༢༠༠༩ ཕྱི་ཟླ་ ༡༡ ཚེས་ ༧ རེས་གཟའ་སྤེན་པ།

༄༅། །ཕྱི་ལོ་ ༢༠༠༩ ཟླ་ ༡༡ ཚེས ༦ ཉིན་རྒྱ་གར་གསར་ཤོག་དུས་བབ་ (Times of India) ཅེས་པའི་ནང་འཁོད་དོན། རྒྱ་གར་རྒྱལ་ས་ལྡི་ལི་གསར་པའི་ནང་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་མ་རི་ཡ་ཨོ་ཏེ་རོ་ (Maria Otera) ལགས་སུ་གསར་འགོད་པ་ཁག་གཅིག་ནས་༸གོང་ས་མཆོག་ཨ་རུ་ན་ཅལ་མངའ་སྡེའི་ནང་ (Arunachal State)  ཆིབས་སྒྱུར་བསྐྱང་རྒྱུའི་ཐོག་དྲི་བ་བཏོན་པར་ལན་འདེབས་གནང་དོན། ༸གོང་ས་མཆོག་ཆོས་ཕྱོགས་ཀྱི་དབུ་ཁྲིད་གཅིག་ཡིན་པས་ཆ་ནས་ཆོས་ཕྱོགས་དང་འབྲེལ་བའི་ལས་དོན་ཆེད་ས་གནས་གང་དུ་ཆིབས་སྒྱུར་གནང་མིན་སྐུ་ཉིད་ལ་རང་དབང་ཡོད། ད་རེས་༸གོང་ས་མཆོག་རྟ་དབང་དགོན་པར་ཆིབས་སྒྱུར་བསྐྱང་རྒྱུ་དེ་ཡང་ཆོས་ཕྱོགས་ཀྱི་དབུ་ཁྲིད་གཅིག་ཡིན་པའི་ཆ་ནས་ཐུགས་འགན་ཞིག་ཀྱང་ཆགས་ཡོད། ཅེས་གསུངས་ཡོད། དེ་བཞིན་ཨ་རིའི་སྲིད་འཛིན་ཨོ་བྷ་མ་ཕྱི་ཟླ་ ༡༡ ནང་རྒྱ་ནག་ཏུ་ཕེབས་རྒྱུ་ཡིན་པའི་གནས་ཚུལ་དང་འབྲེལ་བའི་ཐོག་གསུང་དོན། སྲིད་འཛིན་མཆོག་རྒྱ་ནག་ཏུ་ཕེབས་སྐབས་ངས་སྲིད་འཛིན་མཆོག་གིས་སྐབས་དེར་མཐའ་གཅིག་ཏུ་བོད་ཀྱི་གནད་དོན་འདི་དང་། དེ་འདྲའི་ཐོག་བགྲོ་གླེང་ཞུ་རྒྱུ་རེད་ཅེས་ཞུ་མི་ཐུབ་ཀྱང་ང་ཚོའི་འཆར་གཞིའི་ནང་སྐབས་དེར་བོད་ཀྱི་གནད་དོན་ཐོག་བགྲོ་གླེང་ཞུ་རྒྱུ་ཡིན་པར་ཐེ་ཚོམ་མེད། ཅེས་དང་དེ་བཞིན་ལྕམ་སྐུ་ནས་གསུང་དོན། ༸གོང་ས་མཆོག་ནི་བོད་ཀྱི་ངོ་བོ་རྣམ་དག་ཅིག་མཚོན་བཞིན་ཡོད། ཨ་རིའི་ནང་༸གོང་ས་མཆོག་ཆོས་ཀྱི་དབུ་ཁྲིད་གཅིག་དང་བོད་ཀྱི་ངོ་བོ་མཚོན་པའི་ཐོག་གུས་བརྩི་ཆེན་པོ་ཞུ་བཞིན་ཡོད། སྲིད་འཛིན་ཨོ་བྷ་མས་ཀྱང་༸གོང་ས་མཆོག་ལ་བརྩི་མཐོང་ཆེན་པོ་ཞུ་བཞིན་ཡོད་སྐོར་གསུངས་ཡོད་པ་བཅས།