༢༠༡༠ ཕྱི་ཟླ་ ༡ ཚེས་ ༢༨ རེས་གཟའ་ཕུར་བུ།
ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་གིས་ཟབ་སྦྱོང་དབུ་འབྱེད་སྐབས་གསུང་བཤད་གནང་བཞིན་པ།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༢༨ ཉིན་བོད་གཞུང་ཤེས་རིག་ལས་ཁུངས་ནས་གོ་སྒྲིག་ཐོག་ས་ར་མཐོ་སློབ་ཏུ་སློབ་གྲྭའི་འགན་འཛིན་ཁག་གཅིག་ལ་དམིགས་བསལ་ཤེས་ཡོན་གྱི་ཟབ་སྦྱོང་གནང་འགོ་ཚུགས་ཡོད།
དབྱིན་ཡུལ་ནས་ཡིན་པ་དམིགས་བསལ་ཤེས་ཡོན་ཐད་མཉམ་མྱོང་ཅན་ལྕམ་སྐུ་ནི་ཀོ་ལས་གསུང་བཤད་གནང་བཞིན་པ།
དེ་ཡང་ཉིན་དེའི་སྔ་དྲོ་ཆུ་ཚོད་ ༩།༠༠ ཐོག་མཐོ་སློབ་ཚོགས་ཁང་དུ་ཚང་མ་ལྷན་འཛོམས་རྗེས་ཐོག་མར་ཤེས་ཡོན་འགན་འཛིན་ཚེ་རིང་ཕུན་ཚོགས་ལགས་ནས་ཟབ་སྦྱོང་གི་དགོས་དམིགས་ངོ་སྤྲོད་གནང་བ་དང་། དེ་རྗེས་ཟབ་སྦྱོང་བ་རྣམས་ནས་སོ་སོ་ངོ་སྤྲོད་གནང་རྗེས་སློབ་ཁྲིད་གནང་མཁན་དབྱིན་ཡུལ་ནས་ཡིན་པ་དམིགས་བསལ་ཤེས་ཡོན་ཐད་ཉམས་མྱོང་ཅན་ལྕམ་སྐུ་ནི་ཀོ་ལ་ནས་ཟབ་སྦྱོང་འདི་གལ་ཆེ་ཡིན་པའི་གསུང་བཤད་གནང་གྲུབ་རྗེས་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ནས་ཟབ་སྦྱོང་དབུ་འབྱེད་ཀྱི་གསུང་བཤད་གནང་ཡོད།དེ་རྗེས་དྲུང་ལས་སྐལ་བཟང་རིན་ཆེན་ལགས་ནས་ཐུགས་རྗེ་ཆེ་ཞུས་པ་དང་། དེ་ནས་བར་གསེང་རྗེས་ཕྲུ་གུ་ཚོས་སློབ་གྲྭའི་ནང་སློབ་སྦྱོང་གི་ཆ་ཤས་ལེན་སྐབས་ཚང་མར་དབང་པོ་དང་རིག་པ་ཡག་སྡུག་གི་དབྱེ་འབྱེད་མེད་པར་འཛིན་གྲྭ་ཕྱི་ནང་གི་བྱེད་སྒོ་མཐའ་དག་ནང་མཉམ་ཞུགས་བྱ་རྒྱུའི་གོ་སྐབས་དང་ཁོར་ཡུག་བཟང་པོ་སྐྲུན་དགོས་པ་བཞིན། འབྲེལ་ཆགས་དགེ་རྒན་དང་། འཛིན་སྐྱོང་། ཕ་མ་བཅས་ནས་མཐུན་འགྱུར་གནང་དགོས་ཞེས་པའི་བརྗོད་གཞིའི་ཐོག་ཉིན་གསུམ་རིང་དབུས་བོད་སློབ་འཛིན་ཚོགས་དང་། བོད་ཁྱིམ་གཉིས། སམ་བྷོཊ་བོད་སློབ། ཤེས་རབ་དགའ་ཚལ་སློབ་གླིང་བཅས་སློབ་གྲྭ་ཁག ༢༢ ནས་སློབ་སྤྱི་དང་། རེག་ཊར་གཏན་སློབ་འགན་འཛིན། དགེ་ཆེ་སོགས་ཁྱོན་མི་གྲངས་ ༢༢ མཉམ་ཞུགས་གནང་ཡོད་པ་དང་ཚེས་ ༣༠ ཉིན་རྒྱབ་ཆུ་ཚོད་ ༢།༡༥ ཐོག་མཇུག་བསྡོམས་ཀྱི་མཛད་སྒོར་བོད་གཞུང་འཕྲོད་བསྟེན་ལས་ཁུངས་ཀྱི་བཀའ་བློན་མཆོག་གིས་ཚོགས་བཅར་བ་རྣམས་ལ་ཕྱག་འཁྱེར་དང་མཇུག་བསྡོམས་གསུང་བཤད་གནང་རྒྱུ་ཡིན་པ་བཅས་སོ།།
