༢༠༠༩ ཕྱི་ཟླ་ ༡༡ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༨ ཉིན་རྒྱ་གར་གསར་ཤོག་ནས་སྤེལ་བའི་གནས་ཚུལ་ལྟར་ན། ད་རེས་༸གོང་ས་མཆོག་ཨ་རུ་ནཱ་ཅལ་མངའ་སྡེའི་ནང་གི་མཛད་འཕྲིན་སྐབས་ཆོས་ཕྱོོགས་ཁོ་ན་མིན་པར་གོ་ལའི་ཚ་དྲོད་དང་གནམ་གཤིས་འགྱུར་ལྡོག་ཆེད་ཐུགས་ཁུར་ཆེ་བཞེས་ཐོག་ཧི་མ་ལ་ཡའི་རི་འདབས་སུ་ཡོད་པའི་གདོད་མའི་ཤིང་སྣ་རིགས་འདྲ་མིན་འདེབས་འཛུགས་མཛད་པ་དང་སྦྲགས་མགོན་པོ་གང་ཉིད་ནས་བྱིན་གྱིས་རླབས་པའི་ཤིང་སྣ་རིགས་འདྲ་མིན་དགེ་འདུན་པ་གྲངས་ ༥༠༠ ཙམ་གྱི་གཙོས་མི་གྲངས་ ༡༠༠༠ ཙམ་ལ་བགོ་འགྲེམས་མཛད་ཡོད། དེ་ཡང་ཨ་རུ་ནཱ་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་ཟུར་པ་མཚོ་སྣ་རིན་པོ་ཆེས་གསུང་དོན། ཉེ་ལམ་ལོ་བཅུ་ཕྲག་ནང་གདོད་མ་ནས་ཡོད་པའི་ཧི་མ་ལ་ཡའི་རི་འདབས་ཀྱི་ཤིང་སྣ་དང་རྩ་ལྗང་ཁོར་ཡུག་ལ་ཉམས་ཆག་ཤུགས་ཆེ་བྱུང་ཡོད། ད་རེས་༸གོང་ས་མཆོོག་གིས་ཁོར་ཡུག་དང་འབྲེལ་བའི་གནད་དོན་ཐོག་ཐུགས་ཁུར་ཆེན་པོ་མཛད་བཞིན་ཡོད་པ་དེ་ནང་ཆོས་ཀྱི་ལྟ་གྲུབ་གཞི་རྩར་འཛིན་པའི་ཐོག་ནང་བཅུད་ཀྱི་སེམས་ཅན་ཙམ་མིན་པར་དེ་དང་བྲལ་ཐབས་མེད་པའི་ཕྱི་སྣོད་ཀྱི་འཇིག་རྟེན་ལའང་དོ་སྣང་དགོས་པ་དེ་གསལ་བཏོན་མཛད་ཡོད་ཅེས་གསུངས་ཡོད་པའི་གནས་བསྡུས་སུ།
