༢༠༠༩ ཕྱི་ཟླ་ ༡༡ ཚེས་ ༡༠ རེས་གཟའཟླ་བ།
༄༅། །ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༠༩ ལོའི་ ༡༡ ཚེས་ ༩ བོད་ཟླ་ ༩ ཚེས་ ༢༢ རྒྱལ་བ་ལྷ་ལས་བབ་པའི་དུས་ཆེན་དང་སྟབས་བསྟུན་དོན་བརྒྱུད་དཔལ་ལྡན་འབྲུག་པའི་ཆོས་སྡེ་ཆེན་པོ་ཁམས་པ་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་ཁང་དུ་བསླབ་པ་མཐར་སོན་གྱི་མཛད་སྒོ་ཞིག་ཚོགས་ཡོད་པ་དང་། མཛད་སྒོའི་ཐོག་༸རྒྱལ་བ་མདོ་ཁམས་པ་ཆེན་པོ་ངེས་དོན་བཤད་སྒྲུབ་ཉི་མ་མཆོག་དང་། འབྲུག་པ་ཆོས་མགོན་རིན་པོ་ཆེ། གྲུབ་དབང་རྡོ་རྫོང་རིན་པོ་ཆེ། རང་གཞུང་ཆོས་རིག་བཀའ་བློན། དེ་བཞིན་མཁན་སྤྲུལ་དགེ་འདུན་པ་ལྔ་བརྒྱ་ལྷག་འདུ་འཛོམས་བྱུང་བར། ཐོག་མར་རང་ལུགས་ཀྱི་ཐུན་མིན་ཞལ་འདོན་གསུང་མུར་གསོལ་ཇ་འབྲས་སིལ་འདེགས་འབུལ་སོགས་མཛད་རིམ་བཞིན། གྲུབ་དབང་རྡོ་རྫོང་རིན་པོ་ཆེ་མཆོག་ནས་བསྟན་པ་སྤྱི་དང་བྱེ་བྲག་དཔལ་ལྡན་འབྲུག་པ་དཀར་བརྒྱུད་ཀྱི་བྱུང་རིམ་ལས་འཕྲོས་པའི་བཤད་གྲྭའི་དགོས་དམིགས་སྐོར་ཟབ་རྒྱས་བཀའ་སློབ་གནང་བ་དང་། དེ་ནས་སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་མཆོག་ནས། དེང་སང་གཉན་ཕྲང་ཅན་གྱི་དུས་ཚོད་འདིར་ནང་པ་སངས་རྒྱས་པའི་བསྟན་པ་འདི་ཉིད་ཡུན་གནས་ཡོང་བར་ཚང་མས་ཧུར་ཐག་གནང་རྒྱུ་གལ་ཆེན་ཡིན་སྐོར་དང་། ལྷག་པར་དུ༸གོང་ས་མཆོག་གི་བཀའ་སློབ་རིམ་ཕེབས་ཀྱི་དགོངས་དོན་ལྟར། ནང་པ་སངས་རྒྱས་པའི་ཆོས་དེ་ཐོས་བསམ་སྒོམ་གསུམ་ཡ་མ་བྲལ་བའི་སྒོ་ནས་གནང་གལ་ཆེ་ཚུལ་དང་། དེའང་སེར་མོ་བ་ཙམ་མིན་པར་སྐྱ་བོ་མི་ནག་ཚོའི་ཁྲོད་ནས་ཀྱང་ཐུགས་སྣང་དགོས་པའི་བཀའ་སློབ་གནང་ཡོད་པ་རེད།
དེ་རྗེས་འབྲུག་མཐོ་སློབ་དྷརྨ་ཀཱ་རའི་དཔེ་ཁྲིད་རྒན་བྱམས་པ་ཡོན་ཏན་དང་། ངག་དབང་བཟང་པོ་གཉིས་ལ་༸མདོ་ཁམས་པ་དགུ་པ་བཤད་སྒྲུབ་ཉི་མ་མཆོག་ནས་མཁན་པོའི་མཚན་གནས་ཀྱི་ཕྱག་ཁྱེར་གསོལ་རས་གནང་བ་དང་། འབྲུག་པ་ཆོས་མགོན་རིན་པོ་ཆེ་ནས་སློབ་གཉེར་བ་རྩེ་ཕུད་གསུམ་ལ་སྐྱོར་དཔོན་གྱི་མཚན་གནས་གནང་བ་དང་། དཔལ་ལྡན་ཆོས་རིག་བཀའ་བློན་མཆོག་ནས་སློབ་གཉེར་བའི་རྒྱུགས་འབྲས་རྩེར་སོན་རྣམས་ལ་བྱ་དགའ་གསོལ་རས་གནང་ཡོད། གཞན་ཡང་ཕར་ཕྱིན་འཛིན་གྲྭ་ཐོན་པ་རྣམས་ལ་གྲུབ་དབང་རྡོ་རྫོང་རིན་པོ་ཆེ་ནས་ཕར་ཕྱིན་རབ་འབྱམས་པའི་ཕྱག་འཁྱེར་ཡང་གནང་ཡོད་པ་རེད། མཇུག་ཏུ་སྐུ་མགྲོན་གཙོ་བོ་ཆོས་རིག་བཀའ་བློན་གྱིས་གཙོས་སེར་སྐྱ་ཡོངས་ནས་མཁན་པོ་གསར་པར་མཇལ་དར་སྒྲོན་འབུལ་ཞུས་པ་བཅས་ཀྱི་གནས་བསྡུས་སུ།
