༢༠༠༩ ཕྱི་ཟླ་ ༡༠ ཚེས་ ༡༦ རེས་གཟའ་པ་སངས།
༄༅། །བཙན་བྱོལ་བོད་གཞུང་གི་ཕྱི་རྒྱལ་སྐུ་ཚབ་དོན་གཅོད་རྣམས་ནས་ཕྱི་ལོ་ ༢༠༠༩ ཟླ་ ༡༠ ཚེས་ ༡༥ ནས་ ༡༦ བར་ཉིན་གྲངས་གཉིས་རིང་ཚོགས་འདུ་དབུ་འཛུགས་གནང་ཡོད།
དེང་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ པའི་ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་དང་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་རྣམ་པ་གཉིས་དབུ་བཞུགས་ཐོག་ཕྱི་དྲིལ་དྲུང་ཆེ་རྣམ་གཉིས་དང་འབྲེལ་ཡོད་ལས་བྱེད། དེ་བཞིན་སྐུ་ཚབ་དོན་གཅོད་སོགས་ཚང་མ་ལྷན་འཛོམས་ཀྱིས་ཐོག་མར་བཀྲ་ཤིས་ཀྱི་རྟེན་འབྲེལ་མཚོན་སླད་ཞལ་འདོན་དབུ་འཛུགས་གནང་རྗེས་ཕྱི་དྲིལ་བཀའ་བློན་མཆོག་གིས་ཚོགས་བཅར་རྣམས་ལ་འཚམས་འདྲིའི་བཀྲིས་བདེ་ལེགས་ཞུ་པ་དང་ཆབས་ཅིག་ཚོགས་འདུའི་དགོས་དམིགས་སོགས་ངོ་སྤྲོད་གནང་། དེ་ནས་བཀའ་ཁྲི་མཆོག་གིས་ཚོགས་འདུ་ཚོགས་དགོས་པའི་རྒྱུ་མཚན་སྐོར་ལ་གསུང་བཤད་གྲུབ་མཚམས་ཚོགས་འདུ་དབུ་འཛུགས་ཞུ་ཡོད་པ་རེད། ད་རེས་ཀྱི་ཚོགས་འདུར་བོད་རྒྱ་ཞི་མོལ་སྐོར་ཡར་རྒྱས་གང་འདྲ་བྱས་ནས་གཏོང་སྐོར་དང་། དེ་བཞིན་འགྲོ་བ་མིའི་ཐོབ་ཐང་སོགས་བརྗོད་གཞི་སྣ་ཚོགས་ཐོག་ལ་འཚོགས་བཞིན་ཡོད་པ་རེད་འདུག
