༢༠༡༤ ཟླ་ ༧ ཚེས་ ༢༡ རེས་གཟའ་ཟླ་།
གྲྭ་རྒྱལ་བསྟན་འཕེལ་རྒྱས།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༩ ཉིན་སོག་རྫོང་རོང་པོ་ཡུལ་ཚོའི་གྲོང་ཚོ་ ༡༣ ནས་ཡིན་པ་གར་ཚ་ཚང་གི་གྲྭ་རྒྱལ་བསྟན་འཕེལ་རྒྱས་ལགས་དང་། བཙུན་མ་དགེ་སྡིག་ལགས་ཨ་མཚོ་ཚང་གི་ཆོས་གྲགས་ལགས་བཅས་རྒྱ་གཞུང་གི་ཉེན་རྟོག་པས་འཛིན་བཟུང་བྱས་འདུག དེ་ཡང་བརྒྱུད་ལམ་ཁག་གི་ནང་གནས་ཚུལ་ཐོན་གསལ་ལྟར་ན། ཕྱི་ཟླ་ ༧ ཚེས་ ༩ ཉིན་གྱི་སྔ་དྲོ་ནག་ཆུའི་ཉེན་རྟོག་པ་སངས་རྒྱས་བཀྲ་ཤིས་ཟེར་བས་གཙོས། ཉེན་རྟོག་པ་མང་པོ་བསླེབས་ནས་གོང་གསལ་མི་གསུམ་འཛིན་བཟུང་བྱས་ཏེ་སོག་རྫོང་གི་ཕྱོགས་སུ་ཁྲིད་རྗེས། ཁོང་རྣམས་གང་དུ་བཙོན་འཇུག་བྱས་མིན་ཤེས་རྟོགས་ཐུབ་ཀྱི་མེད་པ་རེད། རོང་པོ་གྲོང་ཚོ་ ༡༣ པའི་གར་ཚ་ཚང་ནས་ཡིན་པ་གྲྭ་རྒྱལ་བསྟན་འཕེལ་རྒྱས་ལགས་རང་ལོ་ ༢༩ དང་།
བཙུན་མ་དགེ་སྡིས།
བཙུན་མ་དགེ་སྡིག་ལགས་རང་ལོ་ ༥༢ ཡིན་པ་དང་། ཁོང་གཉིས་ཀྱི་ཕ་མིང་ལ་དབང་འདུས་དང་། མ་མིང་ལ་ལྷག་པ་བརྗོད་ཀྱི་ཡོད་འདུག ཨ་མཚོ་ཚང་གི་མི་སྐྱ་ཡིན་པ་ཆོས་གྲགས་ལགས་རང་ལོ་ ༤༩ ཡིན་པ་དང་། ཕ་མིང་ལ་ཚུགས་རྒྱལ་དང་མ་མིང་ལ་བདེ་སྐྱིད་བརྗོད་ཀྱི་ཡོད་འདུག ཁོང་རྣམས་འཛིན་བཟུང་བྱེད་དགོས་དོན་དང་ཉེས་པ་ག་རེ་བསག་མིན་སྐོར་ལ་ཉེན་ རྟོག་པས་གསལ་བཤད་གང་ཡང་མ་བྱས་པར་བཙན་ཁྲིད་བྱས་འདུག དེ་རྗེས་ཁོང་རྣམས་ཀྱི་སྤུན་མཆེད་ཅིག་ཁོང་རྣམས་ལ་ཟས་གོས་སྐྱེལ་བར་སོག་རྫོང་དུ་འགྲོ་སྐབས་ཁོང་ཡང་བཀག་ཉར་བྱས་ཡོད་འདུག
ད་ལྟའི་ཆར་རོང་པོ་གྲོང་ཚོ་༡༣ པ་དང་གར་ཚ་ཚང་གི་གཡས་གཡོན་དུ་ཉེན་རྟོག་པ་མང་པོ་འགྲེམས་འཇོག་གིས་ཡར་འགྲོ་མར་འོང་གི་མི་ལ་ཞིབ་བཤེར་དང་བསུན་གཙེར་ཚད་མེད་བཟོ་བཞིན་ཡོད་འདུག
