༢༠༡༤ ཟླ་ ༧ ཚེས་ ༢༣ རེས་གཟའ་ལྷག་པ།
༄༅། །རྒྱ་ནག་གཞུང་དང་འབྲེལ་བ་ཡོད་པའི་དྲིལ་བསྒྲགས་ཚན་པས་ཊུ་ཝི་ཊར་ཞེས་པའི་དེང་གི་སྤྱི་ཚོགས་བརྒྱུད་ལམ་བེད་སྤྱོད་བྱས་ཏེ་མང་ཚོགས་ཁྲོད་བོད་སྐོར་འཁྱོག་བཤད་སྤེལ་བཞིན་ཡོད་པའི་གནས་ཚུལ་ཐོན་འདུག
དེ་ཡང་རྒྱལ་སྤྱིའི་ཐོག་སྙན་གྲགས་ཆེ་བའི་ཨ་རིའི་ནིའུ་ཡོཀ་དུས་བབ་གསར་ཁང་གིས་ཊུ་ཝི་ཊར་བརྒྱུད་ལམ་ཐོག་མིང་རྟགས་རྫུན་མ་བཀོད་མཁན་ཡོད་སྐོར་དང་འབྲེལ་བའི་གནས་ཚུལ་དེའི་ནང་། རྒྱ་ནག་གཞུང་དང་འབྲེལ་བ་ཡོད་པའི་དྲིལ་བསྒྲགས་ཚན་པས་རྒྱལ་སྤྱིའི་ནང་གྲགས་ཆེ་བའི་ནོར་ཝེའི་གཞས་པ་ཊོམ་ཧུ་གྷོ་Tom Hugoལགས་དང་། དེ་བཞིན་བྷ་ར་ཛིལ་ནས་ཡིན་པ་གྱོན་ཆས་སོགས་དཔེ་གསར་རིགས་ཁྱབ་བསྒྲགས་བྱེད་མི་ཕེ་ལིབ་བྷར་ཊོ་Felipe Berto ལགས་སོགས་ཀྱིས་མིང་དང་འདྲ་པར་བེད་སྤྱོད་ལོག་པ་བཏང་ནས་ཊུ་ཝི་ཊར་དྲ་ཚིགས་ཀྱི་མིང་རྟགས་རྫུན་བཟོ་བྱས་པ་དང་ཆབས་ཅིག བརྒྱུད་ལམ་དེའི་ཐོག་ནས་འཛམ་གླིང་མང་ཚོགས་ལ་བོད་ནང་གི་བོད་མི་རྣམས་རྒྱ་ནག་གཞུང་གི་དྲོ་སྐྱིད་འོག་བདེ་སྐྱིད་རོལ་བཞིན་པའི་འདྲ་པར་དང་། བརྙན་འཕྲིན་ཐུང་ངུ་རིགས་དྲིལ་བསྒྲགས་བྱེད་ཀྱི་ཡོད་སྐོར་བཀོད་འདུག
གནད་དོན་དང་འབྲེལ་བའི་དབྱིན་ཡུལ་ནང་རྟེན་གཞི་བྱས་པའི་(Free Tibet) ཞེས་པའི་བོད་དོན་རྒྱབ་སྐྱོར་ཚོགས་པའི་གསར་འགོད་འབྲེལ་མཐུད་པ་སྐུ་ཞབས་ཨེ་ལི་སི་ཊར་ཀ་རི་Alistair Currie ལགས་སུ་གསར་ཁང་དེའི་བཅའ་འདྲི་ཞུ་སྐབས་གསུང་དོན། ང་ཚོ་ལའང་ཊུ་ཝི་ཊར་མིང་རྟགས་རྫུན་མ་དེ་དག་བེད་སྤྱོད་བྱེད་མཁན་བརྒྱ་ཙམ་ར་སྤྲོད་བྱུང་སོང་བས། ཚང་མས་བོད་དང་ཡུ་གུར་གྱི་དངོས་ཡོད་གནས་སྟངས་ལས་ལྡོག་སྟེ་སྐད་ཆ་བཟང་བ་དང་བཀྲ་ཤིས་པ་ཤ་སྟག་བཀོད་འདུག ཁོ་པ་ཚོས་དྲིལ་བསྒྲགས་བྱེད་སྟངས་ཀྱི་ནང་དོན་དང་ཚིག་གི་འགྲོས་ལ་བལྟས་ན་རྒྱ་ནག་གཞུང་གི་ལྟ་བ་གོང་སྤེལ་གཏོང་མཁན་དྲིལ་བསྒྲགས་ཚན་པ་དང་འབྲེལ་བ་འདུག ཅེས་གསུངས་འདུག
ཊུ་ཝི་ཊར་དྲ་ཚིགས་ཐོག་མིང་རྟགས་རྫུན་མ་བེད་སྤྱོད་བྱེད་མཁན་ཚོས་བོད་སྐོར་ཙམ་མ་ཟད། ཉེ་ཆར་གཞས་པ་ཊོམ་ཧུ་གོ་འཁོད་པའི་མིང་རྟགས་རྫུན་མ་དེའི་སྟེང་ཨ་རིའི་གཞུང་གིས་རྒྱ་ནག་དང་འབྲེལ་བ་བྱེད་སྐབས་༸གོང་ས་མཆོག་བེད་སྤྱོད་གནང་གི་ཡོད་སྐོར་གྱི་ཡིག་ཆུང་ཚིག་ཁ་ཤས་སྤེལ་ཡོད་འདུག ནིའུ་ཡོཀ་དུས་བབ་གསར་ཁང་གིས་གནད་དོན་འདི་དང་འབྲེལ་ཕྱི་ཚེས་ ༢༡ ཉིན་རྒྱ་ནག་གི་ཕྱི་སྲིད་དང་དྲིལ་བསྒྲགས་ཚན་པ། གཞན་ཡང་གཞུང་འབྲེལ་གྱི་དྲ་རྒྱ་སྟངས་འཛིན་ལས་ཁུངས་བཅས་སུ་བཀའ་འདྲི་ཞུས་འདུག་ཀྱང་ལན་འདེབས་གང་ཡང་བྱས་མི་འདུག དེ་བཞིན་གནས་ཚུལ་ཐོན་གསལ་ལྟར་ན། ཕྱོགས་གཅིག་ནས་ཉི་ཧོང་དང་རྒྱ་ནག་གཉིས་མཚོ་གླིང་ཐོག་དཀའ་རྙོག་དང་། གཞན་ཡང་ནུབ་ཕྱོགས་པའི་བསམ་བློའི་ནང་རྒྱ་ནག་གཞུང་གིས་བོད་དང་ཡུ་གུར་བ་སོགས་གྲངས་ཉུང་མི་རིགས་ཀྱི་ཆོས་དད་རང་དབང་ལ་དམ་བསྒྲགས་དང་གཉའ་གནོན་བྱེད་ཀྱི་ཡོད་པའི་གནས་ཚུལ་ལྷག་བཞིན་པའི་དུས་སྐབས་འདིར་ཊུ་ཝི་ཊར་བརྒྱུད་ལམ་ཐོག་མིང་རྟགས་རྫུན་བཟོ་བྱས་ནས་གནས་ཚུལ་འདི་དག་དངོས་འབྲེལ་མིན་པ་སྒྲུབ་རྒྱུའི་ལས་གཞི་འཐོན་བཞིན་ཡོད་པ་མ་ཟད། ལྷག་པར་རྒྱ་ནག་གཞུང་གིས་དེང་སྐབས་འཛམ་གླིང་རྒྱལ་ཁབ་འདྲ་མིན་ནང་རྒྱ་ནག་གཞུང་གི་དམར་ཤོག་གི་ལྟ་གྲུབ་སྤེལ་རྒྱུའི་ཆེད་ཁུང་ཙི་བསྟི་གནས་ཁང་གསར་འཛུགས་ཀྱི་ལས་གཞི་ཇེ་མང་ཞིག་འཐོན་བཞིན་ཡོད་འདུག
