༢༠༡༤ ཟླ་ ༨ ཚེས་ ༡༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༨ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་དབུས་བོད་མི་དམངས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་བཅས་ཀྱིས་ཐེ་ཝན་ནས་བཞུགས་སྒར་དུ་ཕེབས་པའི་ཐེ་ཝན་གྱི་མཐོ་རིམ་སློབ་ཕྲུག་ཁག་གཅིག་དང་ཐུག་འཕྲད་ཀྱིས་ཁོང་རྣམ་པ་བཞུགས་སྒར་དུ་ཕེབས་པར་འཚམས་འདྲི་གནང་བ་དང་ཆབས་ཅིག་ཁོང་རྣམ་པས་བོད་དོན་ལ་དོ་སྣང་དང་འབྲེལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། ཁོང་རྣམ་པ་བཞུགས་སྒར་ནས་ཐེ་ཝན་དུ་ཕྱིར་ལོག་ཕེབས་རྗེས་ཁུལ་དེའི་མི་དམངས་རྣམས་ཀྱིས་དབུས་གཙོ་བོ་རྒྱ་རིགས་ཡུལ་སྐོར་སྤྲོ་འཆམ་པ་རྣམས་ལ་བོད་ཀྱི་དངོས་ཡོད་གནས་སྟངས་འགྲེལ་བཤད་རྒྱག་དགོས་སྐོར་ལམ་སྟོན་གནང་འདུག
དེ་བཞིན་སློབ་ཕྲུག་རྣམ་པ་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་སོགས་ལ་ལྟ་སྐོར་དུ་བསྐྱོད་ཡོད་འདུག ཐེ་ཝན་མཐོ་རིམ་སློབ་ཕྲུག་རྣམས་བཞུགས་སྒར་དུ་ཕེབས་ཐེངས་བཞི་པ་ཆགས་ཡོད་པ་བཅས། །
