༢༠༠༩ ཕྱི་ཟླ་ ༡༠ ཚེས་ ༣༡ རེས་གཟའ་སྤེན་པ།

༸གོང་ས་༸སྐྱབས་མགོན་ཆེནཔོ་མཆོག་རོ་ཡལ་པག་མགྲོན་ཁང་ལ་༸ཞབས་སོར་འཁོད་བཞིན་པ།

༄༅། །ཕྱི་དྲིལ་ལས་ཁུངས་ཀྱི་དབྱིན་ཡིག་གཞུང་འབྲེལ་གསར་ཤོག་གི་རྩོམ་སྒྲིག་པས་ཉི་ཧོང་ནས་བཏང་གནས་ནང་འཁོད་དོན།

ཕྱི་ལོ་ ༢༠༠༩ ཟླ་ ༡༠ ཚེས་ ༣༠ ཕྱེད་ཡོལ་ཤི་ཀོ་ཀུ་ནང་པའི་ཆོས་ཚོགས་ (Shikoku Buddhist Association) དང་། ཨོ་ཀི་ན་ཝ་བྱང་ཆུབ་ཆོས་ཚོགས་ (Okinawa Mahabodhi Association ) གཉིས་ནས་༸གོང་ས་མཆོག་ལ་ཇི་ལྟར་གསོལ་འདེབས་ཞུས་པ་ལྟར་ཉི་ཧོང་དུ་ཆིབས་སྒྱུར་བསྐྱངས་ཡོད་པ་རེད། དེ་ཡང་༸གོང་ས་མཆོག་ཉི་ཧོང་ན་རི་ཏཱ་རྒྱལ་སྤྱིའི་གནམ་ཐང་དུ་༸ཞབས་སོར་འཁོད་སྐབས་ཉི་ཧོང་དང་། ལྷོ་ཤར་ཨེ་ཤི་ཡའི་སྐུ་ཚབ་དོན་གཅོད་ལྷག་པ་འཚོ་སྒོ་ལགས་དང་འབྲེལ་ཡོད་རྒྱ་རིགས་ཁག་གཅིག དེ་བཞིན་སོག་རིགས་དང་། བོད་རིགས། ཉི་ཧོང་མི་མང་བཅས་ནས་ཕེབས་བསུའི་གཟབ་རྒྱས་ཞུས་ཡོད།

༸གོང་ས་མཆོག་ལ་བོད་རིགས་གཞོན་སྐྱེས་ཁག་གཅིག་གིས་ཕེབས་བསུ་ཞུ་བཞིན་པ།

༸གོང་ས་༸སྐྱབས་མགོན་ཆེན་པོ་མཆོག་ནས་འདི་ཟླའི་ཕྱི་ཚེས་ ༣༡ ནས་ཕྱི་ཟླ་ ༡༡ ཚེས་ ༧ བར་མཛད་འཕྲིན་བསྐྱང་གནང་མཛད་རྒྱུ་ཡིན་འདུག ད་ཐེངས་༸གོང་ས་མཆོག་ཉི་ཧོང་དུ་ཆིབས་སྒྱུར་ཐེངས་ ༡༢ ཡིན་པ་དང་། ཕྱི་ལོ་ ༡༩༥༩ ལོར་༸གོང་ས་མཆོག་རྒྱ་གར་ལ་བཙན་བྱོལ་དུ་༸ཞབས་སོར་འཁོད་རྗེས་ཕྱི་རྒྱལ་ཡུལ་གྲུ་ཁག་ནང་ཆིབས་སྒྱུར་ཐོག་མ་དེ་ཕྱི་ལོ་ ༡༩༦༧ ལོར་ཉི་ཧོང་ནང་ཆིབས་སྒྱུར་བསྐྱངས་ཡོད་པ་བཅས་ཀྱི་གནས་བསྡུས་སུ།