༢༠༡༤ ཟླ་ ༦ ཚེས་ ༧ རེས་གཟའ་སྤེན་པ།

༄༅། །ཕྱི་ལོ་ ༢༠༡༤ ཟླ་ ༦ ཚེས་ ༦ ཉིན་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་གཞོན་པ་ལྕམ་སྐུ་མཱ་རི་ཡ་ཧབ་ Marie Harf མཆོག་གིས་རྒྱ་ནག་གཞུང་ལ་ཆ་རྐྱེན་གང་ཡང་མེད་པའི་ཐོག་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གམ་ཡང་ན་ཁོང་གི་སྐུ་ཚབ་དང་ལྷན་གྲོས་མོལ་གནང་བ་བརྒྱུད་ནས་བོད་ནང་གི་ཛ་དྲག་གནས་སྟངས་ཞི་འཇམ་ཡོང་ཐབས་བྱེད་དགོས་པའི་རེ་འདུན་ཤུགས་ཆེ་བཏོན་འདུག

དེ་ཡང་ལྕམ་སྐུ་མཆོག་གིས་གསར་འགོད་ལྷན་ཚོགས་ཐོག་གསུང་དོན། ང་ཚོས་སྔ་མོ་ནས་རེ་འདུན་བྱས་པ་ལྟར། བོད་ཀྱི་ས་ཁུལ་ཁག་ཏུ་འགྲོ་བ་མིའི་ཐོབ་ཐང་གི་གནས་སྟངས་ཞན་པོ་ཡོད་པ་དེར་ང་ཚོར་སེམས་འཚབ་ཧ་ཅང་འདུག ང་ཚོས་རྒྱ་ནག་གཞུང་ལ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་དང་ལྷན་ཆ་རྐྱེན་གང་ཡང་མེད་པའི་ཐོག་དོན་སྙིང་ལྡན་པའི་གྲོས་མོལ་བྱེད་དགོས་པའི་རེ་འདུན་འདོན་རྒྱུ་ཡིན། རྒྱ་ནག་གཞུང་གིས་བོད་ཀྱི་ས་ཁུལ་ཁག་ཏུ་ལག་བསྟར་བྱེད་བཞིན་པའི་སྲིད་བྱུས་ལ་བརྟེན་ནས་གནས་སྟངས་ཛ་དྲག་ཆགས་བཞིན་ཡོད་པ་མ་ཟད། བོད་མིའི་ཐུན་མིན་ངོ་བོ་རྩ་མེད་འགྲོ་རྒྱུའི་ཉེན་ཁ་འཕྲད་བཞིན་ཡོད། ཨ་རིའི་གཞུང་གིས་ཕྱི་ལོ་ ༢༠༠༢ ལོར་བོད་དོན་རྒྱབ་སྐྱོར་གྱི་སྲིད་བྱུས་Tibetan Policy Act of 2002 ཞེས་པ་གཏན་འབེབས་བྱས་པར་བརྟེན། ང་ཚོས་ལྷ་སར་ཨ་རིའི་གཞུང་ཚབ་འཛུགས་རྒྱུར་འབད་བརྩོན་མུ་མཐུད་བྱ་རྒྱུ་དང་། རྒྱ་ནག་ནང་གི་ཨ་རིའི་གཞུང་ཚབ་ལས་ཁུངས་ཀྱི་འབྲེལ་ཡོད་ལས་བྱེད་པ་བོད་རིགས་གནས་སྡོད་ཀྱི་ས་ཁུལ་ཁག་ཏུ་དམ་བསྒྲགས་གང་ཡང་མེད་པར། གནས་སྟངས་རྟོག་ཞིབ་བྱ་རྒྱུའི་ཆོག་མཆན་སྤྲོད་རོགས། ཞེས་རེ་འདུན་ཞུ་རྒྱུ་ཡིན། ཞེས་གསུངས་ཡོད།