༢༠༡༤ ཟླ་ ༧ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༩ ཉིན་མདོ་སྨད་ཀན་ལྷོ་ཁུལ་བསང་ཆུ་རྫོང་བླ་བྲང་དགོན་པའི་དགེ་འདུན་པ་ཐབས་མཁས་ལགས་ཀྱིས་དགོན་པའི་མདུན་རིའི་ནགས་གསེང་དུ་རང་སྲོག་རང་གིས་བཅད་ཡོད་འདུག
དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། གྲྭ་ཐབས་མཁས་ལགས་དགུང་ལོ་ ༥ ནས་རབ་ཏུ་བྱུང་སྟེ་དགུང་ལོ་ ༢༤ བར་བླ་བྲང་དགོན་པར་ཞུགས་ཡོད་ཀྱང་། རྒྱ་ནག་གཞུང་གིས་བླ་བྲང་དགོན་པར་གྲྭ་བཙུན་གྱི་གྲངས་ཚད་ལ་ཚོད་འཛིན་བྱས་པའི་སྲིད་བྱུས་འོག་ད་བར་ཚོགས་གྲལ་ལ་མ་ཚུད་པ་དང་། དགོན་པར་སྟངས་འཛིན་བྱས་པ་སོགས་ཀྱིས་དཀའ་ངལ་འོག་རང་སྲོག་རང་བཅད་ཡོད་འདུག་པ་དང་། རང་སྲོག་མ་བཅད་སྔོན་ཁོང་གིས་སེམས་ཐག་ཉེ་བའི་གྲོགས་པོ་ཁག་གཅིག་ལ་ཁོ་རང་ཆུང་དུས་ནས་ད་བར་མི་ལོ་ ༡༩ ཙམ་གྱི་རིང་བླ་བྲང་དགོན་པར་ཆོས་ཞུགས་བྱས་ཏེ་རང་ནུས་གང་ལྕོགས་ཀྱིས་ཞབས་འདེགས་དང་། ཉམ་ཆུང་ཚུལ་མཐུན་བྱས་ཡོད་ཀྱང་། རྒྱ་ནག་ས་གནས་སྲིད་གཞུང་དང་འབྲེལ་ཡོད་སྡེ་ཁག་གིས་གྲྭ་བཙུན་ཚོད་འཛིན་བྱས་ནས་ད་བར་ཚོགས་གྲལ་ལ་མི་ཚུད་པ་དང་། བོད་ཀྱི་དགོན་སྡེ་ཁག་གི་སློབ་གཉེར་ལ་རང་དབང་མ་སྤྲད་པར་སྲིད་བྱུས་འདྲ་མིན་ལག་བསྟར་བྱས་པའི་དཀའ་ངལ་ཁྲོད་བོད་ཀྱི་དགོན་སྡེ་ཁག་སྤྱི་ཡོངས་ལ་དཀའ་ངལ་ཤུགས་ཆེན་འཕྲད་བཞིན་ཡོད་སྟབས་རྒྱ་ནག་གཞུང་གིས་གྲྭ་བཙུན་ཚོད་འཛིན་དང་། ཆོས་དད་རང་དབང་ལ་རྡོག་རོལ་གཏོང་བཞིན་པའི་སྲིད་བྱུས་ལ་ངས་ངོ་རྒོལ་གྱི་ལས་འགུལ་ཞིག་སྤེལ་འདོད་འདུག་ཅེས་ངོ་སྤྲོད་གནང་ཡོད་འདུག
ས་གནས་རྒྱ་ནག་གཞུང་གིས་བླ་བྲང་བཀྲ་ཤིས་འཁྱིལ་དགོན་པར་དགེ་འདུན་པའི་ཞལ་གྲངས་ ༩༩༩ ལྷག་ཚོགས་ཞུགས་མི་ཆོག་པའི་ཆོས་དད་བཀག་འགོག་བྱེད་བཞིན་པ་དང་། གྲྭ་བཙུན་ཚོད་འཛིན་དང་ཆོས་དད་བཀག་འགོག་གི་སྲིད་བྱུས་འོག་ནས་ཐ་ན། སོ་སོའི་རྩ་ བའི་བླ་མའི་སྐུ་པར་ཙམ་པར་བཤམ་མི་ཆོག་པའི་གནས་སྟངས་འོག་བསླབ་པ་སློབ་གཉེར་ བྱེད་འདོད་ཡོད་པའི་གྲྭ་བཙུན་མི་ཉུང་བ་བློ་ཕམ་བྱུང་ནས་དགོན་སྡེ་ནས་ཁ་བྲལ་དགོས་ཐུག་པ་དང་། དོན་རྐྱེན་འདྲ་མིན་འབྱུང་དང་འབྱུང་བཞིན་པ་རེད། ད་ཐེངས་གྲྭ་ཐབས་མཁས་ལགས་རང་ཤི་རྒྱབ་པ་ནི་རྒྱ་ནག་གིས་བོད་ནང་དང་ལྷག་པར་དགོན་སྡེ་ཁག་ལ་སྤྲོད་བཞིན་པའི་གནོན་ཤུགས་ངོ་མ་རེད་ཅེས་ངོ་སྤྲོད་བྱས་བྱུང་།
དགེ་འདུན་པ་ཐབས་མཁས་ལགས་ནི་མདོ་སྨད་བླ་བྲང་བསང་ཆུ་རྫོང་སྔགས་པ་སྡེ་པའི་ཕ་འཇིགས་བྱེད་སྐྱབས་དང་། མ་བདེ་སྐྱིད་སྒྲོལ་མ་གཉིས་ཀྱི་བུ་ཡིན་འདུག
