྙོག་གྲ་དེའི་སྐོར་ཤེས་རྒྱུ་རེད། ཐོག་མར་ཕྱི་ལོ་ ༡༩༥༡།༡༩༧༠ བར་ངོས་ཀྱིས་མ་ཤེས་ནས་བསྟན་པ་རེད། དེ་ནས་དོལ་རྒྱལ་བསྟེན་ན་སྐྱོན་ཞིག་ཡོད་པ་ཤེས་རྗེས་རིམ་བཞིན་ངོས་ཀྱིས་༸གོང་ས་ལྔ་པ་ཆེན་པོའི་གསུང་འབུམ་རྣམས་ལ་དཔྱད་པ་མཐིལ་ཕྱིན་བྱས་ཏེ་ངོས་ནས་དོལ་རྒྱལ་བསྟེན་གསོལ་བྱ་རྒྱུ་མཚམས་འཇོག་བྱས་པ་ཡིན། དེ་རྗེས་དགའ་ལྡན་བྱང་རྩེ་གྲྭ་ཚང་ལ་དཀའ་ངལ་བསྟུད་མར་འཕྲད་རྗེས་དཀའ་ངལ་དེ་དག་དོལ་རྒྱལ་བསྟེན་པ་ལས་བྱུང་བ་ར་སྤྲོད་བྱུང་ཡོད། དོལ་རྒྱལ་སྐོར་དངོས་ཡོད་གནས་ཚུལ་གསལ་བཤད་བྱ་རྒྱུ་ངོས་ཀྱིས་ལས་འགན་རེད།
དེར་བརྟེན་ངོས་ཀྱིས་ཐོག་མ་ནས་གནད་དོན་དེའི་སྐོར་ཕྱི་གསལ་ནང་གསལ་བྱས་ཏེ་གསལ་བཤད་བྱས་ཡོད། ཉན་དང་མ་ཉན་ཟེར་བ་དེ་དོ་དག་སོ་སོར་རག་ལུས་ཡོད། ཚོགས་ཁང་ཕྱི་ལ་སྐད་འབོད་བྱེད་མཁན་ཁོ་པ་ཚོར་དོལ་རྒྱལ་སྐོར་ལ་གནས་ཚུལ་ཆ་ཚང་བ་ཞིག་འགྲེལ་བཤད་རྒྱག་མཁན་བྱུང་མེད་ཚོད་འདུག དེར་བརྟེན་ཁོ་པ་ཚོས་དངོས་ཡོད་གནས་ཚུལ་ཤེས་ཀྱི་མེད། ངོས་ཀྱིས་དོལ་རྒྱལ་བསྟེན་གསོལ་བྱས་ན་དགེ་སྐྱོན་གང་ཡོད་དངོས་ཡོད་གནས་ཚུལ་གསལ་བཤད་བྱས་པ་མ་གཏོགས་དོལ་རྒྱལ་བསྟེན་གསོལ་བྱེད་མི་ཆོག ཅེས་རྩ་བ་ཉིད་ནས་བརྗོད་མྱོང་མེད། ཅེས་བཀའ་ལན་སྩལ།
