༢༠༡༤ ཟླ་ ༧ ཚེས་ ༢༨ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་ལྟར། ཕྱི་ལོ་ ༢༠༡༤ ཟླ་ ༧ ཚེས་ ༢༧ ཉིན་སྔ་དྲོ་སྦེལ་ཀོབ་ལུགས་ཟུང་བསམ་གྲུབ་གླིང་མི་མང་ཚོགས་ཁང་ཆེན་མོའི་ནང་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་ལུགས་བདེའི་བོད་མི་རྣམས་ལ་དབུ་མའི་ལམ་གྱི་སྲིད་བྱུས་སྐོར་གསུང་བཤད་གནང་དོན། བོད་མིའི་སྒྲིག་འཛུགས་ངོས་ནས་བོད་རྒྱ་ནག་ནས་ཁ་བྲལ་འགྲོ་རྒྱུའི་རང་བཙན་ལས་འགུལ་སྤེལ་གྱི་མེད། རྒྱ་ནག་གཞུང་ནས་ད་ལྟ་བོད་ནང་བཟུང་དང་འཛིན་བཞིན་པའི་གདུག་རྩུབ་ཅན་གྱི་སྲིད་བྱུས་ལག་བསྟར་བྱེད་ཀྱི་ཡོད་པ་རྣམས་ངེས་པར་དུ་མཚམས་འཇོག་ཐོག་བོད་རྒྱ་གཉིས་སྨན་གྱི་ཐབས་ལམ་ཞིག་ང་ཚོའི་ངོས་ནས་འབད་བརྩོན་བྱེད་བཞིན་ཡོད། སྤྱིར་བཏང་རྒྱལ་སྤྱི་དང་རྒྱ་ནག་གཙོ་བོར་གྱུར་པའི་འཛམ་གླིང་གི་ཡུལ་གྲུ་ཁག་ནང་དབུ་མའི་ལམ་གྱི་གོ་རྟོགས་སྔར་ལྷག་སྤེལ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ལྷག་པར་དབུ་མའི་ལམ་ལ་འགྲེལ་བཤད་ལོག་པ་རྒྱག་མཁན་དང་ལེན་མཁན་ཚོ་གོ་རྟོགས་གསལ་ཆེད་ལས་འགུལ་སྤེལ་གྱི་ཡོད།
དེ་བཞིན་དབུ་མའི་ལམ་གྱི་སྲིད་བྱུས་ཤེས་པའི་ཐོག་ནས་ཕྱི་ཕྱོགས་ཀྱི་མི་རིགས་རྣམས་ལ་འགྲེལ་བཤད་གང་ཐུབ་རྒྱག་ཐབས་བྱེད་དགོས། འདི་ལོ་བོད་མིའི་སྒྲིག་འཛུགས་བཀའ་ཤག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ལོར་སྲུང་བརྩི་ཞུ་རྒྱུ་གཏན་འབེབས་གནང་ཡོད། འོན་ཀྱང་བློ་ཕམ་དགོས་པ་ཞིག་ལ་ཉེ་ཆར་དོལ་རྒྱལ་རྗེས་འབྲང་པ་ཁག་གཅིག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་གཞི་མེད་སྐྱོན་འཛུགས་ཞུས་པའི་གནས་ཚུལ་བྱུང་ཡོད། དེར་བརྟེན་གཞི་མེད་བྱ་སྤྱོད་དེ་རིགས་ལ་ང་ཚོས་མཐའ་གཅིག་ཏུ་ངོ་རྒོལ་ཡོད། ཅེས་སོགས་ཀྱི་གསུང་བཤད་གནང་ཡོད་པ་མ་ཟད། ལྷག་པར་བཀའ་བློན་མཆོག་གིས་མི་དམངས་ལ་དབུ་མའི་ལམ་གྱི་ངོ་བོ་དང་རྒྱབ་ལྗོངས། དབུ་མའི་ལམ་གྱི་སྲིད་བྱུས་བྱུང་རིམ། བོད་རྒྱ་འབྲེལ་མོལ་སོགས་ཀྱི་སྐོར་འགྲེལ་བཤད་ཞིབ་ཕྲ་གནང་འདུག
སྤྱིར་བཏང་བཀའ་བློན་མཆོག་གིས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནས་དབུ་འཛུགས་ཀྱིས་སྦེང་ལོར་གྲོང་ཁྱེར་དང་ཧོན་སུར་བཅས་ཀྱི་བོད་མི་རྣམས་ལ་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་འདུག
