༢༠༡༤ ཟླ་ ༨ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༣༠ 
ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་དྲན་རྟེན་ཚོགས་ཁང་ནང་ཕྱི་དྲིལ་བཀའ་བློན་མཆོག་དབུ་བཞུགས་ཐོག་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ཐོག་མར་དྭགས་པོ་བསོད་ནམས་ནོར་བུ་ལགས་ཕྱི་འབྲེལ་དྲུང་ཆེར་གནས་སྤོ་གནང་བར་ཕྱི་དྲིལ་ལས་ཁུངས་ཐུན་མོང་གི་ཚབ་ཞུས་ཏེ་འཚམས་འདྲི་ཞུས་པ་དང་སྦྲགས། དྭགས་པོ་བསོད་ནམས་ནོར་བུ་ལགས་ཀྱི་ལོ་རྒྱུས་ངོ་་སྤྲོད་གནང་རྗེས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་བཤད་གནང་།
དེ་རྗེས་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་རང་ཉིད་ཀྱིས་ད་བར་བོད་མིའི་སྒྲིག་འཛུགས་ཀྱི་སྲི་ཞུ་བསྒྲུབས་པའི་མྱོང་ཚོར་རྣམས་ངོ་སྤྲོད་གནང་བསྟུན། ཕྱི་དྲིལ་འགོ་ལས་ཡོངས་ནས་དྲུང་ཆེ་དྭགས་པོ་བསོད་ནམས་ནོར་བུ་ལགས་སུ་འཚམས་འདྲིའི་མཇལ་དར་ཕུལ་བ་མ་ཟད། ལས་བྱེད་གསོལ་ཐབས་ཁང་ནས་མཛད་སྒོའི་ཐོག་རང་ལུགས་བོད་ཇ་དང་འབྲས་སིལ་ཕུལ་ནས་མཛད་སྒོ་གྲོལ།
དེ་ཡང་དྭགས་པོ་བསོད་ནམས་ནོར་བུ་ལགས་ནི་ཕྱི་ལོ་ ༡༩༨༨ ཟླ་ ༩ ཚེས་ ༢༠ ནས་གནས་བརྒྱད་པ་ཐོག་ལྡི་ལི་དོན་གཅོད་ཆབ་སྲིད་སྡེ་ཚན་གྱི་རྒན་དྲུང་དུབསྐོ་གཞག་གནང་བ་དང༌། ཕྱི་ལོ་ ༡༩༩༠ ཟླ་ ༩ ཚེས་ ༣ ནས་གནས་བདུན་པ་གནས་སྤར་གྱིས་བཀའ་དྲུང་ཡིག་ཚང་གི་དྲུང་གཞོན་དུ་གནས་སྤོས། ཕྱི་ལོ་ ༡༩༩༢ ཟླ་ ༨ ཚེས་ ༡ ནས་དྲུང་གཞོན་དུ་གནས་སྤར་དང་ལས་འགན་རང་འཇགས། ཕྱི་ལོ་ ༡༩༩༣ ཟླ་ ༦ ཚེས་ ༨ ནས་ཟུང་འབྲེལ་དྲུང་ཆེར་གནས་སྤར། ཕྱི་ལོ་ ༡༩༩༣ ཟླ་ ༩ ཚེས་ ༡ ནས་ལོ་ ༡ རིང་ཨ་རིར་གཞུང་འབྲེལ་སློབ་སྦྱོང་དུ་བསྐྱོད། ཕྱི་ལོ་ ༡༩༩༤ ཟླ་ ༩ ཚེས་ ༡ ནས་ཕྱི་དྲིལ་ལས་ཁུངས་སུ་རྒྱ་གར་དང་ཕྱི་སྡོད་རྒྱ་རིགས་ཀྱི་འབྲེལ་མཐུད་འགན་འཛིན་དུ་བསྐོ་གཞག ཕྱི་ལོ་ ༡༩༩༨ ཟླ་ ༦ ཚེས་ ༡ ནས་གནས་རང་འཇགས་ཐོག་ལྡི་ལི་དོན་ཁང་གི་དྲུང་ཆེར་གནས་སྤོས། ཕྱི་ལོ་ ༡༩༩༩ ཟླ་ ༢ ཚེས་ ༩ ནས་དྲུང་འཕར་དུ་གནས་སྤར་གྱིས་ཕྱི་དྲིལ་དྲུང་འཕར་དུ་གནས་སྤོས། ཕྱི་ལོ་ ༢༠༠༤ ཟླ་ ༡༠ ཚེས་ ༡༩ ནས་དྲུང་ཡིག་ཆེན་མོར་གནས་སྤར། ཕྱི་ལོ་ ༢༠༠༩ ཟླ་ ༡༡ ཚེས་ ༢༢ ནས་ཨོ་སི་ཊོ་ལི་ཡ་སྐུ་ཚབ་དོན་གཅོད་དུ་གནས་སྤོས་བསྐོ་གཞག ཕྱི་ལོ་ ༢༠༡༤ ཟླ་ ༧ ཚེས་ ༢ ནས་ཕྱི་དྲིལ་ལས་ཁུངས་སུ་ཕྱི་འབྲེལ་དྲུང་ཆེར་གནས་སྤོས་ཀྱིས་ཞབས་ཕྱི་ཞུ་མུས་སུ་ཡིན།
