༄༅། །ཐེ་ཝན་གྱི་རྒྱལ་སར་འཚོགས་བཞིན་པའི་བོད་ཀྱི་གློག་བརྙན་དུས་སྟོན་ལ་ཁུལ་དེའི་ན་གཞོན་ཚོས་དོ་སྣང་ཤུགས་ཆེ་གནང་བཞིན་ཡོད་འདུག
དེ་ཡང་ཕྱི་ལོ་ ༢༠༡༤ ཟླ་ ༧ ཚེས་ ༦ ཉིན་ནས་བཟུང་ཐེ་ཝན་བོད་ཀྱི་སྐུ་ཚབ་དོན་ཁང་དང་ཐེ་ཝན་རྒྱ་བོད་མཛའ་འབྲེལ་ཚོགས་པ། དེ་བཞིན་ཐེ་ཝན་བོད་ཀྱི་ཀུན་ཕན་ལྷན་ཚོགས་བཅས་ནས་གོ་སྒྲིག་འོག་ཁུལ་དེའི་མཐོ་སློབ་དང་སློབ་གྲྭར་སྐྱོད་བཞིན་པའི་ན་གཞོན་ཁག་གཅིག་ལ་བོད་དོན་ངོ་སྤྲོད་ཆེད་རེས་གཟའ་སྤེན་པ་དང་ཉི་མ་ནམ་ཡིན་ལ་རྒྱལ་ས་ཐེ་པེའི་ཉེ་འགྲམ་ཞིག་ཏུ་བོད་ཀྱི་དངོས་བྱུང་གློག་བརྙན། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། བོད་མཐོ་སྒང་གི་ཁོར་ཡུག་སོགས་ཀྱི་སྐོར་གློག་བརྙན་ཁག་ལྔ་ཙམ་ཞིག་བསྟན་པ་བརྒྱུད་གཞོན་སྐྱེས་ཚོས་སྤྱིར་བོད་དོན་དང་། ཡང་སྒོས་ཐེ་ཝན་གྱི་མ་འོངས་པའི་མདུན་ལམ་ལ་སེམས་ཁུར་དང་དོ་སྣང་ཆེར་སྐྱེད་བྱེད་བཞིན་ཡོད་སྐོར་གློག་བརྙན་དུས་སྟོན་འགན་འཁུར་གཙོ་གྲས་དང་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་གསུང་གསལ། ཐེ་ཝན་གྱི་ན་གཞོན་ཚོས་རྒྱ་ནག་གཞུང་གི་བྱེད་ལུགས་བྱེད་སྟངས་མང་པོ་ཞིག་དངོས་སུ་མཐོང་བཞིན་ཡོད་སྟབས། གལ་སྲིད་ཐེ་ཝན་རྒྱ་ནག་གཞུང་གི་དབང་བསྒྱུར་འོག་ཚུད་ན། ཁོང་རང་ཚོའི་མ་འོངས་པའི་མདུན་ལམ་དང་རང་དབང་ཐོག་འཚོ་བ་རོལ་རྒྱུའི་གནས་སྟངས་ཡོང་དཀའ་བའི་ཚོར་བ་ཤུགས་ཆེན་ཡོང་གི་ཡོད་པར་བརྟེན། བོད་དོན་སྐོར་ལ་དམིགས་བསལ་དོ་སྣང་བྱེད་བཞིན་འདུག དེར་བརྟེན་ང་ཚོས་བོད་ཀྱི་གློག་བརྙན་བསྟན་པ་དང་ཆབས་ཅིག་བོད་དོན་གོ་རྟོགས་ཡོང་སླད་བགྲོ་གླེང་ཡང་ཚོགས་ཀྱི་ཡོད། ཅེས་སོགས་གསུངས་འདུག
སྤྱིར་བཏང་ཐེ་ཝན་ནང་འཚོགས་བཞིན་པའི་ཕྱི་ལོ་ ༢༠༡༤ ལོའི་བོད་ཀྱི་གློག་བརྙན་དུས་སྟོན་འདི་བཞིན་ཕྱི་ཟླ་ ༨ ཚེས་ ༢ ཉིན་མཇུག་སྒྲིལ་གནང་རྒྱུ་ཡིན་འདུག
