༢༠༡༤ ཟླ་ ༧ ཚེས་ ༣༠ རེས་གཟའ་ལྷག་པ།
༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ 
༢༠༡༤ ཟླ་ ༧ ཚེས་ ༣༠ ཉིན་བཏང་གནས་ནང་འཁོད་དོན། བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས། ཕྱི་ལོ་ ༢༠༡༤ ཟླ་ ༧ ཚེས་ ༡༦ ནས་ཚེས་ ༢༠ བར་ཀུ་ལུ་དཔལ་རབ་གླིང་ས་འགོ་འཛིན་གྱི་ཁྱབ་ཁོངས་སུ་ཡོད་པའི་མི་མང་ལ་ཁྲིམས་ཞིབ་པ་གསར་པ་ངོ་སྤྲོད་དང་། ཁྲིམས་ལུགས་གོ་རྟོགས་སྤེལ་ཡོད། དེ་ཡང་ས་གནས་སུ་ལས་རིམ་འཆར་སྒྲིག་ལྟར། ས་གནས་ཁྲིམས་ཞིབ་པས་ཕྱི་ལོ་ ༢༠༡༤ ཟླ་ ༧ ཚེས་ ༡༧ ཉིན་སྔ་དྲོ་ཚོུད་ ༡༠།༠༠ ནས་ ༡༢།༠༠ བར་དྷོ་བཱི་དཔལ་རབ་གླིང་དང་།
ཕྱི་ཚེས་ ༡༧ ཉིན་རྒྱབ་ཆུ་ཚོད་ ༣།༠༠ ནས་ ༥།༠༠ བར་མ་ན་ལི་མངའ་རིས་གྲྭ་ཚང་དུ་ས་གནས་འཐུས་ཚོགས་དང། རང་བདེན་ཚོགས་ཆུང་། སྤྱི་མི། ཚོང་པ། མི་མང་བཅས་ཁྱོན་བསྡོམས་སེར་སྐྱ་མི་མང་ ༧༠ ལ་བཙན་བྱོལ་བོད་མིའི་ཁྲིམས་ལུགས་དབང་འཛིན་ངོ་སྤྲོད་དང་། ཆེས་མཐོའི་ཁྲིམས་ཞིབ་ཁང་གི་འགན་དབང་དང། ཁྲིམས་ཁོངས་ཁྱབ་ཚད། གྱོད་ཡའི་མོས་མཐུན་ཆོད་ཡིག ལག་བསྟར་དམ་ཡིག བརྡ་ཐོར་བརྩི་བཀུར། གཞི་རྩའི་ཆ་རྐྱེན། བྱེད་ཐབས་ཇི་ཡོད། གྱོད་ཡ་ཉམ་ཐག་ལ་མཐུན་རྐྱེན། ས་གནས་ཁྲིམས་ཞིབ་ཁང་དང་སྐོར་སྐྱོད་ཁྲིམས་ཞིབ་ཁང་གི་ཁྲིམས་ཁོངས་ཁྱབ་ཚད། ཟུར་བཙུགས་བོད་མིའི་ས་གནས་ཁྲིམས་ཞིབ་ཁང་གི་འཕྲལ་སེལ་ཁ་མཆུ་ཞུ་གཏུག་བྱ་ཡུལ་བཅས་ཀྱི་སྐོར་གསུང་བཤད་དང་། དྲི་བ་ཁག་ལ་ལན་འདེབས་གནང་ཡོད།།
