༢༠༠༩ ཕྱི་ཟླ་ ༡༠ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཕྱི་ཟླ་ ༡༠ ཚེས་ ༢༣ ཉིན་རྡ་ས་བོད་ཕྲུག་ཁྱིམ་སྡེ་དབུ་བརྙེས་ནས་མི་ལོ་ཧྲིལ་པོ་ ༤༩ འཁོར་བའི་དུས་ཆེན་མཛད་སྒོ་གཟབ་རྒྱས་ཤིག་རྡ་སྟེང་བོད་ཕྲུག་ཁྱིམ་སྡེའི་རྩེད་ཐང་དུ་རྒྱལ་ཁའི་ངང་སྲུང་བརྩི་ཞུས་ཡོད་པ་རེད། ཐེངས་འདིའི་མཛད་སྒོར་ཇི་ལྟར་སྔོན་ནས་གསོལ་འདེབས་ཞུས་པ་བཞིན། དཔལ་རྒྱལ་བ་ཀརྨ་པ་རིན་པོ་མཆོག་ཆེད་
ཕེབས་གནང་བས་དབུས་སྐྱབས་གནས་དགེ་འདུན་གྱི་སྡེ་དང་། དཔལ་ལྡན་རང་གཞུང་གི་ཆེས་མཐོའི་ཁྲིམས་ཞིབ་པ་ཆེན་པོས་དབུས་ཁྲིམས་ཞིབ་པ་ལས་ཟུར་རྣམ་པ། དཔལ་ལྡན་བཀའ་ཤག་གི་བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་དབུས་བཀའ་བློན་ལས་ཟུར་རྣམ་པ་དང་། བོད་མི་མང་སྤྱི་འཐུས་ཚོགས་གཞོན་དང་
རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། གཞན་ཡང་རྒྱ་ཆེའི་ཕྱི་ནང་གི་མང་ཚོགས་སྟོང་ཕྲག་བརྒལ་བ་འདུ་འཛོམས་བྱུང་ཡོད་པ་རེད།
དུས་ཆེན་མཛད་སྒོའི་ཐོག་མར་ཚང་མ་སྐུ་བཞེངས་ཐོག་སྤྱིར་བོད་མི་རིགས་ཀྱི་ཆེད་དུ་རང་སྲོག་བློས་བཏང་བའི་རྒྱལ་གཅེས་དཔའ་བོ་ཕོ་མོ་རྣམས་དང་ཡང་སྒོས་ཉེ་དུས་བོད་མི་བཞི་སྲོག་ཁྲིམས་བཅད་པ་རྣམས་ཀྱི་ཆེད་མྱང་ངན་དང་གདུང་སེམས་མཉམ་སྐྱེ་མཚོན་སླད་ངག་བཅད་སྐར་མ་གཅིག་རིང་ཞུས་ཡོད། དེ་ནས་འཕགས་བོད་གཉིས་ཀྱི་རྒྱལ་གླུ་བཏང་རྗེས་བོད་ཁྱིམ་སློབ་གྲྭའི་སྤྱི་ཁྱབ་དབུ་འཛིན་ཚེ་དབང་ཡེ་ཤེས་ལགས་ནས་བོད་ཕྲུག་ཁྱིམ་སྡེའི་ལས་བསྡོམས་སྙན་སྒྲོན་ཞུས། དེ་རྗེས་དཔལ་ལྡན་རང་གཞུང་བཀའ་ཤག་གི་བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ནས་བཀའ་ཤག་གི་གསུང་བཤད་དང་། བོད་མི་མང་སྤྱི་འཐུས་ཚོགས་གཞོན་མཆོག་ནས་སྤྱི་འཐུས་ཀྱི་གསུང་བཤད་གནང་ཡོད། དེ་ནས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་བཀའ་སློབ་གནང་དོན།
དེ་རིང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ ༤༩ འཁོར་བའི་མཛད་སྒོར་རང་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་པའི་རྣམ་པ་ལྷན་རྒྱས་དང། བོད་ཁྱིམ་གྱི་དབུ་འཛིན་དང་ལས་བྱེད་ལས་ཟུར་སློབ་ཕྲུག་དང་བཅས་པ། དེ་བཞིན་སེར་སྐྱ་མང་ཚོགས་ཚང་མར་དེ་རིང་གི་དུས་དྲན་དང་སྟབས་བསྟུན་ནས་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན། ངས་དེ་རིང་འདིར་མཇིང་པ་སྦོམ་པོ་བྱས་ཏེ་ལམ་སྟོན་ཡིན་མདོག་མདོག་གིས་སྐད་ཆ་ཤོད་ཐུབ་རྒྱུ་རང་ཉིད་ལ་འཇོན་ཐང་དང་སྤོབས་པ་ལྟ་བུ་མི་འདུག་ཀྱང་དུས་རྒྱུན་རང་ཉིད་བོད་པའི་བླ་ཆེན་གྱི་མིང་ཁུར་མཁན་ཞིག་ཡིན་པའི་ཆ་ནས་ཕྱོགས་མང་པོ་ཞིག་ནས་བོད་དང་བོད་ཀྱི་མ་འོངས་པའི་སྐོར་ལ་བསམ་འཆར་འདོན་མཁན་དང་། རེ་བ་རྒྱག་མཁན་མང་པོ་ཞིག་ཡོང་གི་ཡོད། བྱས་ཙང་ཁོང་རྣམ་པའི་ཚབ་ཞུས་ཏེ་དེ་རིང་འདིར་གནས་ཚུལ་ཁ་ཤས་ཤིག་བརྒྱུད་བསྒྲགས་ལྟ་བུ་ཞིག་བྱས་པ་ཡིན་ན། ཁྱེད་རྣམ་ལ་ཕན་ཐོགས་གང་ཙམ་ཡོང་བའི་རེ་བ་ཞུ་གི་ཡོད། ང་ཚོ་བོད་མི་ཞིག་ཡིན་པའི་ཆ་ནས་བོད་པའི་སྲོལ་རྒྱུན་གྱི་རིག་གནས་སྲུང་སྐྱོབ་བྱེད་རྒྱུ་དེ་བོད་མིའི་ཚང་མར་འགན་ཁུར་ཡོད། བོད་རང་ལ་འཚོ་བ་སྐྱེལ་བཞིན་ཡོད་ནའང་འདྲ། དེ་བཞིན་བཙན་བྱོལ་དུ་འཚར་ལོངས་བྱེད་བཞིན་ཡོད་ནའང་འདྲ། མདོར་ན་བོད་མི་ཚང་མས་འགན་ཁུར་མཉམ་ལེན་བྱེད་དགོས་པ་ཆགས་ཡོད། གང་ཡིན་ཟེར་ན། བོད་མི་ནི་བོད་ཀྱི་རིག་གཞུང་སྲུང་སྐྱོབ་བྱེད་པ་པོ་ཞིག་ཆགས་ཡོད། བོད་ཀྱི་རིག་གཞུང་དེ་བོད་མིའི་བླ་སྲོག་ལྟ་བུ་ཆགས་ཡོད་པར་བརྟེན་དེ་གཉིས་ཕན་ཚུན་ཁ་བྲལ་ཐབས་མེད་པའི་འབྲེལ་བ་ཟབ་པོ་ཞིག་ཡོད་པ་ནི་བརྗོད་མི་དགོས་པ་རེད། འོན་ཀྱང་དེང་དུས་བོད་པའི་སྤྱི་ཚོགས་ནང་ལ་ཤུགས་རྐྱེན་འདྲ་མིན་ལ་བརྟེན་ནས་བོད་ཀྱི་སྐད་ཡིག་དང་རིག་གཞུང་ལ་སློབ་སྦྱོང་བྱེད་རྒྱུའི་དོ་སྣང་དེ་ཕྱོགས་ཁ་ཤས་ཐད་ལ་ཏོག་ཙམ་ཞིག་ཆུང་དུ་འགྲོ་གི་ཡོད་པ་ལྟ་བུ་ཞིག་མཐོང་གི་འདུག བྱས་ཙང་ང་མཚམས་རེ་སློབ་གྲྭ་དེ་འདྲ་འགྲོ་གི་ཡོད། བོད་ནས་སླེབས་ཏེ་ལོ་གཅིག་གཉིས་ལས་ཕྱིན་མེད་པའི་སློབ་ཕྲུག་དེ་དག་གིས་སོ་སོའི་བོད་ཀྱི་སྐད་ཡིག་དང་རིག་གཞུང་ལ་དོ་སྣང་གང་ལ་གང་ཙམ་ཞིག་ཡོད་པ་མཐོང་གི་འདུག དེ་ནས་འཛིན་གྲྭ་བརྒྱད་པ་དགུ་པ་དེ་འདྲ་ལ་སླེབས་སྐབས་མ་གཞིའི་དབྱིན་ཡིག་གི་སློབ་ཚན་མང་པོ་ཡོད་པ་ཡིན་དུས་དེ་འདྲ་ཞིག་གིས་ཁྱད་པར་འགྲོ་མེད་དམ། མང་ཆེ་བ་དབྱིན་ཇིའི་སྐད་ཡིག་དང་སྦྱོང་ཚན་ལ་དོ་སྣང་ཆེ་བ་ལྟ་བུ་ཞིག་བྱེད་ཀྱི་ཡོད་པ་རེད། འོན་ཀྱང་དེ་ངས་ཧོབ་སྟེ་བལྟས་པའི་སྣང་ཚུལ་ཞིག་རེད་མ་གཏོགས་ཏན་ཏན་ཞིག་མེད། དེ་དང་དེ་འདྲ་བའི་གནས་ཚུལ་མང་པོ་ཞིག་བཙན་བྱོལ་བོད་པའི་སྤྱི་ཚོགས་ནང་ལ་ཡོང་གི་ཡོད། དེར་བརྟེན་ང་ཚོས་ཤེས་དགོས་པ་དེ་གང་རེད་དམ་ཟེར་ན། བོད་ཀྱི་མ་འོངས་པར་ང་ཚོ་བོད་མི་ཤེས་ཡོན་དང་སློབ་སྦྱོང་ཡོད་མཁན་དེ་དག་དགོས་ཀྱི་ཡོད་པ་རེད། བོད་ལ་སྐྱེས་པའི་བོད་མི་ན་གཞོན་ཚོ་རྒྱ་རིགས་ཀྱི་སློབ་གསོ་དེ་འདྲ་ཞིག་གི་ནང་ལ་འཚར་ལོངས་བྱུང་སྟེ་རྒྱ་རིགས་ཅན་གྱི་གནོན་ཤུགས་དེ་ཉིན་རེ་ལས་ཉིན་རེ་གོང་འཕེལ་དུ་འགྲོ་གི་ཡོད་པ་རེད། རྒྱ་གར་དང་བལ་ཡུལ་ནང་ལ་འཚོ་བ་སྐྱེལ་བཞིན་པའི་བོད་པའི་ན་གཞོན་ཚོ་སྤྱིར་བཏང་བོད་པའི་རིག་གཞུང་དང་སྐད་ཡིག་དེ་དག་སློབ་སྦྱོང་བྱེད་ཐུབ་ཀྱི་ཡོད་ན་ཡང་། ད་དུང་འཚོ་བའི་ཐད་ལ་མི་རིགས་དང་རིག་གཞུང་གཞན་གྱིས་སྟོབས་ཤུགས་མང་པོ་ཞིག་སླེབས་ཀྱི་ཡོད་པའི་སྣང་ཚུལ་ཡོང་གི་ཡོད་པ་རེད། དེ་བཞིན་ནུབ་ཕྱོགས་སྤྱི་ཚོགས་ནང་ལ་འཚོ་བ་སྐྱེལ་བཞིན་ཡོད་པའི་བོད་མི་ན་གཞོན་ཚོས་དེ་བས་ཀྱང་ཕྱིའི་རིག་གཞུང་དང་འཚོ་བའི་སྟོབས་ཤུགས་ཆེ་བ་ཡོད་པ་རེད། མདོར་ན་འཛམ་གླིང་གི་ས་ཕྱོགས་འདྲ་མིན་ནང་གནས་པའི་བོད་པའི་ན་གཞོན་ཚོས་བོད་པའི་སྐད་ཡིག་སློབ་སྦྱོང་བྱེད་རྒྱུ་དང་། ལོ་རྒྱུས་ཉམས་ཞིབ་བྱེད་རྒྱུ། དེ་བཞིན་རིག་གཞུང་སོགས་ལ་སྦྱང་བརྩོན་བྱེད་རྒྱུ་གལ་ཆེན་པོ་རེད། དེ་འདྲ་ཡིན་དུས་དེ་ང་ཚོ་ཚང་མས་སེམས་ཁྲལ་བྱེད་དགོས་པའི་གནས་སྟངས་ཤིག་རེད་དྲན་གྱི་འདུག ད་ལྟ་བར་དུ་སྲོལ་རྒྱུན་གྱི་རིག་གནས་སྲུང་སྐྱོབ་གནང་མཁན་གྱི་བོད་མི་རྒན་གྲས་དེ་ཚོ་ཡིན་པ་ཡིན་ནའང་མང་པོ་ཞིག་སྐུ་གཤེགས་ཚར་བ་རེད། དེར་བརྟེན་ང་ཚོས་ངེས་པར་དུ་དུས་ཚོད་དམ་འཛིན་བྱས་ནས་སློབ་སྦྱོང་བྱེད་རྒྱུ་གོམ་པ་དེ་མགྱོགས་སུ་གཏོང་རྒྱུ་ཞིག་དང་འབད་བརྩོན་བྱེད་དགོས་པ་གལ་ཆེན་པོ་རེད། སྲོལ་རྒྱུན་གྱི་སློབ་གསོ་ཙམ་དུ་མ་ཟད་པའི་དེང་དུས་ཀྱི་སློབ་གསོར་ཡང་དོ་སྣང་ཆེན་པོ་བྱེད་དགོས། དེང་དུས་ཀྱི་ཤེས་བྱ་འདྲ་མིན་དང་ནུས་པ་འདྲ་མིན་ཐོག་ལ་ང་ཚོས་སློབ་སྦྱོང་བྱས་པ་ཙམ་དུ་མ་ཟད་པའི་སློབ་སྦྱོང་དེ་ནུས་པ་ཐོན་པ་ལྟ་བུ་ཞིག་དང་བོད་པའི་སྤྱི་ཚོགས་དང་བོད་ཀྱི་མ་འོངས་པར་ཞབས་འདེགས་ཞུ་མཁན་ཞིག་དགོས་ཀྱི་ཡོད་སྟབས་སློབ་སྦྱོང་ཁུངས་འཁྱོལ་བ་ཙམ་མ་ཡིན་པར། ང་ཚོས་ངེས་པར་དུ་ཆེད་ལས་བྱ་བ་དེ་འདྲ་སོ་སོའི་སྤྲོ་སྣང་དང་འཇོན་ཐང་ལ་བསྟུན་ཏེ་གདམ་ག་བྱས་ནས་དེའི་ཐོག་ལ་སློབ་སྦྱོང་དང་འཇོན་ཐང་ལྟ་བུ་ཞིག་བཏོན་ནས་བློ་ཁ་འབྱེད་རྒྱུ་དང་།
དེ་མཚུངས་སྲོལ་རྒྱུན་གྱི་སློབ་སྦྱོང་དར་འཕེལ་གཏོང་རྒྱུ་དང་སྤྱི་ཚོགས་ལ་ཕན་བདེ་སྒྲུབ་རྒྱུ། ཞེས་སོགས་ཀྱི་བཀའ་སློབ་ཟབ་རྒྱས་གནང་གྲུབ་མཚམས་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་མཆོག་ནས་བོད་ཕྲུག་ཁྱིམ་སྡེའི་ནང་ཞབས་ལོ་ ༢༠ འཁོར་བའི་ལས་བྱེད་རྣམས་ལ་གཟེངས་བསྟོད་གསོལ་རས་དང་། ༢༠༠༩ ལོའི་ནང་བོད་ཁྱིམ་སློབ་ཁག་གི་འཛིན་རིམ་ལྔ་པ་དང་བརྒྱད་པ་དེ་བཞིན་རྒྱལ་ཡོངས་འཛིན་གྲྭ་བཅུ་པ་དང་བཅུ་གཉིས་བཅས་ཀྱི་སློབ་ཕྲུག་རྣམས་ལ་སྤྱི་ཡོངས་ཡིག་ཚད་བཏང་བའི་གྲུབ་འབྲས་ཨང་རིམ་གྱི་གསོལ་རས་གནང་ཡོད་པ་དང་། དེ་བཞིན་ཤེས་སྤྱོད་འཕྲོད་གསུམ་གྱི་སློབ་མ་རྩེ་ཕུད་གཉིས་ལ་རང་གཞུང་ཤེས་རིག་ལས་ཁུངས་ཀྱི་གཟེངས་རྟགས་ཕྱག་འཁྱེར་བཅས་གནང་ཡོད་པ་རེད། དེ་རྗེས་སློབ་ཕྲུག་རྣམས་ནས་བོད་ཁྱིམ་སློབ་གྲྭའི་གཞས་མཁྱེན་པའི་ཡེ་ཤེས་འབུལ་ལམ་ཞུས། དེ་ནས་བོད་མིའི་རིག་གཞུང་དང་འབྲེལ་བའི་གཞས་སྣ་གཟིགས་འབུལ་ཞུས་རྗེས་སློབ་གྲྭ་ཆེ་འབྲིང་གཉིས་ཀྱི་སློབ་མ་རྣམས་ནས་མཉེན་རྩལ་ལུས་སྦྱོང་གཟིགས་འབུལ་སྣ་ཚོགས་ཕུལ། དེ་ནས་བོད་ཕྲུག་ཁྱིམ་སྡེའི་འགན་འཛིན་ཕུན་ཚོགས་རྣམ་རྒྱལ་ལགས་ནས་ཐུགས་རྗེ་ཆེ་ཞུའི་གཏམ་བཤད་གནང་བ་སོགས་དེ་ཉིན་གྱི་མཛད་སྒོ་དགའ་སྤྲོའི་རྣམ་པས་ཁེངས་ཞིང་བཀྲ་ཤིས་བདེ་ལེགས་ངང་ནས་གྲོལ་ཡོད། གཞན་ཡང་ཧི་མ་ཅལ་མངའ་སྡེའི་ནང་བོད་ཁྱིམ་མགྲིན་དབྱངས་ཕུལ་བྱུང་གི་འགྲན་བསྡུར་ཞིག་གནང་ཡོད་པ་བཅས་སོ།
