༢༠༠༩ ཕྱི་ཟླ་ ༡༠ ཚེས་ ༣༡ རེས་གཟའ་སྤེན་པ།
༄༅། །སྔ་འགྱུར་རྫོགས་ཆེན་ཨོ་རྒྱན་བསམ་གཏན་ཆོས་གླིང་དགོན་གྱི་འབུམ་ཚོགས་གོ་སྒྲིག་ཚོགས་ཆུང་ནས་བཏང་གནས་ནང་འཁོད་དོན།
ཕྱི་ལོ་ ༢༠༠༩ ཟླ་ ༩ ཚེས་ ༢༤ ནས་ ༢༨ བར་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་སྔ་འགྱུར་རྫོགས་ཆེན་དགོན་གྱི་སྐྱབས་རྗེ་རྫོགས་ཆེན་རིན་པོ་ཆེ་དབུ་བཞུགས་ཐོག་མཁན་བླ་འདུས་པ་ཡོངས་དང་། ཕྱོགས་མཐའ་ཁག་ནས་ཚོགས་བཅར་བ་གྲྭ་བཙུན་སྔགས་གསུམ་བཅས་ཁྱོན་བསྡོམས་གྲངས་ ༡༥༠ ལྷག་ཙམ་ནས་གསུང་དབྱངས་མགྲིན་གཅིག་གིས་ཟབ་ཡང་དཀོན་མཆོག་སྤྱི་འདུས་སྒོ་ནས་ཚོགས་མཆོད་ཀྱི་ཆོ་ག་གང་ཟབ་གནད་སྨིན་འབད་སྒྲུབ་ཞུས་པ་དང་ཆབས་ཅིག་རྟེན་མཆོག་སྤྱན་སྔར་མཆོད་ཚོགས་རྒྱས་ཤོམ་གྱིས་མེ་ཏོག་དང་། བདུག་སྤོས། མར་མེ་སྟོང་ཚོགས་བརྒལ་བ་བསྒྲོན་ཏེ་རྒྱལ་བ་དགྱེས་པའི་མཆོད་སྦྱིན་དུ་ཕུལ་ཡོད་པ་མ་ཟད། ཚོགས་མི་དང་ཞལ་ཟས་བཟོ་མི་ཡོངས་ཀྱིས་དཀར་ཟས་ཁོ་ནར་བརྟེན་པ་དང་། དེ་ཡང་ལུང་རྟོགས་ཀྱི་བསྟན་པ་རིན་པོ་ཆེ་འདི་ཉིད་ཕྱོགས་ཀུན་ཏུ་རྒྱས་ཞིང་ཡུན་རིང་གནས་པ། དེ་འཛིན་ཡོངས་ཀྱི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྔ་འགྱུར་བསྟན་པའི་གསལ་བྱེད་སྐྱབས་རྗེ་རྫོགས་ཆེན་རིན་པོ་ཆེ་རྣམ་གཉིས་དབུས་པའི་རིས་མེད་སྐྱེ་ཆེན་དམ་པ་གང་ན་སུ་བཞུགས་༸ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དོན་མཐའ་དག་བགེགས་མེད་ལྷུན་གྱི་འགྲུབ་པ། བོད་རྒྱ་གཉིས་ཀྱི་དཀའ་རྙོག་འཚེ་བ་མེད་པའི་ལམ་ནས་གསལ་ཏེ་ཆོལ་གསུམ་བོད་མིར་རིང་ནས་སྙིང་དུ་བརྣག་པའི་རང་དབང་གི་ཉི་མ་མྱུར་དུ་བཞད་དེ་གཞིས་བྱེས་མཉམ་འཛོམས་ཡོང་བ་བཅས་ཕན་ཡོན་སྒོ་དུ་མ་ལ་དམིགས་ཏེ་ཚོགས་མཆོད་རྒྱས་པ་ཕུལ་ཡོད་པ་རེད། གཞན་ཡང་གཞིས་ཆགས་ཁུལ་གྱི་ཡུལ་མི་རྣམས་ནས་ཉིན་ལྔའི་རིང་ཚོགས་མཆོད་ཀྱི་ཞལ་ཟས་གཡོས་སྦྱོར་དང་། ཚོགས་འབུམ་ཆེན་མོའི་ཉིན་བཞི་པར་དེདག་མཇུག་སྒྲིལ་ཟིན་འཕྲལ་ཞལ་ཟས་བཟོ་མི་ཁྱོན་མི་གྲངས་ ༢༥༠ ཡས་མས་ཤིག་ལ་དཀོན་མཆོག་སྤྱི་འདུས་ཚོགས་འཁོར་གྱི་སྐུ་པར་དང་བྱིན་རྟེན་སོགས་གནང་བ་དང་ཉིན་མཐའ་མར་སྐྱབས་རྗེ་རིན་པོ་ཆེ་མཆོག་དང་མཁན་བླ་འདུས་པ་ཡོངས་ལ་རྟེན་དོད་སྐུ་ཡོན་དང་ལྷ་རེག་དར་དཀར་བཅས་ཕུལ་ཡོད་པ་བཅས་ཀྱི་གནས་བསྡུས་སུ།།
