༢༠༠༩ ཕྱི་ཟླ་ ༡༠ ཚེས་ ༢༡ རེས་གཟའ་ལྷག་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། རྒྱ་གཞུང་གི་འབྲེལ་ཡོད་ཚན་པས་བོད་ནང་གཞོན་སྐྱེས་ཚོར་དྲ་རྒྱ་ལྟ་ཀློག་བྱ་རྒྱུའི་ཐད་དམ་བསྒྲགས་ཤིན་ཏུ་ཆེན་པོ་བྱེད་ཀྱི་ཡོད་པ་མ་ཟད། ལྷག་པར་རང་མོས་ཟིན་བྲིས་དང་དྲ་ཐོག་གི་གླེང་མོལ་བྱ་ཡུལ་གང་སར་དམ་བསྒྲགས་ཆེན་པོ་བྱས་པ་དང་ཆབས་ཅིག་སོ་ལྟ་བྱེད་མཁན་ཡང་བཙུགས་ཡོད་པར་བརྟེན་བོད་རིགས་གཞོན་སྐྱེས་ཁག་གཅིག་འཛིན་བཟུང་བྱས་དང་བྱེད་མུས་ཡིན་པ་རེད། ཉེ་དུས་ཟླ་ ༡༠ ཚེས་ ༡ ཉིན་རྒྱ་ནག་རྒྱལ་བཙུགས་དུས་ཆེན་ཉིན་ཁམས་སོག་རྫོང་ར་རྟ་གྲོང་ཚོ་ནས་ཡིན་པའི་གཞོན་སྐྱེས་གསུམ་ཡང་དྲ་གནས་ཟིན་བྲིས་སོགས་ཀྱི་སྟེང་༸གོང་ས་མཆོག་གི་སྐུ་དཔར་དང་བཀའ་སློབ་བཞག་ཡོད་པ། དེ་བཞིན་དྲ་རྒྱ་བརྒྱུད་དེ་ཕྱི་ཕྱོགས་སུ་འབྲེལ་བ་ཡོད་ཚུལ་ལ་བསྙད་དེ་འཛིན་བཟུང་བྱས་རྗེས་ད་བར་ནང་མི་སྤུན་མཆེད་སུ་གཅིག་དང་ཐུག་འཕྲད་བྱེད་བཅུག་གི་མེད་པའི་གནས་ཚུལ་ཐོན་ཡོད་པ་རེད། ན་གཞོན་གསུམ་པོ་དེ་དག་ནི་སོག་རྫོང་ར་རྟ་གྲོང་ཚོ་ནས་ཡིན་པའི་རང་ལོ་ ༢༥ སོན་པ་རྒྱལ་སེང་དང་། རང་ལོ་ ༢༤ སོན་པ་ཉི་མ་དབང་ཕྱུག རང་ལོ་ ༢༥ སོན་པ་ཡེ་ཤེས་ནམ་མཁའ་བཅས་ཡིན་ཞིང་། ཁོང་རྣམས་ནི་རྒྱུན་གཏན་ནས་དྲ་རྒྱ་ལྟ་ཀློག་བྱ་མཁན་གྲས་ཡིན་པ་རེད། རྩ་བའི་དེང་སྐབས་སོག་རྫོང་ཁོངས་སུ་དགོན་སྡེ་དང་མང་ཚོགས་ཁྲོད་རྒྱལ་གཅེས་རིང་ལུགས་ཀྱི་སློབ་གསོ་ཞེས་པའི་ལས་འགུལ་མུ་མཐུད་སྤེལ་མུས་མ་ཟད། སོག་ཙན་དན་དགོན་གྱི་རྒྱུན་སྲོལ་དབྱར་གནས་གྲོལ་རྗེས་སྤྲོ་གསེང་གཏོང་སྲོལ་ཡོད་པ་དེའང་བཀག་འགོག་བྱས་ཏེ་མུ་མཐུད་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་ཏེ་སེར་སྐྱ་མང་ཚོགས་ཚོར་སུན་གཙེར་ཤུགས་ཆེ་བཟོ་བཞིན་ཡོད་པའི་གནས་ཚུལ་ཐོན་འདུག
