༢༠༡༤ ཟླ་ ༦ ཚེས་ ༦ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ བོད་ཕྲུག་ཁྱིམ་སྡེའི་ལག་རྩེད་སྤོ་ལོའི་ཐང་དུ་སློབ་ཕྲུག་གཙོ་བོར་གྱུར་བའི་བཞུགས་སྒར་ཁུལ་གནས་གཞོན་སྐྱེས་དང་སེར་སྐྱ་མང་ཚོགས་ ༤༣༠༠ བརྒལ་བར་ཐུགས་རྗེ་ཆེན་པོའི་བཀའ་དབང་སྩལ་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༧།༡༥ ཐོག་༸གོང་ས་༸སྐྱབས་མགོན་ཆེན་པོ་མཆོག་སློབ་ཕྲུག་ཁག་གཅིག་གིས་གྲོ་སོ་ཕྱེ་མར་འདེགས་འབུལ་དང་མཆོད་སྤྲིན་ལམ་ནས་ཕེབས་བསུ་གཟབ་རྒྱས་ཞུས་ཏེ་རྩེད་ཐང་གི་བཞུགས་ཁྲིར་༸ཞབས་སོར་འཁོད་དེ་སྒྲུབ་ཞག་མཛད་གྲུབ་མཚམས་མགོན་པོ་གང་ཉིད་མཆོག་གིས་བཀའ་དབང་མ་སྩལ་སྔོན་གསང་སྔགས་སྐོར་བཀའ་སློབ་ཕེབས་དོན། ང་ཚོ་བོད་ལ་ཡོད་པའི་སངས་རྒྱས་པའི་ཆོས་དེ་དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་ཞིག་ཆགས་ཡོད། ཀླུ་སྒྲུབ་ཡབ་སྲས་རྣམ་པས་གསང་སྔགས་རྡོ་རྗེ་ཐེག་པའི་ཆོས་ཉམས་བཞེད་གནང་གི་ཡོད། སྤྱིར་བཏང་གླང་དར་མའི་སྐབས་བོད་ཀྱི་ཆབ་སྲིད་གཅིག་གྱུར་ཐོག་སྐྱོང་རྒྱུ་མེད་པ་ཆགས་པར་བརྟེན། བོད་སིལ་བུར་ཐོར་བ་རེད། མདོ་སྟོད་སྨད་ཀྱི་ས་ཁུལ་དེ་དག་ཀྱང་རྒྱལ་ཕྲན་རེ་རེར་རྒྱལ་པོ་རེ་རེ་བྱས་ཏེ་གནས་འ
དུག ཆབ་སྲིད་ཀྱི་གནས་སྟངས་ཉམས་རྒུད་ཕྱིན་པ་དང་ཆབས་ཅིག་ཆོས་ཕྱོགས་ཐོག་ནས་རབ་བྱུང་ངུར་སྨྲིག་གི་སྡེ་མེད་པ་ཆགས་ཏེ། གོས་དཀར་ལྕང་ལོའི་སྡེས་བསྟན་པ་འཛིན་སྐབས་རྟོགས་པ་མཐོན་པོའི་དབང་དུ་ཕྱིན་པ་རྣམས་གནས་ཚུལ་ཐ་དད་རེད་མ་གཏོགས། དེ་མིན་ཕལ་ཆེར་གསང་སྔགས་འཆལ་སྤྱོད་ལ་ཕྱིན་ནས་ཉམས་རྒུད་དུ་ཕྱིན་འདུག དེ་སྔ་རྒྱ་གར་ལ་ཡང་གསང་སྔགས་ཀྱི་བསྟན་པ་ཉམས་པའི་རྒྱུ་མཚན་ནང་རྐྱེན་གཙོ་བོ་དགེ་འདུན་པ་ཚོས་རྒྱུ་དཔལ་འབྱོར་ལ་དང་འདོད་བྱས་པར་བརྟེན། དམངས་ཚོགས་ཀྱི་དད་གུས་བརླགས་པ་སོགས་ཀྱིས་ཉམས་ཆགས་ཕྱིན་འདུག ང་ཚོ་བོད་ཀྱང་གསང་སྔགས་འཆལ་སྤྱོད་ལ་ཕྱིན་ཏེ་སྐྱོན་ཆ་དེ་ལྟར་ཡོང་གི་ཡོད།
དེ་བཞིན་ང་ཚོ་བོད་པར་ཆུང་ཆུང་སྐབས་ནས་འབུ་སྲིན་གསོད་རྒྱུ་མེད་ཅེས་པའི་གོམས་གཤིས་ཤིག་ཡོད། དཔེར་ན། གཞུང་ཞབས་ཤིག་དེ་སྔ་ཨ་རིར་ཕྱིན་ཏེ་སློབ་གྲྭ་ཞིག་གི་ཐབ་ཚང་ནང་སྔོ་ཚལ་གཙང་བཟོའི་ལས་ཀ་བྱེད་ཀྱི་ཡོད་འདུག ཁོང་གིས་ཐབ་ཚང་ནང་སྔོ་ཚལ་གཙང་བཟོ་བྱེད་སྐབས། འབུ་སྲིན་ཐོན་ན་སྒྲུག་སྟེ་ལས་ཀ་ཚར་རྗེས་ཕྱིར་གློད་པར་འགྲོ་གི་ཡོད། ཐོག་མར་ཁོང་གི་ལས་རོགས་ཚོས་དེ་འདྲ་བྱས་ཏེ་དགོས་པ་མེད་སྐོར་བརྗོད་འདུག་ཀྱང་ཕྱིས་སུ་ཁོང་ཚོས་དེ་ལྟར་བྱེད་བཞིན་འདུག ཅེས་ངོས་ལ་བརྗོད་བྱུང། མདོར་ན། རང་ལས་གཞན་གཅེས་ཞེས་པ་ནི་རང་ཉིད་བློས་གཏོང་བྱེད་དགོས་སྐོར་བརྗོད་ཀྱི་མེད། རང་དང་གཞན་གཉིས་ཀྱི་བདེ་བ་བསྒྲུབ་རྒྱུར་བྱང་ཆུབ་སེམས་སྒོམ་པ་
ལས་ལྷག་ཅིག་མེད། ཆོས་ཁས་ལེན་མིན་ལ་མ་ལྟོས་པར་མི་བཟང་པོ་ཞིག་བྱོས་དང་། འཛམ་གླིང་བདེ་སྐྱིད་ལྡན་པ་ཞིག་ཆགས་ཀྱི་རེད། རང་རྒྱལ་གཞན་ཕམ་གྱིས་བསམ་བློ་བཏང་ན་འཛམ་གླིང་ཞི་བདེ་ཡོང་ཐབས་མེད།
དེར་བརྟེན་གཞན་ཕན་གྱི་བློ་ཞིག་རྒྱུད་ལ་འཇགས་ཐུབ་ན། བྱ་དེ་དང་ཉ་སོགས་གསོད་རྒྱུས་མཚོན་སྲོག་ཆགས་མང་པོར་བརྡབ་གསིག་ཉུང་དུ་འགྲོ་གི་རེད། དེ་བཞིན་ང་ཚོ་མི་ནང་ཁུལ་གསོད་རེས་དང་མགོ་སྐོར་གཏོང་རྒྱུའི་རིགས་ཕལ་ཆེར་ཡོང་གི་མ་རེད། རྒྱ་གར་ལྷོ་ཕྱོགས་རྒྱུད་སྨད་གྲྭ་ཚང་གི་དགེ་འདུན་པ་ཚོས་སྔ་དྲོ་ཤེས་རབ་སྙིང་པོ་བཏོན་ཏེ་སྐར་མ་བཅུ་ཙམ་སྒོམ་རྒྱག་དགོས་ཀྱི་ཡོད་འདུག སྐབས་དེར་རང་ལོ་ ༡༩ ལ་སོན་པའི་གྲྭ་གཞོན་ཞིག་འདས་གྲོངས་སུ་གྱུར་ནས་ཐུགས་དམ་ལ་བསྡད་འདུག ཅེས་སོགས་ཀྱི་བཀའ་སློབ་དང་བཀའ་དབང་སྩལ་ཡོད་པ་མ་ཟད། ལྷག་པར་མགོན་པོ་གང་ཉིད་མཆོག་གིས་དད་ལྡན་ཆོས་ཞུ་བའི་ཁྲོད་བྱང་ཆུབ་སེམས་དཔའ་དང་གསང་སྔགས་ཀྱི་སྡོམ་པ་སྒྲུབ་འདོད་ཡོད་མཁན་ཚོར་སྡོམ་པ་འབོགས་ཆོག་སྩལ་ཏེ་བཞུགས་སྒར་ཕོ་བྲང་དུ་ཆིབས་ཞལ་བསྒྱུར་ཡོད་པ་བཅས། །
