༢༠༡༤ ཟླ་ ༧ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༡༣ ཉིན་རྡ་ས་བཞུགས་སྒར་བོད་ཀྱི་དཔེ་མཛོད་ཁང་གི་ཚོགས་ཁང་དུ་སྤྱི་འཐུས་ཟུར་པ་དང་རྩོམ་པ་པོ་དགེ་བཤེས་བེ་རི་འཇིགས་མེད་དབང་རྒྱལ་ལགས་ཀྱི་བོད་ཀྱི་རྩོམ་རིག་གི་དཔེ་དེབ་ཁག་གཉིས་དབུ་འབྱེད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་གངས་སྐྱིད་དཔེ་མཛོད་ཚོགས་ཁང་གི་ཚོགས་ཁང་དུ་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་གཙོས་སྤྱི་འཐུས་ཁག་གཅིག་དང་། དེ་བཞིན་དམིགས་བསལ་སྐུ་མགྲོན་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁས་དབང་བཀྲ་ཤིས་ཚེ་རིང་ལགས་སོགས་ཞིབ་འཇུག་པ་དང་རྩོམ་པ་པོ་མི་གྲངས་ ༢༠ ཙམ་ལྷན་འཛོམས་སྤྱི་ཟུར་རྩོམ་པ་པོ་དགེ་བཤེས་བེ་རི་འཇིགས་མེད་དབང་རྒྱལ་ལགས་ཀྱི་རྩོམ་རིག་གི་དེབ་གསར་༼བོད་ཀྱི་རྩོམ་རིག་འཇུག་སྒོ་༽དང་༼བོད་ཀྱི་རྩོམ་རིག་སྤྱི་བཤད།༽ཅེས་པའི་རྩོམ་རིག་སྒྱུ་རྩལ་གྱི་དཔེ་དེབ་ཁག་གཉིས་བོད་མང་སྤྱི་འཐུས་ཚོགས་གཞོན་མཆོག་གིས་དབུ་འབྱེད་གནང་།
དེ་ཡང་རྩོམ་པ་པོ་དགེ་བཤེས་བེ་རི་འཇིགས་མེད་དབང་རྒྱལ་ལགས་ཀྱིས་རྩོམ་རིག་དེབ་གསར་གཉིས་ཀྱི་དགོས་དམིགས་སོགས་གསུང་སྐབས། ལོ་རྒྱུས་ཁྲོད་སྒྱུ་རྩལ་རྩོམ་རིག་གི་ཐོག་ནས་མིའི་སེམས་ཁམས་ཁ་ལོ་བསྒྱུར་ཐུབ་པ་དང་། རྒྱལ་ཁབ་ཁ་ལོ་བསྒྱུར་ཐུབ་པ། སྤྱི་ཚོགས་ཁ་ལོ་བསྒྱུར་ཐུབ་པའི་ནུས་པ་མང་པོ་བྱུང་གི་ཡོད་པ་དང་། ནུས་པ་དེའི་རྒྱུན་མུ་མཐུད་ནས་ཡོང་དང་ཡོང་བཞིན་པ་རེད། སྤྱི་ཚོགས་ལ་ཞབས་ཞུའི་ནུས་པ་ཆེན་པོ་འདོན་ཐུབ་པའི་ཆ་རྐྱེན་ཡག་ཤོས་དེ་རྩོམ་རིག་ལ་ཡོད་པ་འགྲེལ་བཤད་རྒྱག་ཐུབ་པ་ཞིག་རེད། འོན་ཀྱང་བོད་པའི་སྤྱི་ཚོགས་དང་ལྷག་པར་བཙན་བྱོལ་ནང་རྩོམ་རིག་གི་ཐོག་ནས་
དེབ་འབྲི་མཁན་ཡོད་པ་ཙམ་མ་གཏོགས། དེབ་དེ་བཀླགས་ནས་སྤྱི་ཚོགས་ནང་ཤུགས་རྐྱེན་ཐེབས་ཏེ་ཡར་རྒྱས་དང་བསམ་བློའི་ཁ་ཕྱོགས་བསྒྱུར་བ་དེ་ཙམ་མེད་པ་ཞིག་ཚོར་གྱི་ཡོད། གལ་སྲིད་དེ་འདྲ་ཞིག་ཡོད་པར་ཆ་བཞག་ནའང་། ཚིག་ཁ་ཤས་ཤིག་གི་རྒྱབ་ལོགས་སུ་དོགས་འདྲོག་ཆེན་པོ་བྱས་ཏེ་ཟིང་ཆ་བསླངས་པ་ཞིག་མ་གཏོགས། རྩོམ་རིག་གི་ཡང་དག་པའི་ལམ་ལ་ཐོན་འགྲོ་བའི་ལོ་རྒྱུས་དང་བརྒྱུད་རིམ་མ་རག་པ་ལྟ་བུ་ཞིག་ཚོར་གྱི་ཡོད། རྩོམ་རིག་གི་ཐོག་ནས་མིའི་བསམ་བློའི་ཁ་ཕྱོགས་བསྒྱུར་ཐུབ་པ་དང་སྤྱི་ཚོགས་ཀྱི་ཁ་ལོ་བསྒྱུར་ཐུབ་པ། རྩོམ་རིག་གི་ནུས་པར་བརྟེན་ནས་སྤྱི་ཚོགས་འཕེལ་ཕྱོགས་ཐོག་ཕན་ནུས་ཐོན་དགོས་ཀྱི་ཡོད་ན། ཐོག་མར་རྩོམ་རིག་གི་ཐོག་ལ་བག་ཆགས་ངེས་ཅན་ཞིག་དགོས་ཀྱི་འདུག བག་ཆགས་དེ་སོ་སོར་མེད་པ་ཡིན་ནའང་རྩོམ་རིག་ཐོག་བག་ཆགས་ཡོད་མཁན་ཚོའི་རྩོམ་རིག་ལ་ནུས་པ་དང་ཕན་ཐོགས། དགེ་མཚན་ཞིག་ཡོད་པ་རེད་བསམ་པའི་ཚོར་སྣང་བསླེབ་ཐུབ་པ་ཞིག་ཏན་ཏན་དགོས་ཀྱི་འདུག དེ་འདྲ་ཞིག་དགོས་ན་རྩོམ་བྲིས་པ་ཙམ་གྱིས་མི་ཕན་པར་རྩོམ་རིག་གི་རྒྱབ་ལྗོངས་དང་ལོ་རྒྱུས། ཕན་ཡོན། ནུས་པ་སོགས་ངོ་སྤྲོད་བྱེད་དགོས་པ་གལ་ཆེན་པོ་རེད། ཅེས་དང་།ཁོང་གིས་ད་ལྟའི་བར་དེབ་ ༢༢ བྲིས་ཡོད་ཀྱང་། སྒེར་ངོས་ནས་དེབ་དབུ་འབྱེད་བྱས་པ་ཐོག་མ་ཡིན་ལ། དེབ་དབུ་འབྱེད་ཀྱི་མཛད་སྒོ་བསྡུས་པ་ཡིན་ན། མི་མང་པོ་ཞིག་གི་དོ་སྣང་བསླེབ་པར་ཕན་ཐོགས་དང་ཁྱད་པར་ཞིག་ཡོང་གི་རེད་བསམ་པ་མ་གཏོགས། དེབ་གཉིས་བྲིས་པ་དེས་སྤྱི་ཚོགས་ཁ་ལོ་བསྒྱུར་ཐུབ་པ་དང་རྒྱལ་ཁབ་བསྐྱར་གསོ་བྱེད་ཐུབ་པ་ལྟ་བུའི་བསམ་བློ་དང་རེ་བ་ཆེན་པོ་གང་ཡང་མེད་སྐོར་སོགས་གསུངས་སོང་།
དེ་ནས་སྐུ་མགྲོན་གཙོ་བོ་སྤྱི་འཐུས་ཚོགས་གཞོན་མཆོག་གིས་དཔེ་དེབ་ཁག་གཉིས་དབུ་འབྱེད་དང་འབྲེལ་གསུང་བཤད་གནང་བའི་ནང་། བེ་རི་འཇིགས་མེད་དབང་རྒྱལ་ལགས་ལྟ་བུ་ཡིན་ན། གཞུང་ལུགས་འཆད་ཁྲིད་གནང་སྟེ་སློབ་མ་སྐྱེད་སྲིང་བྱེད་ཐུབ་མཁན་ཞིག་ཡིན་ལ། ཁོང་ལྟ་བུ་ང་ཚོའི་སྤྱི་ཚོགས་ནང་གྲངས་ཀ་བརྩི་དགོས་ན་ཉུང་ཉུང་ཆགས་ཡོད། གཞུང་ལུགས་ཆ་ཚང་བ་ཞིག་འཆད་ཁྲིད་བྱེད་ཐུབ་པའི་རྒྱུན་དེ་གལ་ཆེར་བརྩིས་ནས་སློབ་མ་སྐྱེད་སྲིང་བྱེད་རྒྱུ་ཧ་ཅང་གལ་ཆེན་ཆགས་ཡོད། བོད་མི་སྤྱི་ཡོངས་ཀྱིས་གཞུང་ལུགས་རྣམས་སྣང་མེད་དུ་བཞག་པ་ཡིན་ན། ནམ་ཞིག་གཞུང་ལུགས་ཆ་ཚང་ཞིག་འཆད་ཁྲིད་བྱེད་ཐུབ་མཁན་གྱི་གང་ཟག་ཅིག་འཚོལ་དགོས་ནའང་མི་རྙེད་པའི་ཉེན་ཁ་ཡོད་སྟབས། དེ་རིགས་ལ་ཚང་མས་དོ་སྣང་བྱེད་རྒྱུ་གལ་ཆེན་ཆགས་ཡོད། ལྷག་པར་བེ་རི་འཇིགས་མེད་དབང་རྒྱལ་ལགས་ཀྱིས་ཝཱ་ཎཱ་མཐོ་སློབ་དང་འབྲས་སྤུངས་སོགས་སུ་རིག་གཞུང་འཆད་ཁྲིད་གནང་དང་གནང་བཞིན་པ་དེ་བོད་བསྟན་པ་ཆབ་སྲིད་དང་། བྱེ་བྲག་བོད་ཀྱི་རིག་གཞུང་ཉམས་པ་སླར་གསོ་ཡོང་བར་ནུས་པ་ཆེན་པོ་ཐོན་ངེས་པས། མུ་མཐུད་སེམས་ཤུགས་མ་ཆག་པའི་ཐོག་བོད་ཀྱི་རིག་གཞུང་ལ་ཞབས་འདེགས་ཆེན་པོ་ཞུ་ཐུབ་པའི་རེ་བ་དང་སྨོན་ལམ་རྒྱག་བཞིན་ཡོད། ཅེས་སོགས་ཀྱི་གསུང་བཤད་གནང།
དེ་རྗེས་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་རྩོམ་རིག་སྒྱུ་རྩལ་གལ་ཆེ་ཡིན་པའི་སྐོར་སོགས་ཀྱི་གསུང་བཤད་གནང་གྲུབ་མཚམས་མཛད་སྒོ་གཙོ་སྐྱོང་བ་བོད་ཀྱི་དཔེ་མཛོད་ཁང་གི་ཉམས་ཞིབ་འགན་འཛིན་ན་ག་སངས་རྒྱས་བསྟན་དར་ལགས་ཀྱིས་ཐུགས་རྗེ་ཆེ་ཞུས་ཏེ་དཔེ་དེབ་དབུ་འབྱེད་ཀྱི་མཛད་སྒོ་གྲོལ་བ་བཅས།།
