༢༠༡༤ ཟླ་ ༧ ཚེས་ ༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་བོད་ཁྱིམ་གྱི་ཐང་ཆེན་དུ་ལ་དྭགས་ཁུལ་གྱི་བོད་རིགས་རྣམས་ལ་དམིགས་བསལ་མཇལ་ཁ་སྩོལ་སྐབས། བཀའ་ཟུར་རྗེ་བཙུན་པདྨ་མཆོག་དང་རྒན་བློ་བཟང་བསྟན་འཛིན་ལགས་སུ་ལ་དྭགས་བོད་ཁྱིམ་སློབ་ཟུར་རྣམ་པས་གོ་སྒྲིག་ཞུས་པའི་ཆེ་བསྟོད་ཀྱི་གཟེངས་རྟགས་དེ་བཞིན་མགོན་པོ་གང་ཉིད་མཆོག་གིས་བྱམས་བརྩེའི་ཕྱག་ཟུང་བརྒྱུད་ནས་གསོལ་རས་སྩལ་འདུག
གཟེངས་རྟགས་དེ་ནི་སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་དང་རྒན་བློ་བཟང་བསྟན་འཛིན་ལགས་ཀྱིས་ལ་དྭགས་ཁུལ་དུ་དཀའ་ངལ་ཅན་གྱི་གནས་སྟངས་འོག་བོད་ཕྲུག་ཚོའི་ཤེས་ཡོན་ཆེད་ངལ་བ་དུ་མ་ཁྱད་དུ་བསད་ནས་འབད་བརྩོན་ཧུར་སྐྱེད་གནང་བར་བརྟེན་བོད་ཕྲུག་ཙམ་མ་ཟད།
ལ་དྭགས་ས་གནས་ཕྲུ་གུ་མི་ཉུང་བ་ཞིག་ལ་ཧ་ཅང་ཕན་ཐོགས་བྱུང་ཡོད་པ་དེ་དག་ལ་ངོས་འཛིན་ཞུ་ཆེད་གཟེངས་རྟགས་ཕུལ་བ་ཞིག་ཡིན་འདུག ཁོང་རྣམ་པས་རླབས་ཆེན་གྱི་འགོ་ཁྲིད་འོག་ལ་དྭགས་བོད་ཕྲུག་ཁྱིམ་སྡེ་འདི་བཞིན་ཁུལ་དེའི་སློབ་གྲྭ་རྩེ་ཕུད་གྲས་སུ་ཚུད་ཡོད། ད་ལྟའི་ཆར་ལ་དྭགས་བོད་ཁྱིམ་སློབ་གྲྭར་སློབ་མ་ཁྱོན་གྲངས་ ༢༠༠༠ ཡོད། གཟེངས་རྟགས་གསོལ་སྩལ་གྱི་མཛད་སྒོའི་སྐབས་༸གོང་ས་མཆོག་གིས་སློབ་ཕྲུག་ཚོར་བོད་མི་རིགས་ཀྱི་ཐུན་མིན་རིག་གཞུང་དང་སྐད་ཡིག་མི་ཉམས་རྒྱུན་འཛིན་བྱས་པ་དང་ཆབས་ཅིག་དེང་དུས་ཀྱི་ཤེས་ཡོན་ལ་སྦྱང་བརྩོན་བྱེད་དགོས་རྒྱུ་ཧ་ཅག་གལ་ཆེ་ཡིན་སྐོར་སོགས་ཀྱི་བཀའ་སློབ་སྩལ་ཡོད།
