༢༠༡༤ ཟླ་ ༦ ཚེས་ ༡༧ རེས་གཟའ་མིག་དམར།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨི་ཊ་ལིའི་ཊུ་སི་ཀན་ནི་མངའ་སྡེའི་པི་ས་ (Pisa) རྫོང་གི་པོ་མ་ཡ་ (Pomaia) གྲོང་གསེབ་ནང་རྟེན་གཞི་བྱས་པའི་བླ་མ་ཙོང་ཁ་པའི་ཆོས་ཚོགས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༤ ཟླ་ ༦ ཚེས་ ༡༥ ཉིན་གྱི་སྔ་དྲོ་གྲོང་ཁྱེར་ལི་ཝོར་ནོ་ (Livorno) ནང་དད་ལྡན་མང་ཚོགས་ལ་སྤྱན་རས་གཟིགས་བཀའ་དབང་སྩལ་ཡོད་པ་མ་ཟད། ཕྱེད་ཡོལ་མང་ཚོགས་ ༦༠༠༠ བརྒལ་བར་བྱམས་བརྩེ་ལྡན་པའི་བཟང་སྤྱོད། Compassionate Ethics ཅེས་པའི་བརྗོད་གཞིའི་ཐོག་ལམ་སྟོན་བཀའ་སློབ་སྩལ་དོན།

དེ་རིང་འདི་གར་འདུས་པའི་མང་ཚོགས་ཚང་མར་ཐོག་མར་ངོས་ཀྱིས་འཚམས་འདྲི་ཞུ་རྒྱུ་ཡིན། སྤྱིར་བཏང་ང་ཚོས་འགྲོ་བ་སེམས་ཅན་ཐམས་ཅད་ལ་བདེ་སྐྱིད་ཡོང་ཆེད་སེམས་ཁུར་བྱེད་ཐུབ་ན། མཐར་ཐུག་རང་ཉིད་ལ་ཕན་ཐོགས་ཡོང་རྒྱུ་ཡིན་པ་སྨོས་མི་དགོས་པ་ཞིག་རེད། ལྷག་པར་བརྩེ་བའི་བསམ་པས་ཀུན་ནས་བླངས་ན། དེའི་ཚོད་ཀྱིས་གཞན་ལ་བརྙས་བཅོས་དང་མགོ་སྐོར་སོགས་ཀྱི་བསམ་བློ་ཡོང་ཐབས་མེད་པ་ཧ་ཅང་གསལ་པོ་ཆགས་ཡོད། ང་ཚོའི་མི་ཚེ་བདེ་སྐྱིད་ལྡན་པའི་ཐོག་བསྐྱལ་རྒྱུར་ཕན་ཐོགས་ཡོང་ངེས་རེད། དེར་བརྟེན་གཞན་དོན་ཆེད་བསམ་བློ་ཤུགས་ཆེ་ཙམ་གཏོང་ཐུབ་ན། རང་ཉིད་ལ་ཁེ་ཕན་རག་གི་ཡོད་སྟབས། ང་ཚོ་ཚང་མས་བྱམས་བརྩེ་ཉམས་ལེན་བྱེད་རྒྱུ་གལ་ཆེན་པོ་ཆགས་ཡོད།

དེ་བཞིན་ངོས་ཀྱིས་དུས་རྟག་ཏུ་འཛམ་གླིང་འདིའི་ཐོག་ནས་གནས་པའི་ཆོས་ལུགས་གཙོ་ཆེ་བ་ཁག་གིས་བྱམས་བརྩེ་ཉམས་ལེན་བྱེད་དགོས་པའི་བསླབ་བྱ་གཅིག་མཚུངས་གསུང་གི་ཡོད་སྐོར་རྗོད་བཞིན་ཡོད། ལྟ་གྲུབ་ཐོག་ཆོས་ལུགས་འདྲ་མིན་ཕན་ཚུན་དབར་ཁྱད་པར་ཆེན་པོ་ཡོད་ནའང། དམིགས་ཡུལ་ནི་འགྲོ་བ་མིའི་སེམས་རྒྱུད་བཟང་དུ་གཏོང་རྒྱུ་ཡིན་པ་གཅིག་གྱུར་ཆགས་ཡོད། མི་གཞན་གྱི་བདེ་དོན་སླད་བསམ་བློ་གཏོང་ཐུབ་ན། དེ་ནི་ཕན་རླབས་ཆེ་བའི་བྱ་བ་ཞིག་ཏུ་འགྱུར་ངེས་རེད། ལྷག་པར་དུས་རབས་ཉེར་གཅིག་གི་ན་གཞོན་ཚོས་སེམས་རྒྱུད་བཟང་པོ་གོང་འཕེལ་གཏོང་རྒྱུར་འབད་བརྩོན་ཤུགས་ཆེ་ཙམ་བྱེད་དགོས། ཞེས་སོགས་ཀྱི་བཀའ་སློབ་སྩལ།