༢༠༡༤ ཟླ་ ༧ ཚེས་ ༡༦ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ (Ladakh Autonomous Hill Development Council) ནས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ། ཕྱི་ལོ་ ༢༠༡༤ ཟླ་ ༧ ཚེས་ ༡༥ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་མགོན་པོ་གང་ཉིད་མཆོག་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གྲོས་ཚོགས་སུ་༸ཞབས་སོར་བདེ་བར་འཁོད་སྐབས། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གཙོ་འཛིན་སྐུ་ཞབས་རིག་འཛིན་དཔལ་འབར་མཆོག་གིས་དབུས་གྲོས་ཚོགས་འཐུས་མི་སུམ་ཅུ་ཙམ་དང་། དེ་བཞིན་གཞུང་འབྲེལ་གནད་ཡོད་མི་སྣ་ཁག་གཅིག་གིས་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་བསྟུན་སྐུ་ཞབས་རིག་འཛིན་དཔལ་འབར་མཆོག་གིས་ལྷན་ཚོགས་དེ་ནི་འདས་པའི་ལོ་ངོ་བཅོ་བརྒྱད་རིང་སྤྱི་ཚོགས་ཡར་རྒྱས་དང་འབྲེལ་འཕྲོད་བསྟེན་དང་ཤེས་རིག ལྷག་པར་དུ་མང་ཚོགས་ཀྱི་བདེ་དོན་དང་འབྲེལ་བའི་ཕྱག་ལས་གནང་མུས་ཡིན་སྐོར་གྱི་ལས་བསྡོམས་དང་། འབྱུང་འགྱུར་གྱི་ལས་འཆར་ཁག སྤྱི་ནོར་༸གོང་ས་༸སྐྱབས་མགོན་པོ་མཆོག་གིས་ད་བར་ལ་དྭགས་ཁུལ་གྱི་མི་དམངས་ལ་ལམ་སྟོན་བཀའ་སློབ་བླ་ན་མེད་པར་སྩལ་བར་ཐུགས་རྗེ་ཆེ་ཞུའི་བཀའ་དྲིན་རྗེས་དྲན་ཞུས་པ་མ་ཟད། འབྱུང་འགྱུར་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་བཀའ་དགོངས་ལྟར་ལག་ལེན་ཞུ་རྒྱུ་སྐོར་སོགས་སྙན་སྒྲོན་ཞུས་འདུག
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་གྲོས་ཚོགས་འཐུས་མི་རྣམས་ལ་ཆོས་ལུགས་མཐུན་སྒྲིལ་དང་། བཟང་སྤྱོད། ཤེས་ཡོན། རིག་གཞུང་བཅས་ཀྱི་སྐོར་ལ་ལམ་སྟོན་བཀའ་སློབ་སྩལ་དོན། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནས་ཚོགས་འདུའི་ཐོག་སྐད་བཏང་སྟེ། འཐུས་མི་རྣམ་པ་དང་མཇལ་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་། ལྷག་པར་ཁྱེད་རང་ཚོའི་ལོ་རྒྱུས་ཀྱི་འབྱུང་བ་དང་འབྲེལ་ནས་ད་ལྟའི་གནས་སྟངས་དང་མ་འོངས་པའི་ལས་འཆར་སྐོར་རྣམས་ཞིབ་ཕྲ་གསུངས་བྱུང་བས་ཐུགས་རྗེ་ཆེ་ཞུ་རྒྱུ་ཡིན། ད་བར་དཀའ་ངལ་མང་པོ་བརྒྱུད་དེ་དཀའ་ངལ་དེ་དག་སེལ་ནས་གྲུབ་འབྲས་གང་ཙམ་ཐོན་ཡོད་པར་བརྟེན་བཀྲ་ཤིས་བདེ་ལེགས་ཞུ་རྒྱུ་ཡིན། རང་གི་རིག་གཞུང་སྲུང་སྐྱོབ་ཆེད་སྐད་ཡིག་དང་ཡི་གེ་ཧ་ཅང་གལ་ཆེན་པོ་རེད་ཅེས་བརྗོད་འདོད་བྱུང་། ངོས་རང་ཆུང་དུས་ནས་དེ་སྔའི་བོད་གཞུང་གི་འགྲོ་སྟངས་ལ་ཞན་ཆ་མང་པོ་ཡོད་པ་ཚོར་མྱོང། གང་ཡིན་ཟེར་ན། དབང་ཆ་ཡོངས་རྫོགས་མི་རེ་ཟུང་གི་ལག་ཏུ་ཡོད། ཕྱི་ལོ་ ༡༩༥༠ ལོར་བོད་མིའི་ཆབ་སྲིད་ཀྱི་འགན་བླངས་ཏེ་ཕྱི་ལོ་ ༡༩༥༢།༡༩༥༣ ལོར་ལེགས་བཅོས་ལས་ཁུངས་གསར་འཛུགས་བྱས་ཏེ། བཅོས་བསྒྱུར་གཏོང་རྒྱུའི་འགོ་བཙུགས་བྱས་ཀྱང་དེ་ཙམ་ལམ་ལྷོང་བྱུང་མེད། རིམ་པས་ང་ཚོ་མང་གཙོའི་ངོ་བོར་བཅོས་བསྒྱུར་ཐུབ་པ་བྱུང་སྟེ། ཕྱི་ལོ་ ༢༠༠༡ ལོར་འོས་བསྡུའི་ལམ་ནས་བཀའ་བློན་ཁྲི་པ་འདེམས་བསྐོ་བྱས་རྗེས་ངོས་ཀྱི་གནས་སྟངས་ཕྱེད་རྒན་ཡོལ་ཆགས་ཡོད།
ཕྱི་ལོ་ ༢༠༡༡ ནས་ངོས་རང་རྒན་ཡོལ་ཆ་ཚང་ཞུས་ཏེ་ཆབ་སྲིད་ཀྱི་འགན་གང་ཡང་མེད། ངོས་རང་ཆུང་དུས་ནས་མང་གཙོར་ཡི་རང་བྱེད་ཀྱི་ཡོད། ཁྱེད་རང་ཚོ་འདི་གར་ཡང་དག་པའི་མང་གཙོའི་ལམ་ལུགས་ལོངས་སྤྱོད་བཞིན་ཡོད། མང་ཚོགས་རྣམས་ཀྱིས་རྣམ་པ་ཚོར་རེ་བ་ཆེན་པོ་བྱས་ཏེ་འོས་འདེམས་བྱས་པར་བརྟེན། མང་ཚོགས་ཀྱི་རེ་བ་ལྟར། ལས་དོན་མཐའ་དག་དྲང་པོ་དྲང་གཞག་དང་། ཕྱི་གསལ་ནང་གསལ་བྱེད་དགོས། ལས་བསྡོམས་ནང་གསལ་བ་བཞིན་འབྱུང་འགྱུར་གྱི་ལས་འཆར་ཞུ་སྒོ་ཁག་ཤོག་བུའི་སྟེང་ཙམ་མ་ཡིན་པར་ལག་ལེན་དོན་འཁྱོལ་གནང་སྟེ་སྤྱི་ཚོགས་བདེ་སྐྱིད་ལྡན་པ་དང་། བྱམས་བརྩེ་ལྡན་པ་ཞིག་སྐྲུན་ཐབས་བྱེད་དགོས། གྲོས་ཚོགས་ཀྱི་འཐུས་མི་ཁོངས་ཁ་ཆེ་དང་ནང་པ་སོགས་ཡོད་སྟབས། ཆོས་ལུགས་མཐུན་སྒྲིལ་དང་། ཕན་ཚུན་དབར་གཅིག་གྱུར་གྱི་འདུ་ཤེས་དགོས། དེང་དུས་ཀྱི་ཤེས་ཡོན་ལམ་ལུགས་དེ་དངོས་པོ་ཡར་རྒྱས་ཁོ་ནར་ཁ་ཕྱོགས་ཡོད། ང་ཚོའི་ཤེས་ཡོན་ལམ་ལུགས་ཁོངས་ཡ་རབས་བཟང་སྤྱོད་ཀྱི་ལྟ་གྲུབ་ངེས་པར་དུ་ཁ་སྐོང་གནང་སྟེ། སློབ་གྲྭ་རེ་ཟུང་ནང་ཚོད་ལྟ་བྱེད་ཐུབ་ན་ཡག་པོ་ཡོད། ལྷག་པར་ངོས་རང་ཕྱི་རྒྱལ་ཡུལ་གྲུ་ཁག་ཏུ་བསྐྱོད་ནས་ཐུག་འཕྲད་བྱུང་བའི་གནད་ཡོད་མི་སྣ་ཕལ་ཆེ་བའི་གཅིག་གྱུར་གྱི་ལྟ་སྟངས་ནི། དེང་དུས་ཤེས་ཡོན་སློབ་གསོའི་ལམ་ལུགས་འདི་བཞིན་སྤྱིར་བཏང་ཡག་པོ་ཡོད་ཀྱང་། གཙོ་ཆེ་ཤོས་ཕྱི་དངོས་པོ་ཡར་རྒྱས་གཏོང་རྒྱུ་མ་གཏོགས་ནང་བསམ་བློའི་རིན་ཐང་ཡར་རྒྱས་གཏོང་རྒྱུའི་ཐོག་སློབ་གསོའི་སྟོང་ཆ་ཞིག་ལུས་སྐོར་གྱི་ངོས་འཛིན་བྱེད་བཞིན་འདུག
དེར་བརྟེན་ངོས་ཀྱིས་དུས་རྒྱུན་དུ་ཤེས་ཡོན་སློབ་སྦྱོང་སྤྲོད་རྒྱུའི་ནང་མིའི་བསམ་བློ་ཡར་རྒྱས་དང་། ཡ་རབས་བཟང་སྤྱོད་སྐོར་སློབ་གསོ་ཆ་ཚང་བ་ཞིག་སྤྲོད་ཐབས་བྱེད་དགོས་སྐོར་རྗོད་བཞིན་ཡོད། དེ་བཞིན་ང་ཚོས་རྒྱ་གར་གྱི་རྒྱལ་ས་ལྡི་ལི་གཙུག་ལག་སློབ་གཉེར་ཁང་གི་མཁས་དབང་ཁག་གཅིག་དང་ལྷན་ཆོས་ལུགས་དང་མ་འབྲེལ་བར་མིའི་བཟང་སྤྱོད་གོང་འཕེལ་གཏོང་ཕྱོགས་ཀྱི་ལས་གཞི་ཞིག་འགོ་འཛུགས་བྱས་ཡོད། ཅེས་སོགས་ཀྱི་བཀའ་སློབ་སྩལ། །
