༢༠༡༤ ཟླ་ ༧ ཚེས་ ༡༥ རེས་གཟའ་མིག་དམར།
༄༅། །བརྒྱུད་ལམ་ཁག་ནང་གནས་ཚུལ་སྤེལ་གསལ་ལྟར་ན།  ཕྱི་ལོ་ ༢༠༡༤ ཟླ་ ༧ ཚེས་ ༩ ཉིན་གྱི་ཉིན་གུང་ཆུ་ཚོད་ ༡༢ ཙམ་ལ་དཀར་མཛེས་ཁུལ་གསེར་རྟ་རྫོང་ཐོག་ཏུ་གྲྭ་ཤེར་སྐྱབས་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་བོད་ལ་ཕེབས་སུ་འཇུག་དགོས། བོད་ལ་རང་དབང་དགོས་ཞེས་སྐད་འབོད་དང་ཡིག་ཆ་གཏོར་འགྲེམས་གནང་སྟེ་རྒྱ་གཞུང་ལ་ཞི་རྒོལ་གྱི་ངོ་རྒོལ་སྐད་འབོད་གནང་ནས། སྐར་མ་ལྔ་དྲུག་ཙམ་ལས་མ་སོང་བར་ས་གནས་དྲག་ཆས་ཉེན་རྟོག་པ་དང་དམག་མི་མང་པོ་འབྱོར་ཏེ། ཁོང་འཛིན་བཟུང་བྱས་ནས་གསེར་རྟ་རྫོང་ཉེན་རྟོག་ཁང་དུ་བཙན་ཁྲིད་བྱས་ཡོད་པ་མ་ཟད། དེ་མ་ཐག་གསེར་རྟ་རྫོང་ཁོངས་ཀྱི་དྲ་རྒྱ་སོགས་བརྒྱུད་ལམ་ཡོངས་རྫོགས་བཀག་སྡོམ་བྱས་ཡོད་འདུག
གྲྭ་ཤེར་སྐྱབས་ལགས་ནི་ད་ལྟ་རང་ལོ་ ༢༠ ཡིན་ཞིང་། གསེར་རྟ་གནུབ་གཟུར་དགོན་པའི་དགེ་འདུན་པ་ཡིན་ལ། དེང་སྐབས་གསེར་རྟ་བླ་རུང་ལྔ་རིག་ནང་བསྟན་སློབ་གླིང་དུ་སློབ་གཉེར་གནང་བཞིན་ཡོད་པ་དང་། འཛིན་གྲྭའི་ནང་སློབ་གཉེར་རྩེར་སོན་གྱི་གྲས་ཤིག་ཡིན་འདུག ཁོང་གི་ཕ་མིང་ལ་སྐྱ་རིས་དང་ཨ་མའི་མིང་ལ་ཚེ་ལྷ་བརྗོད་གྱི་ཡོད་པ་དང་། ཁོང་ལ་ཕ་མ་གཅིག་པའི་མིང་སྲིང་ལྔ་ཡོད་པའི་ནང་ནས་ཁོང་ཆེ་ཤོས་ཡིན་འདུག
གནུབ་གཟུར་དབང་ཤུལ་དགོན་ནི་གསེར་རྟ་རྫོང་དང་རྒྱང་ཐག་སྤྱི་ལེ་ ༣༠ ཙམ་གྱི་སར་ཡོད་པ་དང་། དགོན་པ་དེར་རྒྱུན་ལྡན་དགེ་འདུན་པའི་ཞལ་གྲངས་ ༥༠༠ ཙམ་ཡོད་ནའང་། དགེ་འདུན་པ་མང་པོ་ས་ཁུལ་དང་ཆོས་སྡེ་གཞན་ལ་སློབ་གཉེར་དུ་ཕེབས་ཡོད་སྟབས། གཏན་བཞུགས་གནང་མཁན་དགེ་འདུན་པ་ ༡༠༠ ལྷག་ཙམ་ཡོད་འདུག